Defence Cooperation: ભારત અને કુવૈતે રક્ષા ક્ષેત્રમાં દ્વિપક્ષીય સંબંધોને વધુ મજબૂત બનાવવા માટે મહત્વપૂર્ણ પગલું ભર્યું છે. બંને દેશો વચ્ચે ભારત-કુવૈત સંયુક્ત રક્ષા સમિતિ (Joint Defence Committee)ની પ્રથમ બેઠક શુક્રવારે નવી દિલ્હીમાં યોજાઈ હતી. બેઠકમાં સૈન્ય તાલીમથી લઈને રક્ષા ટેક્નોલોજી અને ઉદ્યોગ સુધીના અનેક ક્ષેત્રોમાં સહયોગ વધારવા અંગે ચર્ચા થઈ.

સૈન્ય તાલીમ અને સંયુક્ત અભ્યાસ પર ભાર

બંને પક્ષોએ સૈન્ય તાલીમ, સંયુક્ત સૈન્ય અભ્યાસ, મિલિટરી મેડિસિન અને સ્ટાફ વાટાઘાટો સહિતના ક્ષેત્રોમાં સહયોગ વધારવા સંમતિ વ્યક્ત કરી. આ સહયોગથી બંને દેશોની સેનાઓ વચ્ચે સંપર્ક અને પરસ્પર સમજ વધુ મજબૂત થવાની અપેક્ષા છે.

ડિફેન્સ ઇન્ડસ્ટ્રી અને રિસર્ચમાં સહયોગ

બેઠકમાં રક્ષા ઉદ્યોગ તથા રિસર્ચ એન્ડ ડેવલપમેન્ટ (R&D) ક્ષેત્રે સહયોગ વધારવા પર પણ ખાસ ધ્યાન આપવામાં આવ્યું. બંને દેશો વચ્ચે રક્ષા ટેક્નોલોજી અને સંરક્ષણ ઉત્પાદન ક્ષેત્રે નવા અવસર શોધવા અંગે ચર્ચા થઈ.

મોદીની કુવૈત મુલાકાત બાદ આગળ વધ્યો સહયોગ

ડિસેમ્બર 2024માં વડાપ્રધાન નરેન્દ્ર મોદીની કુવૈત મુલાકાત દરમિયાન થયેલા રક્ષા સહયોગ સંબંધિત કરારને હવે જમીની સ્તરે અમલમાં મૂકવાની દિશામાં આ બેઠકને મહત્વપૂર્ણ પગલું માનવામાં આવે છે.

બંને દેશોના અધિકારીઓની હાજરી

ભારત તરફથી સંયુક્ત સચિવ અમિતાભ પ્રસાદ અને કુવૈત તરફથી બ્રિગેડિયર જનરલ રાએદ અલસકરાનએ બેઠકની સહ-અધ્યક્ષતા કરી. ભારતીય પ્રતિનિધિમંડળમાં ત્રણેય સેનાઓ ઉપરાંત રક્ષા ઉત્પાદન વિભાગ, DRDO, સશસ્ત્ર દળોની મેડિકલ સેવાઓ અને વિદેશ મંત્રાલયના અધિકારીઓ સામેલ થયા હતા.

કુવૈતી પ્રતિનિધિમંડળે નેશનલ વોર મેમોરિયલની મુલાકાત લીધી

બેઠક પહેલાં બ્રિગેડિયર જનરલ રાએદ અલસકરાને નવી દિલ્હીના નેશનલ વોર મેમોરિયલ ખાતે શહીદોને શ્રદ્ધાંજલિ આપી. કુવૈતી પ્રતિનિધિમંડળે ભારતીય ડિફેન્સ પબ્લિક સેક્ટર અન્ડરટેકિંગ (DPSU)ની પણ મુલાકાત લીધી અને ભારતીય રક્ષા ઉદ્યોગ સાથે સંભવિત સહયોગ અંગે ચર્ચા કરી.

1962થી મિત્રતાપૂર્ણ સંબંધો

ભારત અને કુવૈત વચ્ચે રાજદ્વારી સંબંધો 1962માં સ્થાપિત થયા હતા. ડિસેમ્બર 2024માં વડાપ્રધાન મોદીની કુવૈત મુલાકાત દરમિયાન બંને દેશોના સંબંધોને સ્ટ્રેટેજિક પાર્ટનરશિપના સ્તરે લઈ જવામાં આવ્યા હતા. હવે સંયુક્ત રક્ષા સમિતિની શરૂઆતથી બંને દેશો વચ્ચે રક્ષા સહયોગને વધુ સંસ્થાગત અને વ્યાપક બનાવવાનો માર્ગ ખુલ્યો છે.

આ પણ વાંચો : Economic Growth: ભારતમાં ઔદ્યોગિક ઉત્પાદનને મળી જોરદાર ગતિ: જુલાઈમાં IIP 6.7% વધ્યો, મેન્યુફેક્ચરિંગનો દબદબો