Delhi : 'ઓપરેશન કવચ' હેઠળ મોટી કાર્યવાહી, 2.5 કિલો ગાંજા સાથે આરોપીની ધરપકડ
Delhi
Delhi : 'ઓપરેશન કવચ' હેઠળ મોટી કાર્યવાહી, 2.5 કિલો ગાંજા સાથે આરોપીની ધરપકડ
Delhi
Delhi : દિલ્હીમાં નશીલા પદાર્થો વિરુદ્ધ ચાલી રહેલા 'ઓપરેશન કવચ' અંતર્ગત સેન્ટ્રલ ડિસ્ટ્રિક્ટ પોલીસે મોટી કાર્યવાહી કરી છે. કમલા માર્કેટ પોલીસ સ્ટેશને શિવાજી પાર્ક, મિંટો રોડ નજીકથી એક શખ્સને 2.597 કિલોગ્રામ ગાંજા સાથે ઝડપી પાડ્યો છે. પોલીસે આરોપી વિરુદ્ધ NDPS એક્ટની કલમ 20 હેઠળ FIR નંબર 309/2026 નોંધીને વધુ તપાસ હાથ ધરી છે.
પોલીસના જણાવ્યા મુજબ, 26 સપ્ટેમ્બરે હેડ કોન્સ્ટેબલ અનિલ અને કોન્સ્ટેબલ વીરેન્દ્ર કમલા માર્કેટ વિસ્તારમાં પેટ્રોલિંગ કરી રહ્યા હતા. સાંજે આશરે 5 વાગ્યે પોલીસ ટીમ મિંટો રોડ પર શિવાજી પાર્ક બસ સ્ટેન્ડ નજીક પહોંચી ત્યારે એક શખ્સ શંકાસ્પદ બેગ સાથે જોવા મળ્યો હતો. પોલીસને જોઈને તે મિંટો રોડ તરફ ઝડપથી ભાગવા લાગ્યો હતો. પોલીસ ટીમે તેનો પીછો કરી તેને ઝડપી લીધો હતો.
નશીલા પદાર્થને સીલ કરીને પોલીસે કબજામાં લીધો
તપાસ દરમિયાન તેના બેગમાંથી સફેદ રંગની પોલીથીનમાં ગાંજા જેવો પદાર્થ મળી આવ્યો હતો. વજન કરતા તેનું પ્રમાણ 2.597 કિલોગ્રામ હોવાનું સામે આવ્યું હતું. ત્યારબાદ નશીલા પદાર્થને સીલ કરીને પોલીસે કબજામાં લીધો હતો. પકડાયેલા આરોપીની ઓળખ 22 વર્ષીય મુનીશ કુમાર પ્રજાપતિ તરીકે થઈ છે. તે ડીડિયુ માર્ગ, નવી દિલ્હીનો રહેવાસી છે અને મૂળ ઉત્તર પ્રદેશના સંભલનો હોવાનું પોલીસે જણાવ્યું છે. પોલીસ તપાસમાં આરોપીનો અગાઉનો ગુનાહિત રેકોર્ડ પણ સામે આવ્યો છે. તેના વિરુદ્ધ આઈ.પી. એસ્ટેટ પોલીસ સ્ટેશનમાં ચોરીનો કેસ નોંધાયેલો હોવાનું જાણવા મળ્યું છે.
સપ્લાય ચેન તોડવા માટે તપાસ આગળ ધપાવવામાં આવી
પૂછપરછ દરમિયાન આરોપીએ પોલીસને જણાવ્યું કે તેણે ગાંજો દિલ્હીના મોરી ગેટ વિસ્તારમાં મીઠાઈ પુલ નજીકથી એક વ્યક્તિ પાસેથી મેળવ્યો હતો અને તેને પસાર થતા લોકોને વેચીને સરળતાથી પૈસા કમાવવાનો પ્રયાસ કરતો હતો. આરોપી લગ્ન અને પારિવારિક કાર્યક્રમોમાં તંદૂર કુક તરીકે પણ કામ કરતો હોવાનું સામે આવ્યું છે. પોલીસ હવે ગાંજાનો સપ્લાયર કોણ છે અને સમગ્ર નશીલા પદાર્થોની સપ્લાય ચેનમાં અન્ય કેટલા લોકો સંકળાયેલા છે તે અંગે તપાસ કરી રહી છે. DCP સેન્ટ્રલ ડિસ્ટ્રિક્ટ રોહિત રાજબીર સિંહના જણાવ્યા મુજબ, સપ્લાયરને ઝડપી સમગ્ર સપ્લાય ચેન તોડવા માટે તપાસ આગળ ધપાવવામાં આવી રહી છે.
આ પણ વાંચો : IT Raid : રકુલ પ્રીત સહિત બોલિવૂડના અનેક નામ IT ની રડાર પર, ફિલ્મોના નામે વિદેશમાં પૈસા મોકલવાનો લાગ્યો છે આરોપ
