BRICS Summit 2026: આજથી નવી દિલ્હીમાં 18મું BRICS શિખર સંમેલન, બે દિવસ વિશ્વના મોટા મુદ્દાઓ પર થશે મંથન

BRICS Summit 2026: ભારત આજે શનિવારથી નવી દિલ્હીના ભારત મંડપમ ખાતે 18મા BRICS શિખર સંમેલનની યજમાની કરવા જઈ રહ્યું છે. બે દિવસ ચાલનારા આ મહત્વપૂર્ણ સંમેલનમાં BRICSના સભ્ય દેશો, ભાગીદાર દેશો અને આમંત્રિત દેશોના નેતાઓ એક મંચ પર આવશે. 12 અને 13 સપ્ટેમ્બર દરમિયાન નેતાઓ વૈશ્વિક અને પ્રાદેશિક મુદ્દાઓ પર ચર્ચા કરવાની સાથે BRICSના સહયોગને વધુ મજબૂત બનાવવાના માર્ગો પર પણ મંથન કરશે. ભારતની 2026ની BRICS અધ્યક્ષતાનો મુખ્ય વિષય “Building for Resilience, Innovation, Cooperation and Sustainability” એટલે કે લચીલાપણું, નવીનતા, સહયોગ અને ટકાઉ વિકાસ માટે નિર્માણ રાખવામાં આવ્યો છે.

ભારતની ચોથી વખત BRICS અધ્યક્ષતા

વર્ષ 2026 ભારત માટે BRICSની અધ્યક્ષતાની દૃષ્ટિએ મહત્વપૂર્ણ છે. ભારતે 1 જાન્યુઆરી 2026થી ચોથી વખત BRICSની અધ્યક્ષતા સંભાળી છે. આ દરમિયાન દેશના 25થી વધુ શહેરોમાં વિવિધ બેઠકો અને ઉચ્ચસ્તરીય કાર્યક્રમોનું આયોજન કરવામાં આવ્યું છે. તેનો મુખ્ય ઉદ્દેશ BRICSની વ્યૂહાત્મક ભાગીદારીને રાજકીય-સુરક્ષા, આર્થિક-નાણાકીય અને સાંસ્કૃતિક તથા લોકો વચ્ચેના સંબંધો જેવા ત્રણ મુખ્ય સ્તંભો પર વધુ મજબૂત બનાવવાનો રહ્યો છે.

11 દેશોનો BRICS, વૈશ્વિક અર્થતંત્રમાં મોટો હિસ્સો

હાલ BRICSમાં બ્રાઝિલ, ચીન, ઈજિપ્ત, ઈથિયોપિયા, ભારત, ઈન્ડોનેશિયા, ઈરાન, રશિયા, સાઉદી અરેબિયા, દક્ષિણ આફ્રિકા અને UAE સહિત 11 દેશો સામેલ છે. ભારત સરકારના જણાવ્યા અનુસાર આ 11 દેશો મળીને વિશ્વની લગભગ 49.5 ટકા વસ્તી, 40 ટકા વૈશ્વિક GDP અને 26 ટકા વૈશ્વિક વેપારનું પ્રતિનિધિત્વ કરે છે.

વૈશ્વિક પડકારો પર થશે ચર્ચા

BRICS દેશો વચ્ચે આતંકવાદ સામેની લડાઈ, ક્લાઈમેટ ચેન્જ, ખાદ્ય અને ઊર્જા સુરક્ષા, વૈશ્વિક આર્થિક સ્થિતિ, વેપાર, ટેક્નોલોજી, ટેલિકોમ્યુનિકેશન, કૃષિ, રોજગાર અને આંતરરાષ્ટ્રીય નાણાકીય વ્યવસ્થા સહિતના મુદ્દાઓ પર સહયોગ સતત વધી રહ્યો છે. ભારતની અધ્યક્ષતાનો ઉદ્દેશ BRICSને વધુ **રચનાત્મક, પરિણામલક્ષી અને ઉકેલ આધારિત મંચ તરીકે મજબૂત કરવાનો છે.

‘નમસ્તે’ સાથે પરંપરા અને આધુનિકતાનો સંગમ

ભારતની BRICS અધ્યક્ષતા માટે તૈયાર કરવામાં આવેલા લોગોમાં પરંપરા અને આધુનિકતાના સંમિશ્રણને દર્શાવવામાં આવ્યું છે. લોગોની પાંખડીઓમાં BRICS સભ્ય દેશોના રંગોનો ઉપયોગ કરવામાં આવ્યો છે, જ્યારે કેન્દ્રમાં ‘નમસ્તે’ની મુદ્રા ભારતની ઉષ્મા, સન્માન અને સુમેળભર્યા સહયોગની ભાવનાને રજૂ કરે છે.

આજે અને આવતીકાલે વિશ્વની નજર દિલ્હી પર

18મું BRICS શિખર સંમેલન માત્ર ભારત માટે જ નહીં પરંતુ વૈશ્વિક દક્ષિણ (Global South) માટે પણ મહત્વપૂર્ણ માનવામાં આવી રહ્યું છે. ભારત આ સંમેલન દ્વારા વિવિધ દેશો વચ્ચે સહમતિ ઊભી કરીને વિકાસ, નવીનતા, ટકાઉપણું અને વૈશ્વિક સહયોગને નવી દિશા આપવાનો પ્રયાસ કરશે. બે દિવસ ચાલનારા આ શિખર સંમેલનમાં થનારી ચર્ચાઓ અને સંભવિત નિર્ણયો પર હવે સમગ્ર વિશ્વની નજર રહેશે.

આ પણ વાંચો : India-Russia: નિર્મલા સીતારમણે રશિયન ઉપ-વડાપ્રધાન મંતુરોવ સાથે કરી મુલાકાત, દ્વિપક્ષીય રોકાણ સંધિ પર ચર્ચા