India World Bank ભાગીદારી હવે નવી દિશામાં: ટૂરિઝમ, ડિજિટલ હબ અને પ્રાઈવેટ કેપિટલ પર વધશે ફોકસ
India World Bank
India World Bank ભાગીદારી હવે નવી દિશામાં: ટૂરિઝમ, ડિજિટલ હબ અને પ્રાઈવેટ કેપિટલ પર વધશે ફોકસ
India World Bank
India World Bank: ભારત અને વર્લ્ડ બેંક ગ્રુપ વચ્ચેની ભાગીદારી હવે પરંપરાગત લોન અને નાણાકીય સહાયથી આગળ વધીને ઈન્ફ્રાસ્ટ્રક્ચર ફાઇનાન્સ, ડિજિટલ પબ્લિક ઈન્ફ્રાસ્ટ્રક્ચર, ટૂરિઝમ અને પ્રાઈવેટ કેપિટલ એકત્ર કરવા જેવા ક્ષેત્રો પર વધુ કેન્દ્રિત થવા જઈ રહી છે. G20 નાણા મંત્રીઓ અને સેન્ટ્રલ બેંક ગવર્નર્સની બેઠક દરમિયાન નાણામંત્રી નિર્મલા સીતારમણે વર્લ્ડ બેંક ગ્રુપના પ્રમુખ અજય બંગા સાથે મુલાકાત કરી હતી. બેઠકમાં ભારત-વર્લ્ડ બેંક સંબંધોને વધુ વ્યૂહાત્મક બનાવવાના મુદ્દે ચર્ચા થઈ હતી.
₹1.5 અબજ ડોલરના ડેવલપમેન્ટ ફાઇનાન્સિંગનો ઉલ્લેખ
નિર્મલા સીતારમણે ભારત સાથે વર્લ્ડ બેંક ગ્રુપના સતત સહયોગનું સ્વાગત કર્યું. તેમણે 1.5 અબજ ડોલરના ડેવલપમેન્ટ પોલિસી ફાઇનાન્સિંગની પ્રક્રિયા ઝડપી કરવા બદલ વર્લ્ડ બેંકનો આભાર માન્યો હતો. આ ઉપરાંત IFC દ્વારા SIDBI મારફતે MSME ક્ષેત્રને આપવામાં આવેલા સહયોગની પણ તેમણે પ્રશંસા કરી હતી.
ઈન્ફ્રાસ્ટ્રક્ચર માટે નવી ફાઇનાન્સિંગ સ્ટ્રેટેજી
બેઠકમાં ભારતમાં ઈન્ફ્રાસ્ટ્રક્ચર ક્ષેત્ર માટે સેક્ટર આધારિત અને પ્રોગ્રામેટિક અભિગમ અપનાવવા અંગે ચર્ચા થઈ. તેનો હેતુ અલગ-અલગ પ્રોજેક્ટને ફંડિંગ આપવાને બદલે મોટા ક્ષેત્રો માટે સંકલિત કાર્યક્રમો તૈયાર કરવાનો છે. અજય બંગાએ ભારતમાં ઈન્ફ્રાસ્ટ્રક્ચરમાં થયેલા મોટા ફેરફારોનો ઉલ્લેખ કર્યો અને ભારતની વિકાસલક્ષી મહત્વાકાંક્ષાઓને વધુ સહયોગ આપવા અંગે વાત કરી.
ખાનગી મૂડી લાવવા MIGAની ભૂમિકા વધશે
ભારતમાં મલ્ટિલેટરલ ઈન્વેસ્ટમેન્ટ ગેરંટી એજન્સી (MIGA)ની ભૂમિકા વધારવા અંગે પણ ચર્ચા થઈ. ગેરંટીનો વ્યવસ્થિત ઉપયોગ કરીને વધુ ખાનગી મૂડી આકર્ષવાનો પ્રયાસ કરવામાં આવશે. તેનાથી કોર્પોરેટ, ઈન્ફ્રાસ્ટ્રક્ચર અને મ્યુનિસિપલ બોન્ડ માર્કેટને મજબૂતી મળી શકે છે. વિદેશમાં રોકાણ કરતી ભારતીય કંપનીઓ માટે રાજકીય જોખમ વીમાના ઉપયોગ અંગે પણ ચર્ચા થઈ હતી.
ભારત બનાવશે ગ્લોબલ ડિજિટલ પબ્લિક ઈન્ફ્રાસ્ટ્રક્ચર હબ
નિર્મલા સીતારમણે ભારતમાં વર્લ્ડ બેંક ગ્રુપ સાથે મળીને ગ્લોબલ ડિજિટલ પબ્લિક ઈન્ફ્રાસ્ટ્રક્ચર નોલેજ હબ વિકસાવવાના કામનો ઉલ્લેખ કર્યો. આ હબ દ્વારા કૃષિ સહિત વિવિધ ક્ષેત્રોમાં ટેક્નોલોજીના ઉપયોગ અને ડિજિટલ સોલ્યુશન્સની શક્યતાઓ શોધવામાં આવશે. તેનું લોન્ચિંગ ટૂંક સમયમાં થવાની અપેક્ષા છે.
ટૂરિઝમ ક્ષેત્રને પણ મળશે નવી દિશા
નવી ભારત-વર્લ્ડ બેંક કન્ટ્રી પાર્ટનરશિપ ફ્રેમવર્ક હેઠળ વૈશ્વિક સ્તરે સ્પર્ધાત્મક ટૂરિઝમ ડેસ્ટિનેશન્સ વિકસાવવાનો પ્રસ્તાવ પણ મૂકવામાં આવ્યો છે. આ માટે IBRDની પોલિસી અને ઈન્ફ્રાસ્ટ્રક્ચર સહાય, IFCનું ખાનગી ક્ષેત્રનું રોકાણ અને MIGAની ગેરંટી—ત્રણેને એકસાથે જોડીને સંકલિત મોડલ વિકસાવવાની યોજના છે.
લોનથી આગળ હવે નોલેજ અને ઈનોવેશન પર ભાર
બંને પક્ષોએ ભારત-વર્લ્ડ બેંક સંબંધોને માત્ર પરંપરાગત નાણાકીય વ્યવહાર પૂરતા મર્યાદિત ન રાખીને ગ્લોબલ નોલેજ, ઈનોવેશન અને પ્રાઈવેટ કેપિટલ એકત્ર કરવાના વ્યૂહાત્મક પ્લેટફોર્મ તરીકે વિકસાવવા અંગે પણ ચર્ચા કરી. ભારતના મોટા પાયે કામ કરવાની ક્ષમતા અને વર્લ્ડ બેંકની વૈશ્વિક નિષ્ણાતીને જોડીને વિકાસના નવા મોડલ પર ભાર મૂકવામાં આવી રહ્યો છે.
