IDBI Bank : સરકારી બેન્ક IDBIમાં પોતાનો હિસ્સો વેચશે સરકાર, કેબિનેટ બેઠકમાં મળી મંજૂરી

IDBI Bank : કેન્દ્ર સરકારની કેબિનેટે બુધવારે IDBI બેન્કમાં હિસ્સેદારી વેચવાના પ્રસ્તાવને મંજૂરી આપી છે. આ સોદા હેઠળ કેનેડાની ફેયરફેક્સ ફાઈનાન્શિયલ હોલ્ડિંગ્સની પ્રવર્તક કંપની સાથે જોડાયેલી સંસ્થા ₹52,878 કરોડમાં બેન્કનો 60.72 ટકા હિસ્સો ખરીદશે. આ સોદો પૂર્ણ થયા બાદ ભારતીય બેન્કિંગ ક્ષેત્રમાં મોટું પરિવર્તન જોવા મળી શકે છે.

આ સોદા પછી પણ સરકાર અને LIC બેન્કમાં પોતાની ભાગીદારી જાળવી રાખશે

પ્રસ્તાવિત વ્યવહારમાં કેન્દ્ર સરકારનો 30.48 ટકા અને ભારતીય જીવન વીમા નિગમ (LIC)નો 30.24 ટકા હિસ્સો વેચવામાં આવશે. જોકે, આ સોદા પછી પણ સરકાર અને LIC બેન્કમાં પોતાની ભાગીદારી જાળવી રાખશે. સોદા બાદ સરકારનો હિસ્સો ઘટીને 15 ટકા અને LICનો હિસ્સો આશરે 19 ટકા રહેવાની શક્યતા છે. કેન્દ્રીય નાણામંત્રી નિર્મલા સીતારમણે આ પ્રક્રિયાને માત્ર ‘વ્યૂહાત્મક વિનિયોજન’ નહીં, પરંતુ ‘વ્યૂહાત્મક પુનર્ગઠન’ ગણાવ્યું છે. નાણાં મંત્રાલયના જણાવ્યા અનુસાર, આ સોદા માટે બે તબક્કાની સ્પર્ધાત્મક બિડિંગ પ્રક્રિયા હાથ ધરવામાં આવી હતી. સમગ્ર પ્રક્રિયામાં આંતર-મંત્રાલય જૂથ, વિનિયોજન અંગેના સચિવોના કોર જૂથ અને કેબિનેટ મંત્રીઓના અધિકૃત જૂથ સહિતની વિવિધ સમિતિઓની ભૂમિકા રહી હતી.

નિયમનકારી શરતો પૂર્ણ કરવા માટેનો રોડમૅપ પણ આપવો પડશે

બે સ્વતંત્ર વ્યાવસાયિક મૂલ્યાંકન એજન્સીઓએ બેન્કના શેરનું યોગ્ય મૂલ્ય સરેરાશ ₹75.99 પ્રતિ શેર નક્કી કર્યું હતું. તેની સામે ફેયરફેક્સે પ્રતિ શેર ₹81ની સફળ બિડ રજૂ કરી હતી. આ બિડ મૂલ્યાંકનના માપદંડ કરતાં ઊંચી હોવાથી તેને યોગ્ય ગણવામાં આવી હતી. જોકે, સોદાની પ્રક્રિયા પૂર્ણ કરવા માટે સફળ બિડરે ભારતીય રિઝર્વ બેંક (RBI) સમક્ષ પોતાની યોગ્યતા અંગેના પુરાવા રજૂ કરવા પડશે અને નિયમનકારી શરતો પૂર્ણ કરવા માટેનો રોડમૅપ પણ આપવો પડશે. આ તમામ પ્રક્રિયા પૂર્ણ થયા બાદ આ વ્યવહાર ભારતના નાણાકીય ક્ષેત્રમાં અત્યાર સુધીના સૌથી મોટા વિદેશી સીધા રોકાણ (FDI) પૈકીનો એક બનવાની અપેક્ષા છે.

નોંધ - શેરબજાર કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ જરૂર લેવી.

આ પણ વાંચો : Business : ગુજરાતમાં ઈલેક્ટ્રિક ટ્રકના ઉપયોગ માટે અદાણી લોજિસ્ટિક્સની વૈશ્વિક શિપિંગ જૂથ CMA CGM સાથે ભાગીદારી