CBDTનો મોટો નિર્ણય, ટેક્સ ઓડિટ રિપોર્ટની સમયમર્યાદા 21 ઓક્ટોબર સુધી લંબાવાઈ

CBDT’s Big Decision: ટેક્સપેયર્સ માટે મોટી રાહતના સમાચાર સામે આવ્યા છે. સેન્ટ્રલ બોર્ડ ઓફ ડાયરેક્ટ ટેક્સિસ (CBDT)એ એસેસમેન્ટ વર્ષ 2026-27 માટે ટેક્સ ઓડિટ રિપોર્ટ અને ઈન્કમ ટેક્સ રિટર્ન (ITR) ભરવાની સમયમર્યાદામાં વધારો કર્યો છે. જે ટેક્સપેયર્સના ખાતાઓનું આવકવેરા કાયદા હેઠળ ફરજિયાત ઓડિટ કરાવવાનું હોય છે, તેમના માટે ITR ભરવાની અંતિમ તારીખ 31 ઓક્ટોબરથી વધારીને 21 નવેમ્બર 2026 કરવામાં આવી છે.

સમયમર્યાદા વધારવાની માગ કરાઈ હતી

CBDTના સત્તાવાર નિવેદન અનુસાર, ટેક્સ ઓડિટ રિપોર્ટ જમા કરવાની સમયમર્યાદા પણ 30 સપ્ટેમ્બરથી વધારીને 21 ઓક્ટોબર 2026 કરવામાં આવી છે. આ અંગેની ઔપચારિક સૂચના અલગથી જાહેર કરવામાં આવશે. છેલ્લા કેટલાક સમયથી ચાર્ટર્ડ એકાઉન્ટન્ટ્સના સંગઠનો અને ટેક્સ નિષ્ણાતો દ્વારા સમયમર્યાદા વધારવાની માગ કરવામાં આવી રહી હતી. ઓડિટ પ્રક્રિયા પૂર્ણ કરવા, નાણાકીય અને ટેક્સ રેકોર્ડ્સનું મિલાન કરવા તેમજ જરૂરી ડિસ્ક્લોઝરનું વેરિફિકેશન કરવા માટે વધુ સમયની જરૂરિયાત હોવાનું જણાવાયું હતું.

ITR સબમિટ કરવામાં વધુ સમય મળશે

CBDTના આ નિર્ણયથી ટેક્સપેયર્સ અને ઓડિટરોને જરૂરી ઓડિટ પ્રક્રિયા પૂર્ણ કરવા તેમજ ઈ-ફાઇલિંગ પોર્ટલ પર રિપોર્ટ અને ITR દાખલ કરવા માટે વધારાનો સમય મળશે. આ નિર્ણયથી ટેક્સ કમ્પ્લાયન્સ પ્રક્રિયા સરળ બનવાની અપેક્ષા છે. આ દરમિયાન, સરકારના સીધા કરવેરા સંગ્રહમાં પણ વધારો નોંધાયો છે. 1 એપ્રિલથી 17 સપ્ટેમ્બર દરમિયાન નેટ ડાયરેક્ટ ટેક્સ કલેક્શન 13 ટકા વધીને રૂ. 12.12 લાખ કરોડથી વધુ થયું છે.

STT કલેક્શનમાં 53 ટકાનો વધારો

જ્યારે ગ્રોસ ડાયરેક્ટ ટેક્સ કલેક્શન 15 ટકાથી વધુ વધીને રૂ. 14.3 લાખ કરોડ સુધી પહોંચ્યું છે. આ સમયગાળા દરમિયાન કોર્પોરેટ ટેક્સ કલેક્શન 19.48 ટકા વધીને આશરે રૂ. 5.56 લાખ કરોડ થયું છે. વ્યક્તિગત આવકવેરા અને HUFમાંથી મળેલી રકમ 6 ટકા વધીને રૂ. 6.16 લાખ કરોડથી વધુ રહી છે. સિક્યોરિટીઝ ટ્રાન્ઝેક્શન ટેક્સ (STT) કલેક્શનમાં પણ 53 ટકાનો વધારો થયો છે. જ્યારે ટેક્સ રિફંડની રકમ 29 ટકાથી વધુ વધીને રૂ. 2.2 લાખ કરોડને પાર પહોંચી છે.

આ પણ વાંચો: G20 વેપાર મંત્રીઓની બેઠકમાં ભાગ લેવા અમેરિકા જશે પીયૂષ ગોયલ, ભારત-અમેરિકા BTA પર પણ થશે ચર્ચા