Surat News : સુરતના પુણાગામમાં રસ્તાના કામ મુદ્દે રહીશોનો વિરોધ, અધૂરા ડિમોલેશન બાદ રસ્તો નહીં બન્યાનો આક્ષેપ

Surat News : પુણાગામ સ્થિત માતૃશક્તિ, નંદનવન, દીપમાલા સહિત વિવિધ સોસાયટીના રહીશોએ રસ્તાના અધૂરા કામ અને પાલિકાની કામગીરી સામે વિરોધ નોંધાવ્યો છે. રહીશોના આક્ષેપ મુજબ, રસ્તો ખુલ્લો કરવા માટે સુરત મહાનગરપાલિકા દ્વારા ડિમોલેશનની કામગીરી કરવામાં આવી હતી, પરંતુ ત્યારબાદ અધૂરું ડિમોલેશન કરીને રસ્તો બનાવવાની કામગીરી આગળ વધારવામાં આવી નથી.

પુણાગામમાં રહીશોએ નોંધાવ્યો વિરોધ

સ્થાનિક રહીશોનું કહેવું છે કે, રસ્તાની સમસ્યાને લઈને તેઓ દ્વારા વારંવાર સુરત મહાનગરપાલિકામાં રજૂઆતો કરવામાં આવી છે. તેમ છતાં અત્યાર સુધી આ સમસ્યાનો કાયમી ઉકેલ આવ્યો નથી. રસ્તો ખુલ્લો કરવાની કામગીરી પૂર્ણ ન થતાં સોસાયટીમાં રહેતા લોકોને અવરજવરમાં મુશ્કેલીનો સામનો કરવો પડી રહ્યો છે. રહીશોએ ખાસ કરીને રસ્તાની વચ્ચે આવેલા વીજપોલને લઈને ગંભીર ચિંતા વ્યક્ત કરી છે.

તેમના જણાવ્યા અનુસાર, રસ્તાની વચ્ચે વીજપોલ હોવાને કારણે વાહનચાલકો માટે અવરજવર મુશ્કેલ બની રહી છે. ખાસ કરીને રાત્રિના સમયે પૂરતી દૃશ્યતા ન હોવાને કારણે અકસ્માત સર્જાવાની ભીતિ રહે છે. આ પરિસ્થિતિને કારણે સ્થાનિક લોકોમાં અસુરક્ષાની લાગણી જોવા મળી રહી છે.

કોર્પોરેશન સામે સ્થાનિકોનો વિરોધ

આ મુદ્દે માતૃશક્તિ, નંદનવન અને દીપમાલા સહિતની સોસાયટીના રહીશો એકત્ર થયા હતા અને વિરોધ નોંધાવ્યો હતો. રહીશોની માંગ છે કે પાલિકા દ્વારા અગાઉ કરવામાં આવેલી ડિમોલેશનની કામગીરી પૂર્ણ કરવામાં આવે અને રસ્તો વહેલી તકે બનાવવામાં આવે. સાથે જ રસ્તાની વચ્ચે રહેલા વીજપોલને યોગ્ય રીતે ખસેડવા અથવા સલામતીની જરૂરી વ્યવસ્થા કરવા માટે પણ પગલાં લેવામાં આવે.

સ્થાનિક રહીશોનું કહેવું છે કે, વારંવાર રજૂઆત કરવા છતાં સમસ્યાનો ઉકેલ ન આવતાં હવે તેઓએ વિરોધનો માર્ગ અપનાવ્યો છે. જો સમયસર રસ્તાની કામગીરી પૂર્ણ કરવામાં નહીં આવે તો લોકોને રોજિંદી અવરજવરમાં વધુ મુશ્કેલીનો સામનો કરવો પડી શકે છે.

આ પણ વાંચો : Surat Crime News : સુરતના કતારગામમાં ચકચાર, ગોટાલાવાડી કબ્રસ્તાનમાંથી પુરુષનું માથા વગરનું ધડ મળ્યું