Junagadh News: મુખ્ય માર્ગો પર સલામતી સમિતિનું ચેકિંગ, ટ્રાફિક સમસ્યા અને અકસ્માતના જોખમનો તાગ મેળવાયો

Junagadh News: જૂનાગઢ શહેરમાં વધતી ટ્રાફિક સમસ્યા અને માર્ગ સલામતીના મુદ્દે સલામતી સમિતિ દ્વારા શહેરના મુખ્ય માર્ગો પર સર્વે અને ચેકિંગ હાથ ધરવામાં આવ્યું હતું. આ કામગીરી દરમિયાન માર્ગો પરના ડિવાઈડર, સ્પીડ બ્રેકર પરના પટ્ટા અને રોડ સાઈડ માર્કિંગની સ્થિતિની સમીક્ષા કરવામાં આવી હતી. સર્વેના આધારે સંબંધિત વિભાગોને રિપોર્ટ સોંપવામાં આવશે.

શાળાઓને જોડતા માર્ગોનું નિરીક્ષણ

શહેરના મોતીબાગ વિસ્તાર પાસે આવેલી શાળાઓને જોડતા મુખ્ય માર્ગોનું ખાસ નિરીક્ષણ કરવામાં આવ્યું હતું. યુવનગર બાયપાસને જોડતો માર્ગ અને કોલેજ રોડ સહિતના રસ્તાઓનો સર્વે કરાયો હતો. આ માર્ગો પર દરરોજ હજારો વિદ્યાર્થીઓ અવરજવર કરતા હોવાથી માર્ગ સલામતીની સમસ્યાઓનું તાત્કાલિક નિવારણ કરવું જરૂરી બન્યું છે. સર્વે દરમિયાન રસ્તા પરના ડિવાઈડર, સ્પીડ બ્રેકર પરના ચિહ્નો અને માર્ગ પરના માર્કિંગની સ્થિતિ તપાસવામાં આવી હતી. વાહનચાલકોને માર્ગની સ્થિતિ સ્પષ્ટ દેખાય અને અકસ્માતનું જોખમ ઘટે તે માટે જરૂરી સુધારાઓ અંગે અહેવાલ તૈયાર કરવામાં આવશે.

ફૂટપાથ પર પાર્કિંગથી ટ્રાફિકની સમસ્યા

નિરીક્ષણ દરમિયાન ફૂટપાથ પર ગેરકાયદે પાર્કિંગ તેમજ રોડ કિનારે આવેલા ગેરેજો દ્વારા વાહનો આડેધડ રાખવામાં આવતાં હોવાની સમસ્યા પણ સામે આવી હતી. તેના કારણે ટ્રાફિક અવરોધ સર્જાવાની સાથે રાહદારીઓ અને વાહનચાલકો માટે અકસ્માતનું જોખમ વધતું હોવાનું ધ્યાન પર આવ્યું હતું.

વિવિધ વિભાગો દ્વારા સંયુક્ત સર્વે

આ કામગીરીમાં RTO, મહાનગરપાલિકા અને ટ્રાફિક પોલીસના અધિકારીઓએ સંયુક્ત રીતે ભાગ લીધો હતો. શહેરના વ્યસ્ત માર્ગો પર ટ્રાફિક વ્યવસ્થા સુધારવા અને માર્ગ સલામતી વધારવા માટે સંબંધિત મુદ્દાઓની નોંધ લેવામાં આવી હતી. હવે સર્વેના આધારે તૈયાર થનારા અહેવાલમાં જરૂરી સુધારાત્મક પગલાં સૂચવવામાં આવશે. ખાસ કરીને શાળાઓ પાસેના માર્ગો પર વિદ્યાર્થીઓની સુરક્ષા, ફૂટપાથ પરથી અડચણો દૂર કરવી અને માર્ગ પરનાં સલામતી ચિહ્નો સુધારવા જેવા મુદ્દાઓ પર તાત્કાલિક કાર્યવાહી જરૂરી છે. આ પગલાંથી જૂનાગઢમાં ટ્રાફિક વ્યવસ્થા વધુ સુવ્યવસ્થિત બનવાની અને અકસ્માતના જોખમમાં ઘટાડો થવાની આશા છે.

આ પણ વાંચો: Surat News: અડાજણમાં વેપારી પાસેથી રૂપિયા 3.75 લાખની લૂંટનો ભેદ ઉકેલાયો, 4 આરોપીઓ ઝડપાયા