Vibrant Gujarat 2027: રોકાણ આકર્ષવા સરકારનું મેગા પ્લાનિંગ, 22 દેશ અને 8 શહેરોમાં યોજાશે રોડ-શો

Vibrant Gujarat 2027: ઉચ્ચસ્તરીય પ્રતિનિધિમંડળ ઓક્ટોબર-નવેમ્બરમાં ઓસ્ટ્રેલિયા, ન્યુઝીલેન્ડ, ફ્રાન્સ, જર્મની, નેધરલેન્ડ, ફિનલેન્ડ, ડેનમાર્ક, સ્વીડન, પોલેન્ડ, જાપાન, દક્ષિણ કોરિયા, વિયેટનામ, મલેશિયા, ઈન્ડોનેશિયા, સિંગાપોર, રશિયા, UAE, કતાર,ઓમાન, કેન્યા, ટાન્ઝાનિયા અને મોઝામ્બિકમાં ઈન્ડસ્ટ્રીઝ દિગ્ગજો સાથે મુલાકાત કરશે.

દેશમાં ગુવાહાટી,લખનઉ,બેંગાલુરુ, હૈદ્રાબાદ, ચેન્નાઈ,કોલકતા, જયપુર અને ભુવનેશ્વરમાં રોડ-શોનું આયોજન

ગુજરાતના વિકાસની વિકાસગાથાને વિશ્વ સમક્ષ લઈ જવાના ઉદ્દેશ્ય સાથે, ગુજરાત સરકારે 'વાઈબ્રન્ટ ગુજરાત ગ્લોબલ સમિટ' (VGGS 2027)ની 11મી આવૃત્તિ પહેલાં રોકાણ આકર્ષવા માટે વ્યાપક સ્તરે અભિયાન શરૂ કર્યું છે. ઓક્ટોબર અને નવેમ્બર 2026 દરમિયાન, ઉચ્ચ સ્તરીય પ્રતિનિધિમંડળ અલગ-અલગ 22 દેશની મુલાકાતે જશે, આ સાથે જ ભારતભરના 8 શહેરોમાં રોડ-શોનું આયોજન કરવામાં આવ્યું છે.

'વિકસિત ગુજરાત – શેપિંગ ગ્લોબલ ફ્યુચર' થીમ પર આધારિત આ સમિટનું આયોજન 10 થી 12 જાન્યુઆરી 2027 દરમિયાન ગાંધીનગરના મહાત્મા મંદિર ખાતે યોજાશે. સમગ્ર વાઈબ્રન્ટ ગુજરાત ગ્લોબલ સમિટનું આયોજન ગુજરાત સરકારના ઉદ્યોગ વિભાગના એકમ 'ઈન્ડસ્ટ્રિયલ એક્સ્ટેન્શન બ્યુરો' એટલેકે iNDEXTb હેઠળ કરવામાં આવશે.

ઉચ્ચ-સ્તરીય પ્રતિનિધિમંડળે USA અને કેનેડાની મુલાકાત લીધી

વાઈબ્રન્ટ ગુજરાત ગ્લોબલ સમિટ 2027ના અભિયાનની શરુઆત ઓગસ્ટ 2026થી જ શરુ કરી દેવામાં આવી છે, મુખ્યમંત્રી ભૂપેન્દ્રભાઈ પટેલના નેતૃત્વમાં ઉચ્ચ-સ્તરીય પ્રતિનિધિમંડળે USA અને કેનેડાની મુલાકાત લીધી હતી, જ્યાં તેમણે સાન ફ્રાન્સિસ્કો, વોશિંગ્ટન ડીસી અને ટોરોન્ટોમાં ટેક્નોલોજી સાથે અન્ય ક્ષેત્રના અગ્રણીઓ, રોકાણકારો અને ઉદ્યોગ સંગઠનો સાથે મુલાકાત કરી હતી.

30 ઓગસ્ટના રોજ નવી દિલ્હીમાં આયોજિત 'વાઈબ્રન્ટ ગુજરાત ગ્લોબલ સમિટ (VGGS) 2027'ના કર્ટન રેઈઝર ઈવેન્ટ દરમિયાન, ગુજરાતના મુખ્યમંત્રી ભૂપેન્દ્રભાઈ પટેલે જણાવ્યું હતું કે, પ્રધાનમંત્રી નરેન્દ્ર મોદીના નેતૃત્વમાં શરૂ થયેલી આ સમિટ વૈશ્વિક રોકાણકારોના વિશ્વાસનું પ્રતીક અને જ્ઞાનના આદાન-પ્રદાન માટેનું એક મોટું પ્લેટફોર્મ બની ગઈ છે. તેમને કહ્યું કે ગુજરાતે પરંપરાગત ઉદ્યોગોમાં પોતાની ક્ષમતા સાબિત કરી છે. હવે રાજ્ય ભવિષ્યના ઉદ્યોગોમાં અગ્રેસર બનવા માટે સજ્જ થઈ રહ્યું છે. અને ગુજરાત આજે આવતીકાલનું નિર્માણ કરી રહ્યું છે. VGGS 2027 પ્રધાનમંત્રીના 'સપ્તધારા' વિઝનને નવી તાકાત અને ઉર્જા આપી રહ્યું છે. આ ઈવેન્ટ વિજ્ઞાન, ટેકનોલોજી આજીવિકા, ખાદ્ય અને ઉર્જા સુરક્ષા દ્વારા યુવાનો માટે નવી તક ઉભી કરશે.

સેમિકન્ડક્ટરથી લઈને બંદરો સુધીના વિવિધ ક્ષેત્રમાં ગુજરાત રોકાણકારોની પ્રથમ પસંદગી

આ ઈવેન્ટમાં નાયબ મુખ્યમંત્રી હર્ષ સંઘવીએ જણાવ્યું હતું કે, સેમિકન્ડક્ટરથી લઈને બંદરો સુધીના વિવિધ ક્ષેત્રમાં ગુજરાત રોકાણકારોની પ્રથમ પસંદગી બન્યું છે, ગુજરાત રોકાણકારો માટે છેલ્લા 25 વર્ષથી રોકાણકારોના વિશ્વાસને પ્રતિબિંબિત કરે છે. નાયબ મુખ્યમંત્રી હર્ષ સંઘવીએ ખાતરી આપી હતી કે રાજ્યમાં કરવામાં આવેલું દરેક રોકાણ સુરક્ષિત છે અને તેની સાથ જ રોકાણ પર યોગ્ય વળતર મળવાની સંપૂર્ણ ખાતરી છે.

VGGS-2027ના પ્રચાર માટે મુંબઈમાં આયોજિત રોડ-શો દરમિયાન, મુખ્યમંત્રી ભૂપેન્દ્રભાઈ પટેલે ભારત અને વિદેશના ઉદ્યોગપતિઓ તથા રોકાણકારોને આહ્વાન કર્યું કે તેઓ "ગુજરાતમાં આવે, ગુજરાતમાં વિકાસ કરે અને ગુજરાતની સાથે આગળ વધે."

'વાઈબ્રન્ટ ગુજરાત ગ્લોબલ સમિટ'નું આયોજન દર 2 વર્ષે કરવામાં આવે છે. આ આયોજનની શરૂઆત અને કલ્પના વર્ષ 2003માં આપણા પ્રધાનમંત્રી નરેન્દ્ર મોદી જયારે ગુજરાતના મુખ્યમંત્રી હતા ત્યારે તેમના દ્વારા કરવામાં આવી હતી. આ સમિટની શરૂઆત થયાના છેલ્લા 2 દાયકાથી વધુના સમયગાળામાં વિવિધ દેશના રાષ્ટ્રાધ્યક્ષો, CEOs, નીતિઓ બનાવનાર આગેવાનો, વિવિધ સંસ્થાઓ અને રોકાણકારોને ગુજરાત અને ભારતની પ્રગતિ માટે ભાગીદારી વધારવાના ઉદ્દેશ્ય સાથે એક મંચ પર એકત્રિત કર્યા છે.

22 દેશમાંથી રોકાણ આકર્ષવા ખાસ ફોક્સ

ઉચ્ચ સ્તરીય પ્રતિનિધિમંડળ (ડેલીગેશન) ઓસ્ટ્રેલિયા, ન્યુઝીલેન્ડ, ફ્રાન્સ, જર્મની,નેધરલેન્ડ, ફિનલેન્ડ, ડેનમાર્ક, સ્વીડન, પોલેન્ડ, જાપાન, દક્ષિણ કોરિયા, વિયેટનામ, મલેશિયા, ઈન્ડોનેશિયા, સિંગાપોર, રશિયા, UAE, કતાર,ઓમાન, કેન્યા, ટાન્ઝાનિયા અને મોઝામ્બિકની મુલાકાત લેશે. આ પ્રતિનિધિમંડળ દરેક દેશમાં સેક્ટર આધારિત રાઉન્ડ ટેબલ બેઠકનું આયોજન કરશે. આ સાથે જ અગ્રણી કંપનીઓ, સંસ્થાકીય રોકાણકારો અને ઉદ્યોગ સંગઠનો સાથે વ્યક્તિગત બેઠકો કરશે. આ બેઠકની સાથે જ તેઓ ઉદ્યોગ અગ્રણીઓને જાન્યુઆરીમાં યોજાનારી VGGS 2027માં ઉપસ્થિત રહેવા માટે આમંત્રત પાઠવશે.

આ મુલાકાત દરમિયાન પ્રતિનિધિમંડળો બહુરાષ્ટ્રીય કંપનીઓ, રોકાણકારો, સરકારી એજન્સીઓ, ચેમ્બર ઓફ કોમર્સ, વેપારી સંગઠનો અને ભારતીય પ્રવાસી સમુદાયના સભ્યો સાથે વાતચીત કરશે. વાતચીતના આ આદાનપ્રદાનથી સમિટમાં ભાગીદારી વધારવા પ્રોત્સાહન મળશે, આ સાથે જ આ મુલાકાતોમાં એ પણ દર્શાવાશે કે કેવી રીતે ભારતે મુક્ત વેપાર કરારોનું નેટવર્ક વધાર્યુ છે. ભારતે ભારતે મુક્ત વેપાર કરારોનું નેટવર્ક વધાર્યુ છે તેમાં સંયુક્ત આરબ અમીરાત (UAE), ઓસ્ટ્રેલિયા, ન્યુઝીલેન્ડ, યુકે, EFTA (European Free Trade Association) દેશો અને યુરોપિયન યુનિયન સાથેના કરારોનો સમાવેશ થાય છે. આ સાથે જ ડેલીગેશન રોકાણકારોને એ પણ સમજાવશે કે આ કરાત કેવી રીતે વેપાર અને રોકાણ માટે નવી તકોનું સર્જન કરી રહ્યા છે.

ગિફ્ટ સિટી ભારતનું આંતરરાષ્ટ્રીય ફાઈનાન્શિયલ સર્વિસ હબ બન્યું

રોકાણની તકોનો લાભ લેવા માટે ગુજરાત એક સર્વ બેસ્ટ સ્થળ તરીકે ઉભરી આવ્યું છે. ગુજરાત પાસે ભારતની સૌથી મોટી બંદર ક્ષમતા અને મહત્વપૂર્ણ વૈશ્વિક વેપાર માર્ગો પર સ્થિત વ્યૂહાત્મક દરિયાકિનારો છે. ગુજરાતમાં દિલ્હી-મુંબઈ ઈન્ડસ્ટ્રિયલ કોરિડોર (DMIC) અને ધોલેરા જેવા વિશ્વસ્તરીય ઔદ્યોગિક પાર્ક અને કોરિડોર આવેલા છે. ગિફ્ટ સિટી (GIFT City) ભારતનું આંતરરાષ્ટ્રીય ફાઈનાન્શિયલ સર્વિસ હબ બન્યું છે. રાજ્યમાં સેમિકન્ડક્ટર અને ઇલેક્ટ્રોનિક્સની ઈકોસિસ્ટમ ઝડપથી વિકસી રહી છે. પુનઃપ્રાપ્ય ઊર્જા ક્ષેત્રે ગુજરાત અગ્રેસર છે. આ સાથે જ મજબૂત 'સિંગલ-વિન્ડો' ક્લીયરન્સ દ્વારા રોકાણકારો માટે અનુકૂળ અને સ્થિર વાતાવરણ અહીં પુરુ પાડવામાં આવી રહ્યું છે.

પ્રતિનિધિમંડળની આ મુલાકાત પાછળનો ઉદ્દેશ એ દર્શાવવાનો છે કે ગુજરાતના વૈશ્વિક સ્તરે વખાણાયેલા આ પ્લેટફોર્મ દ્વારા વિકાસના ભવિષ્યને આકાર આપવા માટે સરકાર, ઉદ્યોગકારો, રોકાણકારો અને વિચારશીલ નેતાઓને એકસાથે લાવવાનો છે.

ભવિષ્યના ઉભરતા સેક્ટર પર ખાસ ભાર

આ વખતની સમિટમાં ભવિષ્યના ઉભરતા સેક્ટર પર ખાસ ભાર મુકવામાં આવશે. જેમાં સેમિકન્ડક્ટર, આર્ટિફિશિયલ ઇન્ટેલિજન્સ (AI), ફિનટેક, ગ્રીન એનર્જી ઈકોસિસ્ટમ, ડેટા સેન્ટર્સ અને સ્પેસ ટેકનોલોજીનો સમાવેશ થાય છે. આમાંથી અનેક ક્ષેત્રોમાં ગુજરાતમાં પહેલેથી જ મજબૂત આધાર રહેલો છે.

સેમિકન્ડક્ટર્સ

2026માં, સાણંદ ભારતનું સૌથી વ્યસ્ત સેમિકન્ડક્ટર ક્લસ્ટર બન્યું છે. ફેબ્રુઆરીમાં માઇક્રોન (Micron) ની એસેમ્બલી અને ટેસ્ટ સુવિધાનું અને માર્ચમાં કેન્સ સેમિકોન (Kaynes Semicon) ના OSAT યુનિટનું ઉદ્ઘાટન કરવામાં આવ્યું હતું, જ્યારે CG પાવર–રેનેસાસ (CG Power–Renesas) નો OSAT પ્રોજેક્ટ હાલમાં પ્રગતિ હેઠળ છે. ધોલેરામાં ટાટા ઇલેક્ટ્રોનિક્સ તાઈવાનની પાવરચિપ સેમિકન્ડક્ટર મેન્યુફેક્ચરિંગ કોર્પોરેશન (PSMC) સાથે મળીને ભારતનો પ્રથમ વ્યાવસાયિક સેમિકન્ડક્ટર ફેબ (fab) શરુ કરવા જઈ રહ્યું છે, જેમાં ડચ કંપની ASML સાધનો અને ટેક્નોલોજી ભાગીદાર તરીકે જોડાયેલી છે.

ફિનટેક અને ડેટા સેન્ટર્સ

ભારતનું પ્રથમ ઈન્ટરનેશનલ ફાઈનાન્શિયલ સર્વિસિસ સેન્ટર, ગિફ્ટ સિટી મુખ્ય મથક છે. અહીં 1,000 થી વધુ સંસ્થાઓ કાર્યરત છે, જે 20,000 થી વધુ લોકોને રોજગારી આપે છે. આ સાથે જ 38 બેન્ક USD 100 અબજ ડોલર જેટલી મિલ્કતોનું સંયુક્ત સંચાલન કરે છે. એક જ રેગ્યુલેટર, IFSCA, સિંગલ-વિન્ડો ક્લિયરન્સ અને તૈયાર માળખાગત સુવિધાઓ રોકાણને વધુ સરળ બનાવે છે. ગિફ્ટ સિટીની યુટિલિટી ટનલ, સિટી કમાન્ડ અને કંટ્રોલ સેન્ટર, આ સાથે જ ભારતની પ્રથમ ડિસ્ટ્રિક્ટ કૂલિંગ સિસ્ટમ ફિનટેક અને ડેટા સેન્ટર રોકાણકારોને ભવિષ્ય માટે તૈયાર બેઝ પુરુ પાડી રહ્યું છે.

ગ્રીન એનર્જી

કચ્છના ખાવડામાં આવેલ રિન્યુએબલ એનર્જી પાર્ક વિશ્વના સૌથી મોટા એનર્જી પૈકીનો એક છે. આ પાર્ક 72,000 હેક્ટરથી વધુ વિસ્તારમાં ફેલાયેલો છે. 37 ગીગાવોટ (GW) ની ક્ષમતા ધરાવતો આ સોલર-વિન્ડ હાઈબ્રિડ પાર્ક, સંપૂર્ણ રીતે કાર્યરત થયા બાદ લગભગ 1.8 કરોડ (18 મિલિયન) ઘરોને વીજળી પૂરી પાડશે. સ્વચ્છ ઉર્જાને લઈ ગુજરાતનો માળખાકીય આધાર પહેલાંથી જ મજબૂત છે. MNRE (નવી અને નવીનીકરણીય ઊર્જા મંત્રાલય) અનુસાર, ડિસેમ્બર 2025 સુધીમાં રાજ્યની સ્થાપિત રિન્યુએબલ એનર્જી ક્ષમતા 52.61 ગીગાવોટ (GW) છે , જે ભારતની કુલ રિન્યુએબલ એનર્જી ક્ષમતાના લગભગ 18% જેટલી છે.

VGGS 2027નો ઉદ્દેશ્ય મોટા રોકાણને સંપૂર્ણ ઈકોસિસ્ટમમાં પરિવર્તિત કરીને સપ્લાયર્સ, ટેક્નોલોજી ભાગીદારો અને કુશળ પ્રતિભાઓને આકર્ષી ખેંચી લાવી લાવવાનો છે. આંતરરાષ્ટ્રીય મુલાકાતો સિવાય ગુવાહાટી, લખનૌ, બેંગલુરુ, હૈદરાબાદ, ચેન્નાઈ, કોલકાતા, ભુવનેશ્વર અને જયપુરમાં રોડ શોનું આયોજન કરવામાં આવ્યું છે. આ રોડ-શો દ્વારા જે તે રાજયમાં કાર્યરત ભારતીય અને બહુરાષ્ટ્રીય કંપનીઓ સુધી પહોંચવામાં આવશે. ભૂતકાળમાં આવા આયોજન પહેલાં યોજાયેલા રોડ-શો ગુજરાતને ભારતના પસંદગીના રોકાણ સ્થળોમાંથી એક બનાવવાનું મુખ્ય કારણ રહ્યા છે.

વાઈબ્રન્ટ ગુજરાતના બે દાયકા

'વાઈબ્રન્ટ ગુજરાત'ની શરૂઆત 2003માં પ્રધાનમંત્રી નરેન્દ્ર મોદી દ્વારા કરવામાં આવી હતી, જયારે તે ગુજરાતના મુખ્યમંત્રી હતા. પ્રથમ આયોજનમાં લગભગ 100 જેટલા ભાગીદાર હતા. 2003થી જ વાઈબ્રન્ટ ગુજરાત ગ્લોબલ સમિટ વિશ્વના અગ્રણી રોકાણ સંમેલનો પૈકીના એક સમિટ તરીકે વિકસ્યું છે.

જાન્યુઆરી 2024માં યોજાયેલા 10મા સંસ્કરણમાં થયેલ ભાગીદારી પર નજર કરીએ તો 140થી વધુ દેશોમાંથી 61,000થી વધુ પ્રતિનિધિઓ અને 30થી વધુ ભાગીદાર દેશ હતા. VGGS 2027નો ઉદ્દેશ્ય વધુ વ્યાપ અને વધુમાં વધુ સહભાગિતા દ્વારા આર્થિક પ્રભાવની દ્રષ્ટિએ વધુ આગળ વધવાનો છે.

આ પણ વાંચો: EDII ખાતે 'ઝણકાર 26' ગરબા રાત્રિનું ભવ્ય આયોજન, 17 દેશના 68 આંતરરાષ્ટ્રીય પ્રતિનિધિઓ ગરબે ઘૂમ્યા