Aravalli News: મોડાસામાં બાઈકમાંથી પેટ્રોલ ચોરી કરતી ગેંગ સક્રિય! ત્રણ શખ્સો CCTVમાં કેદ

Aravalli News: અરવલ્લી જિલ્લાના મોડાસા શહેરમાં બાઈકમાંથી પેટ્રોલ ચોરી કરવાની ઘટના સામે આવતા વાહનચાલકોમાં ચિંતા જોવા મળી રહી છે. શહેરમાં જૈન દેરાસર પાસે વિશાનીમા પંચની વાડી નજીક પાર્ક કરેલી બાઈકમાંથી પેટ્રોલની ચોરી કરવામાં આવી હતી. આ સમગ્ર ઘટના નજીકમાં લગાવવામાં આવેલા CCTV કેમેરામાં કેદ થઈ છે.

બાઈકમાંથી પેટ્રોલની ચોરી કરી હોવાનો આક્ષેપ

પ્રાપ્ત માહિતી અનુસાર, મોડાસામાં જૈન દેરાસર પાસે વિશાનીમા પંચની વાડી નજીક એક બાઈક પાર્ક કરવામાં આવી હતી. દરમિયાન મોપેડ પર આવેલા ત્રણ શખ્સોએ તકનો લાભ લઈને પાર્ક કરેલી બાઈકમાંથી પેટ્રોલની ચોરી કરી હોવાનો આક્ષેપ છે. શખ્સોની આ હરકત નજીકમાં લાગેલા CCTV કેમેરામાં કેદ થઈ હતી. CCTV ફૂટેજમાં ત્રણ શખ્સો મોપેડ પર આવતા અને પાર્ક કરેલી બાઈકમાંથી પેટ્રોલ ચોરી કરતા હોવાના દૃશ્યો સામે આવ્યા છે. જાહેર વિસ્તારમાં આ રીતે પેટ્રોલની ચોરીની ઘટના બનતાં સ્થાનિકોમાં રોષ જોવા મળી રહ્યો છે.

શખ્સો કોઈના ડર વિના ચોરી કરતા હોય તેવા દૃશ્યો સામે આવતાં શહેરમાં વાહનોની સુરક્ષા અંગે પણ સવાલો ઊભા થયા છે. શહેરમાં વાહનોમાંથી પેટ્રોલની ચોરી જેવી ઘટનાઓ વાહનચાલકો માટે મુશ્કેલી ઊભી કરી શકે છે. ખાસ કરીને જાહેર સ્થળોએ વાહનો પાર્ક કરતી વખતે આવી ઘટનાઓનો ભોગ ન બનવું પડે તે માટે લોકોમાં સતર્કતા જરૂરી બની છે.

કડક કાર્યવાહી થાય તેવી સ્થાનિકોને આશા

આ ઘટનાના CCTV ફૂટેજના આધારે પેટ્રોલ ચોરી કરનારા શખ્સોની ઓળખ કરવામાં આવે અને તેમની સામે કાયદેસરની કાર્યવાહી હાથ ધરવામાં આવે તેવી માગ ઊઠી રહી છે. જોકે, આ મામલે પોલીસ દ્વારા કોઈ સત્તાવાર કાર્યવાહી કરવામાં આવી છે કે નહીં તે અંગેની વિગતો હજી સામે આવી નથી. હવે જોવાનું એ રહેશે કે CCTV ફૂટેજના આધારે પોલીસ આ શખ્સો સુધી પહોંચે છે કે નહીં અને શહેરમાં આવી ચોરીની ઘટનાઓને અટકાવવા માટે કેવાં પગલાં લેવામાં આવે છે. જાહેર સ્થળોએ વાહનોમાંથી પેટ્રોલ ચોરી કરતી પ્રવૃત્તિઓ સામે કડક કાર્યવાહી થાય તેવી સ્થાનિકો અપેક્ષા રાખી રહ્યા છે.

આ પણ વાંચો: Gujarat Electricity Demand: ગુજરાતમાં વીજળીની માગમાં 36.6%નો વધારો, CM ભૂપેન્દ્ર પટેલે ઊર્જા વિભાગ સાથે કરી ઉચ્ચસ્તરીય બેઠક