Ahmedabad: SRK Techtronicsની અદ્યતન ઈલેક્ટ્રોનિક્સ મેન્યુફેક્ચરિંગ ફેસિલિટીની પશ્ચિમ નૌકાદળ કમાન્ડના વડાએ મુલાકાત લીધી

Ahmedabad: ભારતીય નૌકાદળની પશ્ચિમ નૌકાદળ કમાન્ડના ફ્લેગ ઓફિસર કમાન્ડિંગ-ઈન-ચીફ વાઈસ એડમિરલ સંજય વત્સાયન, PVSM, AVSM, NM એ અમદાવાદ જિલ્લાના બાવળા નજીક રાજોડા ખાતે આવેલી SRK Techtronicsની અદ્યતન ઇલેક્ટ્રોનિક્સ સિસ્ટમ ડિઝાઇન એન્ડ મેન્યુફેક્ચરિંગ (ESDM) સુવિધાની મુલાકાત લીધી હતી. આ મુલાકાત દરમિયાન તેમણે કંપનીના આધુનિક માળખા અને ઉત્પાદન ટેકનોલોજીની પ્રશંસા કરી હતી.

કંપનીની ટેકનિકલ ટીમ સાથે સંવાદ કર્યો

મુલાકાત દરમિયાન વાઈસ એડમિરલ સંજય વત્સાયને કંપનીના નેતૃત્વ અને ટેકનિકલ ટીમ સાથે સંવાદ કર્યો હતો. તેમણે ઉત્પાદન પ્રક્રિયાઓની સમીક્ષા કરી હતી અને કંપનીની વિવિધ ટેકનિકલ ક્ષમતાઓ વિશે માહિતી મેળવી હતી. આમાં પ્રિન્ટેડ સર્કિટ બોર્ડ એસેમ્બલી (PCBA), બોક્સ-બિલ્ડ સોલ્યુશન્સ, અદ્યતન ઉત્પાદન લાઇન્સ અને પરીક્ષણ સુવિધાઓનો સમાવેશ થાય છે.

ભારતીય નૌકાદળ દ્વારા સંરક્ષણ ક્ષેત્રમાં સ્વદેશીકરણને પ્રાથમિકતા

વાઈસ એડમિરલે ગુણવત્તા, ચોકસાઈપૂર્ણ એન્જિનિયરિંગ અને સ્વદેશી ટેકનોલોજીના વિકાસ પર કંપની દ્વારા આપવામાં આવતા ભારની પણ પ્રશંસા કરી હતી. સાથે જ, ભારતીય નૌકાદળની બદલાતી જરૂરિયાતોને પહોંચી વળવામાં કંપનીની ક્ષમતાઓ કેવી રીતે ઉપયોગી થઈ શકે તે અંગે ચર્ચા કરવામાં આવી હતી. ભારતીય નૌકાદળ દ્વારા સંરક્ષણ ક્ષેત્રમાં સ્વદેશીકરણને પ્રાથમિકતા આપવામાં આવી રહી છે, ત્યારે દેશની સ્થાનિક ઈલેક્ટ્રોનિક્સ ઉત્પાદન ક્ષમતાઓનું મહત્વ વધી રહ્યું છે. આ મુલાકાત દરમિયાન મહત્વપૂર્ણ ઇલેક્ટ્રોનિક્સ અને વ્યૂહાત્મક ઉપયોગો માટે ભારતીય ESDM ક્ષેત્રના સંભવિત યોગદાન અંગે પણ ચર્ચા થઈ હતી.

શ્રી રામકૃષ્ણ એક્સપોર્ટ્સ ગ્રૂપ (SRK)ના 6 દાયકાના વારસાથી સમર્થિત SRK Techtronics ડિઝાઈન સહાય, પ્રોટોટાઈપિંગ, PCBA, પરીક્ષણ, બોક્સ-બિલ્ડ અને પ્રોડક્ટ ઈન્ટિગ્રેશન સહિતની એન્ડ-ટુ-એન્ડ ઈલેક્ટ્રોનિક્સ ડિઝાઈન અને મેન્યુફેક્ચરિંગ સેવાઓ પૂરી પાડે છે. કંપની એરોસ્પેસ, સંરક્ષણ, ઓટોમોટિવ, મેડિકલ, ઔદ્યોગિક, રેલવે અને IT ક્ષેત્રોમાં પોતાની સેવાઓ આપે છે.

આ પણ વાંચો: Mehsana News: ઈન્ડિયન મેડિકલ એસોસિએશનનો 'સૂર્યા' ફિલ્મ સામે ઉગ્ર વિરોધ, કેન્દ્રીય મંત્રીને પત્ર લખ્યો