Saif Ali Khan પર હુમલા સમયે શું થયું? નર્સે કોર્ટમાં કર્યો ખુલાસો, આરોપીએ માગ્યા હતા 1 કરોડ રૂપિયા!

Saif Ali Khan: બોલીવુડ એક્ટર સૈફ અલી ખાન પર જાન્યુઆરી 2025માં તેમના બાંદ્રા સ્થિત નિવાસસ્થાને થયેલા હુમલાના કેસની સુનાવણી દરમિયાન અનેક મહત્વપૂર્ણ વિગતો સામે આવી છે. પરિવાર સાથે કામ કરતી નર્સે કોર્ટમાં પોતાનું નિવેદન આપતાં આરોપી મોહમ્મદ શરીફુલની ઓળખ કરી હતી.

નર્સના જણાવ્યા મુજબ હુમલાખોરે ઘરમાં ઘૂસીને સૈફ અલી ખાનના નાના પુત્ર જેહના રૂમમાં જવાનો પ્રયાસ કર્યો હતો અને તેમની પાસેથી 1 કરોડ રૂપિયાની માગણી કરી હતી.

મીડિયા રિપોર્ટ મુજબ 59 વર્ષની નર્સ આ કેસમાં ફરિયાદી અને પ્રથમ સાક્ષી છે. તેઓ 5 વર્ષથી વધુ સમયથી સૈફ અલી ખાન અને કરીના કપૂર ખાનના પરિવાર સાથે કામ કરી રહ્યાં હતાં અને જેહની સંભાળ રાખવાની જવાબદારી સંભાળતાં હતાં.

મધરાતે નર્સની ઊંઘ ઊડી ગઈ

નર્સના અગાઉના નિવેદન મુજબ 15 અને 16 જાન્યુઆરીની મધરાત દરમિયાન લગભગ 2 વાગ્યે અવાજ આવતાં તેમની ઊંઘ ઊડી ગઈ હતી. તેણે બાથરૂમની લાઈટ ચાલુ જોઈ હતી અને શરૂઆતમાં તેને લાગ્યું કે કરીના કપૂર ત્યાં હશે. પરંતુ કંઈક અજુગતું હોવાની શંકા જતાં તેણે ફરી ધ્યાન આપ્યું. આ દરમિયાન તેણે ટોપી પહેરેલા એક અજાણ્યા વ્યક્તિનો પડછાયો જોયો હતો, જે જેહના પલંગ તરફ આગળ વધી રહ્યો હતો.

નર્સે જેહને બચાવવા માટે તરત જ આગળ વધવાનો પ્રયાસ કર્યો હતો. તેમના જણાવ્યા મુજબ આ દરમિયાન હુમલાખોરે હેક્સા બ્લેડથી તેમના પર હુમલો કર્યો હતો, જેના કારણે તેમની 2 આંગળીઓમાં ઈજા થઈ હતી. આરોપીએ તેમને ચૂપ રહેવા અને રૂમની બહાર ન જવાની ધમકી પણ આપી હતી.

સૈફ અલી ખાન હુમલાખોરનો સામનો કરવા પહોંચ્યો

નર્સના નિવેદન મુજબ જ્યારે તેણે હુમલાખોરને પૂછ્યું કે તેને શું જોઈએ છે, ત્યારે તેણે પૈસાની માગણી કરી હતી અને 1 કરોડ રૂપિયાની રકમ જણાવી હતી. રૂમમાં થયેલા અવાજને કારણે જેહની સંભાળ રાખતી અન્ય મહિલા કર્મચારીની પણ ઊંઘ ઊડી ગઈ હતી.

આ દરમિયાન સૈફ અલી ખાન હુમલાખોરનો સામનો કરવા પહોંચ્યો. તેણે અજાણ્યા વ્યક્તિને તે કોણ છે અને શું ઈચ્છે છે તેવું પૂછ્યું હતું. ત્યારબાદ આરોપીએ એક્ટર પર હુમલો કર્યો હોવાનો નર્સે કોર્ટમાં દાવો કર્યો હતો.

સૈફને પીઠ, ગરદન અને હાથમાં ઈજાઓ થઈ

નર્સના જણાવ્યા અનુસાર અવાજ સાંભળીને રૂમમાં પહોંચેલા પરિવારના અન્ય એક કર્મચારી પર પણ હુમલો કરવામાં આવ્યો હતો. સૈફે થોડા સમય માટે હુમલાખોરને કાબૂમાં લેવાનો પ્રયાસ કર્યો હતો. ત્યારબાદ પરિવારના સભ્યો અને કર્મચારીઓ બીજા રૂમમાં જઈને અંદરથી દરવાજો બંધ કરી દીધો હતો. આ ઘટનામાં સૈફ અલી ખાનને પીઠ, ગરદન અને હાથ પર ઈજાઓ થઈ હતી. ત્યારબાદ તેને સારવાર માટે હોસ્પિટલમાં લઈ જવામાં આવ્યો હતો.

આ પણ વાંચો: Tiger Shroffએ કરોડોનો ફ્લેટ વેચ્યો, ફાયરિંગની ઘટના બાદ 4 દિવસમાં જ કરી ડીલ