Darshan Ravalનું નવું ગીત ‘સિર્ફ તુમ’ રિલીઝ: પત્નીને પણ છે આ ગીત પસંદ, સિંગરે જણાવ્યું કેમ છે ખાસ
Darshan Raval
Darshan Ravalનું નવું ગીત ‘સિર્ફ તુમ’ રિલીઝ: પત્નીને પણ છે આ ગીત પસંદ, સિંગરે જણાવ્યું કેમ છે ખાસ
Darshan Raval
Darshan Raval: ભારતીય પોપ સિંગર દર્શન રાવલે પોતાનું નવું ગીત ‘સિર્ફ તુમ’ રિલીઝ કર્યું છે. આ ગીત તેમના નવા EP ‘ધ એવરઆફ્ટર’નો બીજો ટ્રેક છે. દર્શન રાવલે જણાવ્યું કે આ ગીત તેમના માટે ખાસ છે, કારણ કે તેમની પત્નીને સામાન્ય રીતે સેડ સોંગ્સ પસંદ નથી, પરંતુ ‘સિર્ફ તુમ’ તેમનાં મનપસંદ ગીતોમાંનું એક છે. પ્રેમ, વિરહ અને દિલ તૂટવાની લાગણીઓને રજૂ કરતું આ ગીત સંગીતપ્રેમીઓ માટે ખાસ બની શકે છે.
‘ધ એવરઆફ્ટર’ EPમાં પ્રેમની અલગ-અલગ લાગણીઓ
દર્શન રાવલનું નવું EP ‘ધ એવરઆફ્ટર’ 23 ઑક્ટોબરે રિલીઝ થયું હતું. વોર્નર મ્યુઝિક ઇન્ડિયા હેઠળ રજૂ થયેલા આ EPમાં કુલ ચાર ગીતોનો સમાવેશ થાય છે. દરેક ગીત પ્રેમ, દિલ તૂટવું, આશા અને જીવનની સફરના અલગ-અલગ રંગો રજૂ કરે છે.
આ EPમાં ‘નાલ નાલ વે’, ‘સિર્ફ તુમ’, ‘જાદુ’ અને ‘કારવાં’ ગીતો સામેલ છે. અગાઉ દર્શન ‘નાલ નાલ વે’ રિલીઝ કરી ચૂક્યા છે, જ્યારે ‘સિર્ફ તુમ’ તેની વાર્તાને આગળ વધારે છે.
મ્યુઝિક વીડિયોમાં દિલ તૂટવાની કહાની
‘સિર્ફ તુમ’ના મ્યુઝિક વીડિયોમાં એક કાલ્પનિક દુનિયા અને પ્રેમમાં મળેલા વિરહની કહાની દર્શાવવામાં આવી છે. તેમાં દર્શન રાવલ ડેન નામના સંઘર્ષ કરી રહેલા સંગીતકારની ભૂમિકા ભજવે છે, જ્યારે બરખા સિંહ નિયતિના પાત્રમાં જોવા મળે છે.
કહાનીમાં ડેન એક દિવસ જાગે છે ત્યારે તેને નિયતિ ગાયબ થયેલી જોવા મળે છે. આસપાસના લોકો તેને કહે છે કે નિયતિનું અસ્તિત્વ જ નહોતું. નિયતિ સાથે એક અલગ દુનિયામાં પ્રેમની સુંદર ક્ષણો અનુભવ્યા બાદ ડેન પોતાના તૂટેલા દિલની લાગણીઓ સંગીત દ્વારા વ્યક્ત કરે છે. તેને આશા છે કે સંગીતના માધ્યમથી તે ફરી નિયતિ સુધી પહોંચી શકશે.
‘જાદુ’ ફેન્સ માટે ભેટ, ‘કારવાં’ જીવનની સફર
EPના ચારેય ગીતો અલગ લાગણીઓ સાથે જોડાયેલા છે. ‘નાલ નાલ વે’ પ્રેમ મળવાની ખુશી વ્યક્ત કરે છે, જ્યારે ‘સિર્ફ તુમ’ વિરહ અને દિલ તૂટવાની લાગણીઓ રજૂ કરે છે. ‘જાદુ’ દર્શનના ચાહકો માટે છે, જેમને તેઓ પ્રેમથી ‘બ્લૂ ફેમિલી’ કહે છે. બીજી તરફ, ‘કારવાં’ તેમના જીવનના પ્રવાસ અને કુદરત સાથેના જોડાણને રજૂ કરે છે.
દર્શને જણાવ્યું કે આ EP દ્વારા તેઓ પોતાના શ્રોતાઓ સાથે રોમેન્ટિક લાગણીઓનાં વિવિધ પાસાં વહેંચવા માગે છે. તેમનો ‘લવ લેટર્સ’ ટૂર પણ આ સંગીતપ્રોજેક્ટ સાથે જોડાયેલો છે. હવે તેઓ આ ગીતોને ચાહકો સમક્ષ લાઇવ રજૂ કરવા આતુર છે.
