Share Market Crash: દશેરા પહેલા શેરમાર્કેટમાં આવ્યો મોટો કડાકો, સેન્સેક્સ 1000 પોઈન્ટ ગગડ્યો

Share Market Crash: ભારતીય શેરબજારમાં સોમવાર, 19 ઑક્ટોબરે ભારે વેચવાલી જોવા મળી હતી. સેન્સેક્સ અને નિફ્ટીમાં મોટો ઘટાડો નોંધાતાં રોકાણકારોની ચિંતામાં વધારો થયો છે. બેન્કિંગ અને IT શેરોમાં વેચવાલીનું દબાણ જોવા મળ્યું હતું, જ્યારે વૈશ્વિક બજારોના નબળા સંકેતો અને ક્રૂડ ઓઇલના ઊંચા ભાવની પણ બજાર પર અસર પડી હતી.

નિફ્ટીમાં પણ મોટો કડાકો

સેન્સેક્સ 1,013.06 પોઈન્ટ એટલે કે 1.35 ટકા ઘટીને 73,716.21ના સ્તરે પહોંચ્યો હતો. બીજી તરફ, નિફ્ટી 50માં 294.20 પોઈન્ટનો ઘટાડો નોંધાયો હતો અને તે 22,851.95ના સ્તરે રહ્યો હતો. સેક્ટરલ ઈન્ડેક્સમાં નિફ્ટી IT સૌથી વધુ દબાણ હેઠળ જોવા મળ્યો હતો. તેમાં 535.25 પોઈન્ટ એટલે કે 1.67 ટકાનો ઘટાડો નોંધાઈ 31,388.85નું સ્તર જોવા મળ્યું હતું. નિફ્ટી બેન્ક 477.65 પોઈન્ટ ઘટીને 55,366.35 પર રહ્યો હતો. જ્યારે બેન્કેક્સમાં 396.91 પોઈન્ટ અને નિફ્ટી મિડકેપ 100માં 530.50 પોઈન્ટનો ઘટાડો નોંધાયો હતો.

શું છે બજારમાં ઘટાડાના 3 મુખ્ય કારણો?

1. બેન્કિંગ શેરોમાં વેચવાલી: HDFC બેન્ક અને ICICI બેન્ક જેવી મોટી ખાનગી બેન્કોના નાણાકીય પરિણામો બાદ નેટ ઈન્ટરેસ્ટ માર્જિન પર દબાણ અને ધીમી ક્રેડિટ વૃદ્ધિની આશંકાએ રોકાણકારોની ચિંતા વધારી હતી.

2. IT સેક્ટર પર વૈશ્વિક દબાણ: અમેરિકાના ટેક શેરોમાં નબળા સંકેતો અને આર્ટિફિશિયલ ઈન્ટેલિજન્સ (AI) પાછળ વધતા ખર્ચને કારણે ભારતીય IT શેરોમાં વેચવાલી જોવા મળી હતી.

3. ક્રૂડ ઓઈલના ઊંચા ભાવ: આંતરરાષ્ટ્રીય બજારમાં બ્રેન્ટ ક્રૂડનો ભાવ પ્રતિ બેરલ 108 ડૉલરથી ઉપર રહેતા ભારતના આયાત ખર્ચ, મોંઘવારી અને રાજકોષીય ખાધ અંગે ચિંતાઓ વધી હતી.

આ પરિબળોએ બજારના સેન્ટિમેન્ટને નબળું પાડ્યું હતું. જોકે, આ ઘટાડાની અસર અને બજારની આગામી દિશા વૈશ્વિક સંકેતો, કંપનીઓનાં પરિણામો તથા ક્રૂડ ઓઈલના ભાવ પર નિર્ભર રહેશે.

નોંધ - શેરબજાર કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ જરૂર લેવી.

આ પણ વાંચો: Gujarat Targets Japanese Investment in Semiconductors : ઓસાકામાં ગુજરાત માટે હાઇ-લેવલ બેઠક, જાપાનના ઉદ્યોગપતિઓ સાથે નાયબ મુખ્યમંત્રીએ કરી રોકાણની ચર્ચા