શેરબજારમાં 3 દિવસની સતત મંદીનો અંત, સેન્સેક્સ 138 પોઈન્ટ વધ્યો; બેન્કિંગ-મીડિયા શેર ચમક્યા

Indian Stock Market Today:પશ્ચિમ એશિયામાં ચાલી રહેલા ભૌગોલિક-રાજકીય તણાવ વચ્ચે ભારતીય શેરબજારમાં સતત ત્રણ ટ્રેડિંગ સેશનથી ચાલી રહેલો ઘટાડો ગુરુવારે અટક્યો હતો. સેન્સેક્સ અને નિફ્ટી બંને મામૂલી વધારા સાથે લીલા નિશાનમાં બંધ રહ્યા હતા.

સેન્સેક્સ 138 પોઈન્ટ વધ્યો

BSE સેન્સેક્સ 138.36 પોઈન્ટ એટલે કે 0.19 ટકા વધીને 74,902.59 પર બંધ રહ્યો હતો. બીજી તરફ NSE નિફ્ટી 50 46.30 પોઈન્ટ એટલે કે 0.20 ટકા વધીને 23,477.80 પર પહોંચ્યો હતો. દિવસ દરમિયાન લગભગ 1,802 શેરમાં તેજી જોવા મળી હતી, જ્યારે 2,224 શેર ઘટ્યા હતા અને 135 શેરમાં કોઈ ફેરફાર થયો નહોતો.

સેન્સેક્સ અને નિફ્ટીમાં દિવસ દરમિયાન ઉતાર-ચઢાવ

સેન્સેક્સ અગાઉના 74,764.23ના બંધ સ્તરની સરખામણીએ 21.69 પોઈન્ટના ઘટાડા સાથે 74,742.54 પર ખુલ્યો હતો. ત્યારબાદ દિવસ દરમિયાન તે 146.73 પોઈન્ટ વધીને 74,910.96ની ઊંચી સપાટીએ પહોંચ્યો હતો. જોકે, એક સમયે સેન્સેક્સ 165.75 પોઈન્ટ ઘટીને 74,598.47ના નીચલા સ્તરે પણ પહોંચ્યો હતો. નિફ્ટી અગાઉના 23,431.50ના બંધ સ્તરની સરખામણીએ 15 પોઈન્ટ વધીને 23,446.60 પર ખુલ્યો હતો. દિવસ દરમિયાન નિફ્ટીએ 23,494.95ની ઊંચી અને 23,380.10ની નીચી સપાટી બનાવી હતી.

મીડિયા અને બેન્કિંગ શેરમાં તેજી

સેક્ટર પ્રમાણે નિફ્ટી મીડિયા, ફાઇનાન્શિયલ સર્વિસિસ, PSU બેન્ક અને પ્રાઇવેટ બેન્ક ઇન્ડેક્સે સારું પ્રદર્શન કર્યું હતું. બીજી તરફ મેટલ, ફાર્મા, ઓટો, હેલ્થકેર અને FMCG ક્ષેત્રના શેરોમાં દબાણ જોવા મળ્યું હતું. નિફ્ટી 50માં HDFC Life, Power Grid, ONGC, Bharti Airtel અને Tech Mahindraના શેરમાં સૌથી વધુ તેજી જોવા મળી હતી. જ્યારે HCL Tech, Hindalco અને Tata Steelમાં સૌથી વધુ ઘટાડો નોંધાયો હતો.

કાચા તેલના ભાવ 102 ડોલરથી ઉપર

પશ્ચિમ એશિયામાં વધતા સંઘર્ષ વચ્ચે કાચા તેલના ભાવ પ્રતિ બેરલ 102 ડોલરથી ઉપર રહ્યા હતા. અહેવાલ મુજબ, ઈરાન અને અમેરિકા વચ્ચેના સંઘર્ષને કારણે હોર્મુઝ જળમાર્ગની આસપાસની સ્થિતિની અસર ક્રૂડ ઓઈલના ભાવ પર પડી રહી છે. ભારત વિશ્વના મોટા ક્રૂડ ઓઈલ આયાતકાર દેશોમાં સામેલ હોવાથી ઊંચા તેલના ભાવથી આયાત બિલ વધવા, મોંઘવારીનું દબાણ વધવા અને આર્થિક વિકાસ તથા કંપનીઓની નફાકારકતા પર અસર થવાની ચિંતા રહે છે.

મિડકેપ અને સ્મોલકેપમાં ઘટાડો

વ્યાપક બજારની વાત કરીએ તો નિફ્ટી મિડકેપ ઇન્ડેક્સ 0.38 ટકા અને નિફ્ટી સ્મોલકેપ ઇન્ડેક્સ 0.07 ટકા ઘટીને બંધ રહ્યા હતા. એટલે મુખ્ય સૂચકાંકોમાં તેજી છતાં વ્યાપક બજારમાં સંપૂર્ણ રીતે ખરીદીનો માહોલ જોવા મળ્યો નહોતો.