મિડલ-ઇસ્ટના તણાવની અસર, ભારતીય શેરબજાર ઘટાડા સાથે બંધ; સેન્સેક્સ 374 અંક ગગડ્યો

Indian Stock Market Today: મધ્ય-પૂર્વમાં ફરી વધેલા તણાવની અસર ભારતીય શેરબજાર પર જોવા મળી હતી. બુધવારના ટ્રેડિંગ સેશનના અંતે સેન્સેક્સ 373.93 અંક એટલે કે 0.49 ટકા ઘટીને 76,570.35 પર બંધ રહ્યો હતો. જ્યારે નિફ્ટી 141.35 અંક એટલે કે 0.59 ટકા ઘટીને 23,914.45 પર પહોંચ્યો હતો. બજારમાં વેચવાલી માત્ર મોટા શેરો સુધી મર્યાદિત રહી નહોતી. મિડકેપ અને સ્મોલકેપ શેરોમાં પણ દબાણ જોવા મળ્યું હતું.

મિડકેપ અને સ્મોલકેપ ઇન્ડેક્સ પણ લાલ નિશાનમાં

દિવસના અંતે નિફ્ટી મિડકેપ 100 ઇન્ડેક્સ 332.90 અંક એટલે કે 0.53 ટકા ઘટીને 63,001.60 પર બંધ થયો હતો. તે જ સમયે નિફ્ટી સ્મોલકેપ 100 ઇન્ડેક્સ 74 અંક એટલે કે 0.37 ટકા ઘટીને 19,812.25 પર પહોંચ્યો હતો.

ઓટો અને IT શેરોમાં સૌથી વધુ દબાણ

બજારના ઘટાડામાં ઓટો અને IT ક્ષેત્રે સૌથી વધુ અસર જોવા મળી હતી. નિફ્ટી ઓટો 1.79 ટકા, જ્યારે નિફ્ટી મીડિયા 1.75 ટકા અને નિફ્ટી IT 1.25 ટકા ઘટ્યા હતા. આ ઉપરાંત નિફ્ટી ઇન્ડિયા મેન્યુફેક્ચરિંગમાં 0.81 ટકા, સર્વિસિસમાં 0.75 ટકા, ફાઇનાન્શિયલ સર્વિસિસમાં 0.73 ટકા અને કન્ઝમ્પ્શન ઇન્ડેક્સમાં 0.67 ટકાનો ઘટાડો નોંધાયો હતો.

એનર્જી અને ઓઇલ-ગેસ શેરોએ આપ્યો સહારો

જ્યાં એક તરફ બજારના મોટા ભાગના ક્ષેત્રોમાં ઘટાડો નોંધાયો, ત્યાં કેટલીક કેટેગરીમાં તેજી પણ જોવા મળી હતી. નિફ્ટી એનર્જી 0.59 ટકા, કમોડિટીઝ 0.54 ટકા, PSE 0.38 ટકા, ઓઇલ એન્ડ ગેસ 0.33 ટકા, રિયલ્ટી 0.21 ટકા અને ઇન્ફ્રા 0.03 ટકા વધ્યા હતા.

આ શેરોમાં જોવા મળી ખરીદી

સેન્સેક્સ પેકમાં અદાણી પોર્ટ્સ, બજાજ ફિનસર્વ, પાવર ગ્રિડ, NTPC, ટાઇટન, ટ્રેન્ટ, બજાજ ફાઇનાન્સ, સન ફાર્મા અને ITCમાં તેજી જોવા મળી હતી. બીજી તરફ એશિયન પેઇન્ટ્સ, M&M, HDFC બેન્ક, HCL ટેક, BEL, ઇન્ફોસિસ, SBI, ઇન્ડિગો, HUL, TCS, ટેક મહિન્દ્રા, ICICI બેન્ક, મારુતિ સુઝુકી, ભારતી એરટેલ, એક્સિસ બેન્ક, ઇટર્નલ, ટાટા સ્ટીલ અને અલ્ટ્રાટેક સિમેન્ટ ઘટાડા સાથે બંધ થયા હતા.

ક્રૂડ ઓઇલ 95 ડોલરને પાર

બજાર નિષ્ણાતોના મતે અમેરિકા અને ઈરાન વચ્ચેનો સંઘર્ષ ફરી ભડકાતા મધ્ય-પૂર્વની સ્થિતિ વધુ તણાવપૂર્ણ બની છે. તેની સીધી અસર વૈશ્વિક બજારો તેમજ ક્રૂડ ઓઇલના ભાવ પર જોવા મળી રહી છે. આ તણાવ વચ્ચે કાચા તેલના ભાવ 95 ડોલર પ્રતિ બેરલના સ્તરથી ઉપર પહોંચ્યા હોવાનું જણાવાયું છે. ભારતમાં ક્રૂડ ઓઇલની આયાત પર નિર્ભરતા વધુ હોવાથી ઊંચા તેલના ભાવને કારણે રોકાણકારોની ચિંતા વધી છે.

વૈશ્વિક તણાવ વચ્ચે રોકાણકારોમાં સાવચેતી

મધ્ય-પૂર્વમાં ભૂરાજકીય અનિશ્ચિતતા વધતા રોકાણકારો ખાસ કરીને ઓટો, IT અને મેન્યુફેક્ચરિંગ જેવા ક્ષેત્રોમાં સાવચેત દેખાયા હતા. આગામી સત્રોમાં ક્રૂડના ભાવ અને પશ્ચિમ એશિયાની સ્થિતિ બજારની દિશા નક્કી કરવામાં મહત્વની ભૂમિકા ભજવી શકે છે.