NEET પરીક્ષાના પેપર લીક અને પરીક્ષા રદ થવાના વિવાદ વચ્ચે મધ્યપ્રદેશના મૌગંજ જિલ્લામાંથી એક હૃદયદ્રાવક ઘટના સામે આવી છે. ડોક્ટર બનવાનું સ્વપ્ન જોતી અને NEETની તૈયારી કરતી વિદ્યાર્થિની આકાંક્ષા ચતુર્વેદીએ પોતાના ઘરે ફાંસો ખાઈ આત્મહત્યા કરી હોવાનું સામે આવ્યું છે. ઘટનાએ સમગ્ર પરિવારને શોકમાં ગરકાવ કરી દીધો છે.

પરિવારના જણાવ્યા અનુસાર, આકાંક્ષાને NEET પરીક્ષામાં આશરે 650 ગુણ મળવાની આશા હતી અને પરિવારને તેના પસંદગી થવાનો સંપૂર્ણ વિશ્વાસ હતો. જોકે પેપર લીકના આરોપો અને પરીક્ષા રદ થવાના સમાચાર બાદ તે ભારે માનસિક તણાવમાં રહેવા લાગી હતી.

દીકરીના ભણતર માટે પિતાએ લીધું હતું લોન:

આકાંક્ષાના પરિવારની આર્થિક સ્થિતિ મજબૂત ન હોવા છતાં તેના માતા-પિતાએ દીકરીના સપનાઓ પૂરાં કરવા માટે કોઈ કસર છોડી નહોતી. પરિવાર દ્વારા ખેડૂત ક્રેડિટ કાર્ડ (KCC) પર લગભગ 3 લાખ રૂપિયાનું લોન લેવામાં આવ્યું હતું.

આકાંક્ષાના પિતા કૃષ્ણકુમાર ચતુર્વેદી ખેતી કરે છે, પરંતુ દીકરીને ઉચ્ચ શિક્ષણ અપાવવા માટે તેઓ નાગપુરમાં કુક તરીકે પણ કામ કરતા હતા. આકાંક્ષા નાગપુરની ખાનગી કોચિંગ સંસ્થામાં NEETની તૈયારી કરી રહી હતી.

સુસાઇડ નોટમાં વ્યક્ત કરી પીડા:

પોલીસને ઘટનાસ્થળેથી એક સુસાઇડ નોટ પણ મળી આવી હોવાનું જણાવવામાં આવ્યું છે. તેમાં આકાંક્ષાએ લખ્યું હતું:

સોરી મમ્મી-પપ્પા... તમને વિશ્વાસ હતો કે તમારી દીકરી ડોક્ટર બનશે, પરંતુ હવે મારી પાસે ફરીથી NEET પરીક્ષા આપવાની હિંમત નથી. મેં તમને નિરાશ કર્યા છે. ફરી પરીક્ષા સારી જશે તેની કોઈ ખાતરી નથી.

આ શબ્દોએ પરિવારજનો અને સ્થાનિક લોકોને ભાવુક બનાવી દીધા છે.

NEET પરીક્ષા વિવાદ શું છે?

NEET UG 2026 પરીક્ષા બાદ દેશભરમાં પેપર લીક અને ગેરરીતિઓના આરોપો સામે આવ્યા હતા. પરીક્ષા પૂર્ણ થયા બાદ વિવિધ સ્તરે અનિયમિતતાઓની ફરિયાદો મળતા મામલો તપાસ માટે કેન્દ્રિય એજન્સીઓને સોંપવામાં આવ્યો હતો.

પરીક્ષા રદ કરવાની જાહેરાત બાદ લાખો વિદ્યાર્થીઓ અને તેમના પરિવારોમાં અનિશ્ચિતતા અને ચિંતા ફેલાઈ હતી. ત્યારબાદ ફરી પરીક્ષા યોજવાનો નિર્ણય લેવામાં આવ્યો હતો. સમગ્ર મામલાની તપાસ હાલ CBI દ્વારા કરવામાં આવી રહી છે અને અનેક આરોપીઓની ધરપકડ પણ કરવામાં આવી હોવાનું જણાવાયું છે.