Michael Jackson: દુનિયાભરમાં 'કિંગ ઓફ પોપ' તરીકે ઓળખાતા માઇકલ જેક્સનનું સંગીત અને ડાન્સ આજે પણ કરોડો ચાહકોના દિલમાં જીવંત છે. પરંતુ તેમની કારકિર્દી સાથે એક એવો વિવાદ પણ જોડાયેલો રહ્યો, જેણે વર્ષો સુધી તેમનો પીછો છોડ્યો નહીં. બાળ યૌન શોષણના આરોપોથી લઈને કોર્ટ કેસ અને અંતે મળેલી રાહત સુધીની સમગ્ર કહાની ડોક્યુસિરીઝ Michael Jackson: The Verdictમાં દર્શાવવામાં આવી છે.

1993માં પ્રથમ વખત લાગ્યા ગંભીર આરોપો

વર્ષ 1993માં માઈકલ જેક્સન સામે પ્રથમ વખત એક 13 વર્ષીય કિશોર અને તેના પરિવાર દ્વારા યૌન શોષણના ગંભીર આરોપો લગાવવામાં આવ્યા હતા. આ કેસ બાદ પોલીસ તપાસ શરૂ થઈ અને સમગ્ર વિશ્વના મીડિયાની નજર તેમના પર કેન્દ્રિત થઈ ગઈ.

માઈકલ જેક્સન અને તેમની કાનૂની ટીમે શરૂઆતથી જ તમામ આરોપોને નકારી કાઢ્યા હતા અને દાવો કર્યો હતો કે તેમની પાસેથી પૈસા પડાવવાનો પ્રયાસ થઈ રહ્યો છે.

નજીકના લોકોના નિવેદનોથી વધ્યો વિવાદ

કેસ દરમિયાન માઈકલ જેક્સનના નજીકના કેટલાક લોકો જાહેરમાં આવ્યા હતા. કેટલાક લોકોએ તેમનો બચાવ કર્યો, જ્યારે કેટલાકે આરોપોને ગંભીર ગણાવ્યા.

તેમની બહેન La ટોયા જેક્સનએ એક સમયે જાહેરમાં કહ્યું હતું કે આરોપોમાં સત્ય હોઈ શકે છે. જોકે બાદમાં તેમણે પોતાનું નિવેદન પાછું ખેંચી લીધું અને દાવો કર્યો કે તે સમયે તેમના પર દબાણ હતું.

2003ની ડોક્યુમેન્ટ્રી બાદ ફરી શરૂ થયો વિવાદ

વર્ષ 2003માં એક ટેલિવિઝન ડોક્યુમેન્ટ્રી પ્રસારિત થઈ હતી, જેમાં માઈકલ જેક્સનને એક કિશોર સાથે ખૂબ નજીકના સંબંધમાં દર્શાવવામાં આવ્યા હતા.

આ ડોક્યુમેન્ટ્રી બાદ ફરી વિવાદ ઉભો થયો અને પોલીસ તપાસ શરૂ થઈ. ત્યારબાદ માઈકલ જેક્સન સામે બાળ શોષણ સહિતના અનેક ગંભીર આરોપો મૂકવામાં આવ્યા અને મામલો કોર્ટ સુધી પહોંચ્યો.

2005નો કેસ બન્યો વૈશ્વિક ચર્ચાનો વિષય

Michael Jackson: The Verdict ડોક્યુસિરીઝનો મુખ્ય ફોકસ 2005ના હાઈ-પ્રોફાઇલ કેસ પર છે.

આ કેસમાં ગેવિન અર્વિઝો નામના કિશોરે કોર્ટમાં માઈકલ જેક્સન વિરુદ્ધ સાક્ષી આપી હતી. ફરિયાદી પક્ષે દાવો કર્યો હતો કે માઈકલ દ્વારા તેની સાથે અયોગ્ય વર્તન કરવામાં આવ્યું હતું.

બીજી તરફ માઈકલની ટીમ સતત દલીલ કરતી રહી કે તમામ આરોપો ખોટા અને બિનઆધારભૂત છે.

કેસ દરમિયાન અનેક સાક્ષીઓને કોર્ટમાં બોલાવવામાં આવ્યા હતા. તેમાં માઈકલ જેક્સનની પૂર્વ પત્ની ડેબિ રોનું નામ પણ સામેલ હતું. જોકે તેમણે કોર્ટમાં માઈકલ વિરુદ્ધ કોઈ આરોપજનક નિવેદન આપ્યું નહોતું.

લગભગ ચાર મહિના સુધી ચાલેલા આ કેસ પર સમગ્ર વિશ્વની નજર હતી અને દરરોજ કોર્ટમાંથી બહાર આવતી માહિતી આંતરરાષ્ટ્રીય હેડલાઈન્સ બની રહી હતી.

આખરે કોર્ટમાંથી મળી ક્લીન ચિટ

13 જૂન 2005ના રોજ જ્યુરીએ તમામ ફોજદારી આરોપોમાં માઈકલ જેક્સનને નિર્દોષ જાહેર કર્યા હતા. કોર્ટને એવા પૂરતા પુરાવા મળ્યા નહોતા જેના આધારે આરોપો સાબિત થઈ શકે.

કોર્ટમાંથી રાહત મળ્યા બાદ પણ વિવાદ સંપૂર્ણપણે સમાપ્ત થયો નહોતો. 2009માં માઈકલ જેક્સનના અવસાન બાદ પણ તેમના વિરુદ્ધના આરોપોને લઈને ચર્ચાઓ અને દાવાઓ સમયાંતરે સામે આવતા રહ્યા છે.

ડોક્યુસિરીઝમાં શું જોવા મળશે?

Michael Jackson: The Verdictના ત્રણ એપિસોડમાં આરોપો, પોલીસ તપાસ, કોર્ટરૂમ ડ્રામા, સાક્ષીઓના નિવેદનો અને અંતિમ ચુકાદા સુધીની સમગ્ર પ્રક્રિયાને વિગતવાર રજૂ કરવામાં આવી છે. કિંગ ઓફ પોપના જીવનના સૌથી વિવાદાસ્પદ અધ્યાયને સમજવા માંગતા દર્શકો માટે આ ડોક્યુસિરીઝ ખાસ રસપ્રદ બની શકે છે.