MI vs DC Live Update: સમીર રિઝવીના શાનદાર પ્રદર્શનને કારણે દિલ્હી કેપિટલ્સે મુંબઈ ઈન્ડિયન્સને છ વિકેટથી હરાવ્યું છે. દિલ્હીએ સિઝનમાં સતત બીજી જીત નોંધાવી છે. પહેલા બેટિંગ કરતા મુંબઈએ 20 ઓવરમાં છ વિકેટે 162 રન બનાવ્યા હતા. તેની સામે સમીર રિઝવીના 90 રનની આગેવાની હેઠળ દિલ્હીએ 18.1 ઓવરમાં ચાર વિકેટે 164 રન બનાવ્યા હતા. ઈમ્પેક્ટ પ્લેયર તરીકે રમતા સમીરએ સતત બીજી મેચમાં પ્રભાવ પાડ્યો હતો. 

સમીરે આ મેચમાં મજબૂત બેટિંગ કરી ડેવિડ મિલર સાથે ચોથી વિકેટ માટે 78 રનની ભાગીદારી કરી હતી. ટાર્ગેટ ચેઝ કરતા દિલ્હીની શરૂઆત નબળી રહી, તેણે શરૂઆતમાં બે વિકેટ ગુમાવી દીધી હતી. ત્યારબાદ દિલ્હીએ રિઝવીને ઈમ્પેક્ટ પ્લેયર તરીકે ટીમમાં સામેલ કર્યો હતો. રિઝવીએ પહેલા પથુમ નિસાન્કા સાથે ત્રીજી વિકેટ માટે 66 રન બનાવ્યા અને પછી મિલર સાથે મળીને ટીમને વિજયની નજીક પહોંચાડી હતી. જો કે, સમીર સદી પૂરો કરી શક્યો નહોતો. તેણે 51 બોલમાં 90 રન બનાવ્યા હતા, જેમાં તેણે સાત ચોગ્ગા અને સાત છગ્ગા ફટકાર્યા હતા. દિલ્હી તરફથી નિસાન્કાએ સૌથી વધુ 44 રન બનાવ્યા હતા, જ્યારે ડેવિડ મિલર 21 રન બનાવીને અણનમ રહ્યા અને ટ્રિસ્ટન સ્ટબ્સ ત્રણ રન બનાવીને અણનમ રહ્યા હતા.

ટાર્ગેટ પીછો કરતી વખતે દિલ્હીની શરૂઆત સારી નહોતી. ટીમે 7 રનમાં બે વિકેટ ગુમાવી દીધી હતી. જો કે, ચોથા નંબર પર આવતા સમીર રિઝવીએ પથુમ નિસન્કા સાથે દિલ્હીની ઇનિંગને સ્થિર કરી હતી, ત્રીજી વિકેટ માટે 67 રન ઉમેર્યા હતા. નિસન્કા 44 રને મિશેલ સેન્ટનરના હાથે કેચ આઉટ થયા હતા, જેનાથી દિલ્હીને મોટો ફટકો પડ્યો હતો. એક સમયે એવું લાગતું હતું કે, મુંબઈ વાપસી કરશે, પરંતુ રિઝવીની વિસ્ફોટક બેટિંગે મુંબઈને મેચમાંથી સંપૂર્ણપણે બહાર કરી દીધી હતી.

રિઝવીએ માત્ર 31 બોલમાં ફિફ્ટી ફટકારી હતી. ત્યારબાદ તેણે વધુ ઝડપી ગતિએ રન બનાવ્યા હતા. રિઝવીએ 51 બોલમાં 90 રનની મેચવિનિંગ ઇનિંગ રમી હતી, જેમાં 7 ચોગ્ગા અને એટલા જ છગ્ગાનો સમાવેશ થાય છે. તેની શક્તિશાળી બેટિંગથી મુંબઈને મેચમાં વાપસી કરવાની કોઈ તક મળી નહીં. મુંબઈના બોલરો સારું પ્રદર્શન કરવામાં નિષ્ફળ રહ્યા હતા.