અર્જુન અવોર્ડ 2025ની જાહેરાત: તેજસ્વિન શંકર સહિત 17 ખેલાડીઓને મળશે સન્માન

Arjuna Award 2025: ભારત સરકારે નેશનલ સ્પોર્ટ્સ અવોર્ડ 2025ની જાહેરાત કરી છે. રમતગમત ક્ષેત્રે શાનદાર પ્રદર્શન કરનારા ખેલાડીઓને સન્માનિત કરવા માટે આ વર્ષે 17 ખેલાડીઓની અર્જુન અવોર્ડ માટે પસંદગી કરવામાં આવી છે. એથ્લેટિક્સ, બેડમિન્ટન, બોક્સિંગ, ચેસ, હોકી, શૂટિંગ, કબડ્ડી, રોઇંગ અને પેરા સ્પોર્ટ્સ સહિત વિવિધ રમતોના ખેલાડીઓનો આ યાદીમાં સમાવેશ કરવામાં આવ્યો છે.

યુવા કાર્યક્રમ અને રમત મંત્રાલય દ્વારા જાહેર કરવામાં આવેલી યાદી મુજબ, આ પસંદગી પુરસ્કાર પસંદગી સમિતિની ભલામણોના આધારે કરવામાં આવી છે. સમિતિના અધ્યક્ષ તરીકે સુપ્રીમ કોર્ટના પૂર્વ ન્યાયાધીશ જસ્ટિસ (નિવૃત્ત) અરુણ કુમાર મિશ્રા હતા.

તેજસ્વિન શંકર સહિત 17 ખેલાડીઓની પસંદગી
અર્જુન અવોર્ડ 2025 માટે પસંદ કરાયેલા 17 ખેલાડીઓમાં એથ્લેટિક્સના તેજસ્વિન શંકર, મુહમ્મદ અજમલ વી અને પ્રિયંકા ગોસ્વામીનો સમાવેશ થાય છે. બેડમિન્ટનમાં ટ્રીસા જોલી અને પુલેેલા ગાયત્રી ગોપીચંદને સન્માન આપવામાં આવશે. બોક્સિંગમાં નરેન્દ્રની પસંદગી થઈ છે. ચેસમાં વિદિત સંતોષ ગુજરાતી અને દિવ્યા જીતેન્દ્ર દેશમુખને અર્જુન અવોર્ડ મળશે. ડેફ શૂટિંગમાં ધનુષ શ્રીકાંતને પણ આ પ્રતિષ્ઠિત સન્માન માટે પસંદ કરવામાં આવ્યા છે.

હોકી અને કબડ્ડીના ખેલાડીઓને પણ સન્માન
હોકીમાં લાલરેમ્સિયામી અને રાજકુમાર પાલને અર્જુન અવોર્ડ આપવામાં આવશે. જ્યારે કબડ્ડીમાં સુરજીત અને પૂજાની પસંદગી કરવામાં આવી છે. પેરા-શૂટિંગમાં રુદ્રાંશ ખંડેલવાલ અને પેરા-એથ્લેટિક્સમાં એકતા ભયાનને સન્માન મળશે. રોઇંગમાં અરવિંદ સિંહ અને શૂટિંગમાં અખિલ શ્યોરાણને પણ અર્જુન અવોર્ડ માટે પસંદ કરવામાં આવ્યા છે.

અર્જુન અવોર્ડ 2025 માટે પસંદ ખેલાડીઓની સંપૂર્ણ યાદી

• તેજસ્વિન શંકર (એથ્લેટિક્સ)
• મોહમ્મદ અજમલ વી (એથ્લેટિક્સ)
• પ્રિયંકા ગોસ્વામી (એથ્લેટિક્સ)
• ટ્રીશા જોલી (બેડમિન્ટન)
• પુલેલા ગાયત્રી ગોપીચંદ (બેડમિન્ટન)
• નરેન્દ્ર (બોક્સિંગ)
• વિદિત સંતોષ ગુજરાતી (ચેસ)
• દિવ્યા જીતેન્દ્ર દેશમુખ (ચેસ)
• ધનુષ શ્રીકાંત (બધિર શૂટિંગ)
• લાલરેમસિયામી (હોકી)
• રાજકુમાર પાલ (હોકી)
• સુરજીત (કબડ્ડી)
• પૂજા (કબડ્ડી)
• રૂદ્રાંશ ખંડેલવાલ (પેરા-શૂટિંગ)
• એકતા ભય (પેરા-એથ્લેટિક્સ)
• અરવિંદ સિંઘ (રોઇંગ)
• અખિલ શિયોરન (શૂટિંગ)

લાઇફટાઇમ અર્જુન અવોર્ડ પણ જાહેર
રમતગમત ક્ષેત્રે લાંબા સમય સુધી નોંધપાત્ર યોગદાન આપનારા ખેલાડીઓ માટે આપવામાં આવતા લાઇફટાઇમ અર્જુન અવોર્ડ માટે ફૂટબોલના આઈ. અરુમૈનાયગમની પસંદગી કરવામાં આવી છે. આ પુરસ્કાર એવા ખેલાડીઓને આપવામાં આવે છે જેમણે પોતાના સક્રિય રમતગમત કારકિર્દી દરમિયાન શાનદાર પ્રદર્શન કર્યું હોય અને નિવૃત્તિ બાદ પણ રમતના વિકાસમાં યોગદાન આપ્યું હોય.

કોચોને પણ મળશે દ્રોણાચાર્ય અવોર્ડ
નેશનલ સ્પોર્ટ્સ અવોર્ડ 2025માં કોચ માટેના દ્રોણાચાર્ય અવોર્ડની પણ જાહેરાત કરવામાં આવી છે. નિયમિત કેટેગરીમાં એથ્લેટિક્સના પરવીર સિંહ, બોક્સિંગના છોટે લાલ યાદવ અને શૂટિંગની નેહા નંદકુમાર ચવ્હાણની પસંદગી કરવામાં આવી છે. જ્યારે લાઇફટાઇમ કેટેગરીમાં બોક્સિંગના ધર્મેન્દ્ર સિંહ યાદવ અને કુસ્તીના વીરેન્દ્ર કુમારને દ્રોણાચાર્ય અવોર્ડથી સન્માનિત કરવામાં આવશે.

ભારતીય રમતગમત ક્ષેત્રના ખેલાડીઓનું વધ્યું ગૌરવ
નેશનલ સ્પોર્ટ્સ અવોર્ડ દેશના શ્રેષ્ઠ ખેલાડીઓ, કોચ અને રમતગમત ક્ષેત્રે યોગદાન આપનાર વ્યક્તિઓને સન્માનિત કરવા માટે આપવામાં આવે છે. આ વર્ષે વિવિધ રમતના ખેલાડીઓને અર્જુન અવોર્ડ માટે પસંદ કરવામાં આવતા ભારતીય રમતગમત ક્ષેત્રમાં વધુ એક ગૌરવપૂર્ણ અધ્યાય ઉમેરાયો છે.