મહારાષ્ટ્ર : શિક્ષક પાત્રતા પરીક્ષા (TET) યોજાવાની હતી તે પહેલાં જ મોટા પાયે પેપર લીક થવાની ઘટના સામે આવતા રાજ્યમાં ખળભળાટ મચી ગયો છે. પરીક્ષાના માત્ર 24 કલાક પહેલાં જ પ્રશ્નપત્ર બહાર આવી જતાં મહારાષ્ટ્ર રાજ્ય પરીક્ષા પરિષદ (MSCE)એ 28 જૂન, 2026ના રોજ યોજાનારી TET પરીક્ષા આગામી આદેશ સુધી મુલતવી રાખવાનો નિર્ણય કર્યો છે. આ નિર્ણયથી લાખો ઉમેદવારોને ભારે નિરાશાનો સામનો કરવો પડ્યો છે.

ભિવંડીમાં દરોડા બાદ ખુલાસો
પ્રાપ્ત માહિતી મુજબ, ગુપ્ત માહિતીના આધારે ભિવંડી વિસ્તારમાં પોલીસે દરોડા પાડ્યા હતા. તપાસ દરમિયાન કેટલાક શંકાસ્પદ દસ્તાવેજો મળ્યા હતા, જેમાં પરીક્ષાના પ્રશ્નો મળતા આવતાં હોવાનું પ્રાથમિક તપાસમાં બહાર આવ્યું છે. આ મામલે ભિવંડી પોલીસ સ્ટેશનમાં ગુનો નોંધવામાં આવ્યો છે અને ઊંડાણપૂર્વક તપાસ શરૂ કરવામાં આવી છે.

1,028 કેન્દ્રો પર પરીક્ષા યોજાવાની હતી
MSCE દ્વારા TET પરીક્ષા રાજ્યના કુલ 1,028 પરીક્ષા કેન્દ્રો પર યોજવાની તૈયારી કરવામાં આવી હતી. અંદાજે 4.28 લાખ ઉમેદવારો આ પરીક્ષામાં બેસવાના હતા. પરંતુ પેપર લીકની ગંભીર ઘટનાને પગલે પરીક્ષા તાત્કાલિક અસરથી સ્થગિત કરવામાં આવી છે.

પારદર્શિતા માટે પરીક્ષા મુલતવી
પરીક્ષા પરિષદે સ્પષ્ટ કર્યું છે કે પરીક્ષા પ્રક્રિયામાં પારદર્શિતા અને વિશ્વસનીયતા જાળવવી તેમની પ્રથમ પ્રાથમિકતા છે. તેથી તપાસ પૂર્ણ ન થાય ત્યાં સુધી પરીક્ષા યોજવામાં આવશે નહીં. નવી તારીખ અંગેની માહિતી સત્તાવાર વેબસાઇટ પર જાહેર કરવામાં આવશે.

ડિજિટલ પુરાવાના આધારે તપાસ તેજ
પોલીસે પેપર લીક પાછળ સંડોવાયેલા લોકો સુધી પહોંચવા માટે મોબાઇલ ફોન, દસ્તાવેજો અને અન્ય ડિજિટલ પુરાવાની તપાસ શરૂ કરી છે. આ સમગ્ર નેટવર્ક ઝડપથી ખુલાસો થવાની શક્યતા વ્યક્ત કરવામાં આવી રહી છે.

પરીક્ષા સુરક્ષા પર ફરી સવાલો
તાજેતરના સમયમાં સ્પર્ધાત્મક પરીક્ષાઓમાં પેપર લીકની ઘટનાઓ વધતા પરીક્ષા વ્યવસ્થાની વિશ્વસનીયતા પર ફરી સવાલો ઉઠ્યા છે. NEET બાદ હવે TET પરીક્ષામાં થયેલા લીકે શિક્ષણ વ્યવસ્થાની સુરક્ષા પર ગંભીર ચર્ચા શરૂ કરી છે.

અગાઉ પણ બની હતી આવી ઘટના
ઉલ્લેખનીય છે કે વર્ષ 2025માં પણ મહારાષ્ટ્રના કોલ્હાપુર વિસ્તારમાં TET પેપર લીકનો મામલો સામે આવ્યો હતો. સતત બીજી વખત આવી ઘટના બનતાં પરીક્ષા સિસ્ટમને વધુ કડક બનાવવા માંગ ઉઠી રહી છે.