પુણે: કેતન અગ્રવાલ હત્યાકાંડની તપાસમાં મહત્વપૂર્ણ પ્રગતિ થઈ રહી છે. બુધવારે પુણે ગ્રામ્ય પોલીસે લોહગઢ કિલ્લા પર પહોંચી સમગ્ર ઘટનાક્રમનું પુનઃનિર્માણ (ક્રાઇમ સીન રિકન્સ્ટ્રક્શન) કર્યું હતું. ઘટનાની હકીકત જાણવા માટે પોલીસે કેતન અગ્રવાલની ઊંચાઈ અને વજન જેટલી ફાઇબર ડમીને આશરે 300 ફૂટ ઊંડી ખીણમાં ફેંકી હતી, જેથી ઘટના સમયે શું બન્યું હશે તેની ચોક્કસ માહિતી મળી શકે.

આ પહેલા મંગળવારે પોલીસે કેસના અન્ય આરોપી ચેતન ચૌધરીનું 'ગેટ એનાલિસિસ' (ચાલવાની રીતનું પરીક્ષણ) પણ કર્યું હતું. તપાસ દરમિયાન ઘટના સમયે તેણે પહેરેલું પેન્ટ પણ કબજે કરવામાં આવ્યું છે. પોલીસે ઘટના દિવસે તે કયા માર્ગે ગયો હતો અને તેની હિલચાલ કેવી હતી તેની પણ તપાસ કરી રહી છે.

આ કેસમાં સિયા ગોયલ અને ચેતન ચૌધરી પર 26 વર્ષીય રિયલ એસ્ટેટ વ્યવસાયી કેતન અગ્રવાલની હત્યાનો આરોપ છે. પોલીસના જણાવ્યા મુજબ, બંનેએ 18 જૂને લોહગઢ કિલ્લા પર કેતનની હત્યા કરી હતી.

આ દરમિયાન મહારાષ્ટ્રની એક અદાલતે બંને આરોપીઓના પોલીસ રિમાન્ડમાં વધુ પાંચ દિવસનો વધારો કર્યો છે. પોલીસે કોર્ટમાં જણાવ્યું હતું કે તપાસના અનેક મહત્વપૂર્ણ પાસાઓ હજુ બાકી છે. આરોપીઓની હાજરીમાં ઘટનાસ્થળનું ફરી નિરીક્ષણ, હત્યા બાદ ચેતનની હિલચાલની તપાસ, ફોન પર થયેલી વાતચીતની તપાસ અને કેતનના પાસપોર્ટનો નાશ કરવાના પુરાવા એકત્ર કરવાની કામગીરી હજુ ચાલુ છે.

તપાસમાં સામે આવ્યું છે કે સિયા ગોયલે કથિત રીતે મુંબઈ એરપોર્ટ જતી વખતે રસ્તામાં આવેલા એક ફૂડ મોલ ખાતે કેતનનો પાસપોર્ટ ચોરી લીધો હતો. બાદમાં તેણે પાસપોર્ટ ફાડી બાળી નાખ્યો હતો. લગ્ન પહેલાં પરિવાર બાલી ફરવા જવાનો હતો, પરંતુ એરપોર્ટ પર પાસપોર્ટ ન મળતાં આખી યાત્રા રદ કરવી પડી હતી. પોલીસનું માનવું છે કે બંને સાથે પ્રવાસ પર ન જઈ શકે તે માટે સિયાએ જાણબૂઝીને પાસપોર્ટ હટાવ્યો હતો.

આ કેસમાં પ્રવાસ માટે વાહન ચલાવનારા ડ્રાઇવરે પણ પોલીસને જણાવ્યું હતું કે મુસાફરી દરમિયાન સિયા એકલી પાર્ક કરેલી કાર પાસે ગઈ હતી અને ત્યાંથી કંઈક સામાન લઈને પરત આવી હતી. આ દિશામાં પણ પોલીસે તપાસ તેજ કરી છે.