Iran Operation: ઈરાને એક મોટા સુરક્ષા ઓપરેશનમાં 35 લોકોની ધરપકડ કરવાનો દાવો કર્યો છે, જેમને વિદેશી એજન્સીઓ સાથે જોડાયેલા ગણાવવામાં આવી રહ્યા છે. ઈરાની રાજ્ય મીડિયા ઈસ્લામિક રિપબ્લિક ન્યૂઝ એજન્સી અનુસાર, આ શંકાસ્પદો પર જાસૂસી, હથિયારોની દાણચોરી અને અલગતાવાદી સંગઠનો સાથે સંકળાયેલા હોવાનો આરોપ છે. ઈરાનના ગુપ્તચર મંત્રાલયે જણાવ્યું હતું કે, આ ઓપરેશન દેશના છ અલગ અલગ પ્રાંતોમાં હાથ ધરવામાં આવ્યું હતું.

આ કાર્યવાહીનો હેતુ એકસાથે અનેક રાષ્ટ્રીય સુરક્ષા જોખમોને દૂર કરવાનો હતો. અહેવાલમાં જણાવાયું છે કે, ધરપકડ કરાયેલા કેટલાક વ્યક્તિઓ ઇઝરાયલી ગુપ્તચર એજન્સી, મોસાદ સાથે જોડાયેલા હોઈ શકે છે. આ દાવો એવા સમયે કરવામાં આવ્યો છે, જ્યારે મોસાદના વડા ડેવિડ બાર્નિયાએ તાજેતરમાં ખુલ્લેઆમ કહ્યું હતું કે, તેમની એજન્સીએ તેહરાનના હૃદયમાં કાર્યવાહી કરી હતી.

ઇઝરાયલી મીડિયા અહેવાલો અનુસાર, બાર્નિયાએ કહ્યું હતું કે, તેમની એજન્સીએ લશ્કરી કાર્યવાહી દરમિયાન મહત્વપૂર્ણ ગુપ્ત માહિતી પૂરી પાડી હતી. જેના આધારે મિસાઇલ ઠેકાણાઓને નિશાન બનાવવામાં આવ્યા હતા. તેમણે એ પણ સંકેત આપ્યો હતો કે, આ કામગીરી હજુ પૂરી થઈ નથી. બાર્નિયાએ સ્પષ્ટપણે જણાવ્યું હતું કે, તેમનું મિશન લશ્કરી હુમલાઓ સુધી મર્યાદિત નથી, પરંતુ લાંબા સમય સુધી ચાલુ રહેશે. તેમણે એ પણ સંકેત આપ્યો હતો કે, તેમની વ્યૂહરચનાનો હેતુ ઈરાનની વર્તમાન વ્યવસ્થાને બદલવાનો છે.