અયોધ્યા: ઉત્તર પ્રદેશના મુખ્યમંત્રી યોગી આદિત્યનાથે અયોધ્યામાં આયોજિત જાહેરસભામાં સમાજવાદી પાર્ટી (સપા) અને કોંગ્રેસ પર આકરા પ્રહારો કર્યા હતા. રામ મંદિર અને હનુમાનગઢી સાથે જોડાયેલા મુદ્દાઓનો ઉલ્લેખ કરતાં તેમણે વિરોધ પક્ષો પર આસ્થા સાથે રાજકારણ કરવાનો આરોપ લગાવ્યો હતો.

અયોધ્યાના બીકાપુર વિસ્તારમાં રૂ. 432 કરોડથી વધુના ખર્ચે 217 વિકાસ કાર્યોના લોકાર્પણ અને શિલાન્યાસ પ્રસંગે સંબોધન કરતાં મુખ્યમંત્રીએ જણાવ્યું કે જે લોકો આજે ભગવાન શ્રીરામ અને આસ્થાની વાતો કરે છે, તેઓ જ અગાઉ હનુમાનગઢીની સીડીઓ પર નમાજ પઢાવવાના વિવાદ સાથે જોડાયેલા હતા. તેમણે સવાલ કર્યો કે શું કોઈ સરકાર દિલ્હીની જામા મસ્જિદમાં હનુમાન ચાલીસાનો પાઠ કરાવી શકે?

યોગી આદિત્યનાથે જણાવ્યું કે ડબલ એન્જિન સરકારના કાર્યકાળમાં અયોધ્યાના વિકાસને નવી દિશા મળી છે. આધુનિક માર્ગો, રેલવે કનેક્ટિવિટી, સરયૂ નદીના ઘાટોનું સૌંદર્યીકરણ અને મહર્ષિ વાલ્મીકી આંતરરાષ્ટ્રીય એરપોર્ટ જેવા પ્રોજેક્ટોથી શહેરની ઓળખ વૈશ્વિક સ્તરે મજબૂત બની છે. મુખ્યમંત્રીએ વધુમાં દાવો કર્યો કે અગાઉની સરકારોએ અયોધ્યાના ધાર્મિક અને સાંસ્કૃતિક મહત્વની અવગણના કરી હતી, જ્યારે વર્તમાન સરકારે વિકાસ અને આધ્યાત્મિક વારસાને સાથે લઈને આગળ વધવાનું કામ કર્યું છે.

તેમણે વિપક્ષ પર આરોપ લગાવ્યો કે તેઓ વિકાસના અનેક પ્રોજેક્ટોનો વિરોધ કરતા રહ્યા છે, પરંતુ આજે અયોધ્યા દેશ અને વિશ્વના મહત્વપૂર્ણ આધ્યાત્મિક અને પ્રવાસન કેન્દ્ર તરીકે ઉભરી રહ્યું છે. કાર્યક્રમ દરમિયાન મુખ્યમંત્રીએ વિવિધ સરકારી યોજનાઓના લાભાર્થીઓને સહાય અને મંજૂરીપત્રોનું વિતરણ કર્યું તેમજ પૂર્વ મંત્રી મુન્ના સિંહની પ્રતિમાનું અનાવરણ પણ કર્યું.