West Bengal EVM Fire Incident: પશ્ચિમ બંગાળમાં એક સરકારી ઇમારતમાં લાગેલી ભીષણ આગમાં લગભગ 4,000 ઇલેક્ટ્રોનિક વોટિંગ મશીનો (EVM) બળીને ખાખ થઈ ગયા. આ EVM મશીનોનો ઉપયોગ વિધાનસભા ચૂંટણી દરમિયાન કરવામાં આવ્યો હતો. શુભેન્દુ સરકારનામંત્રી કૌશિક ચૌધરીએ આ માહિતી આપી હતી. તેમણે કહ્યું કે ઘટના સંદર્ભે એફઆઈઆર નોંધ્યા બાદ પોલીસે આ મામલાની તપાસ શરૂ કરી દીધી છે. દક્ષિણ કોલકાતાના અલીપુર વિસ્તારમાં આવેલી નવ માળની એક ઇમારતમાં બુધવારે ભીષણ આગ લાગી હતી, જેમાં દક્ષિણ 24 પરગણા જિલ્લા પરિષદ સહિત અન્ય વિભાગોનું કાર્યાલય હતું.

અગ્નિશામક અને કટોકટી સેવાઓ રાજ્યમંત્રી ચૌધરીએ જણાવ્યું, "આગમાં લગભગ 4,000 EVM બળીને ખાખ થઈ ગયા." આ વર્ષે રાજ્યમાં યોજાયેલી વિધાનસભા ચૂંટણી દરમિયાન 10 મતવિસ્તારોમાં આ EVMનો ઉપયોગ કરવામાં આવ્યો હતો. "આ સામાન્ય આગ લાગતી નથી. અમે તપાસ કરી રહ્યા છીએ કે કોઈ તોડફોડ થઈ હતી કે નહીં. હજુ સુધી સ્પષ્ટ નથી કે આગ નવમા અને દસમા માળે કેવી રીતે પહોંચી,"  ચૌધરીએ ઘટનાસ્થળનું નિરીક્ષણ કર્યા પછી કહ્યું. તેમણે કહ્યું કે આગ સૌપ્રથમ ઇમારતના બીજા અને ત્રીજા માળે જોવા મળી હતી.

મંત્રીએ કહ્યું, "ચોથા, પાંચમા અને છઠ્ઠા માળને અસર કર્યા વિના આગ સાતમા અને આઠમા માળ સુધી કેવી રીતે પહોંચી? સમગ્ર મામલાની તપાસ ચાલી રહી છે."  તેમણે કહ્યું કે તેઓ ઘટના વિશે વધુ સારી માહિતી મેળવવા માટે ફોરેન્સિક રિપોર્ટની રાહ જોઈ રહ્યા છે. દરમિયાન, આગ ફાટી નીકળ્યાના લગભગ 24 કલાક પછી પણ અગ્નિશામકોએ આગ પર કાબુ મેળવવાનું કામ ચાલુ રાખ્યું. જોકે સવારે આગની જ્વાળાઓ દેખાતી ન હતી, અધિકારીઓએ જણાવ્યું હતું કે અન્ય સ્થળોએ પણ આગ ભભૂકી ઉઠવાની શક્યતા નકારી શકાય નહીં. 

ફાયર વિભાગના એક અધિકારીએ જણાવ્યું, "ઇમારતની અંદર કેટલીક જગ્યાએ આગ લાગી છે અને તેને બુઝાવવાની જરૂર છે" "કુલિંગનું કામ ચાલી રહ્યું છે." દરમિયાન, દક્ષિણ 24 પરગણા વહીવટીતંત્રે અલીપોર પોલીસ સ્ટેશનમાં લેખિત ફરિયાદ નોંધાવી છે, જેમાં તપાસની વિનંતી કરવામાં આવી છે. જિલ્લાના અધિક જિલ્લા મેજિસ્ટ્રેટ (ADM) દ્વારા ફરિયાદ દાખલ કરવામાં આવી હતી, જેના પગલે પોલીસે FIR નોંધી હતી અને કેસની તપાસ શરૂ કરી હતી.

'ઈમારત સીલ કરી દેવામાં આવી છે'
તપાસકર્તાઓ એ નક્કી કરવાનો પ્રયાસ કરી રહ્યા છે કે આગ ઇલેક્ટ્રિકલ ખામીને કારણે લાગી હતી કે અન્ય કોઈ કારણસર. અધિકારીઓએ જણાવ્યું હતું કે આગ લાગવાનું ચોક્કસ કારણ હજુ સુધી નક્કી થયું નથી. તપાસકર્તાઓ એ નક્કી કરવાનો પ્રયાસ કરી રહ્યા છે કે આગ અનેક માળ સુધી કેવી રીતે ફેલાઈ તે માટે ઇમારતને સીલ કરી દેવામાં આવી છે અને પ્રવેશ પર પ્રતિબંધ મૂકવામાં આવ્યો છે. પોલીસે ઇમારતની આસપાસ દેખરેખ પણ વધારી દીધી છે.

'તોડફોડની શક્યતા નકારી શકાય નહીં'
અધિકારીઓએ જણાવ્યું હતું કે ફોરેન્સિક નિષ્ણાતો ઘટનાસ્થળે પહોંચે અને આગનું કારણ જાણવા માટે નમૂનાઓ એકત્રિત કરે તેવી અપેક્ષા છે. તેમણે કહ્યું કે ફોરેન્સિક તપાસના પરિણામો એ નક્કી કરવામાં મહત્વપૂર્ણ રહેશે કે આગ આકસ્મિક હતી કે જાણી જોઈને લગાવવામાં આવી હતી. આ ઘટના પર રાજકીય નિવેદનબાજી પણ શરૂ થઈ ગઈ છે. કેન્દ્રીય મંત્રી સુકાંત મજુમદારે કહ્યું કે તોડફોડની શક્યતાને નકારી શકાય નહીં. ભારતીય જનતા પાર્ટી (ભાજપ) ના નેતા રાકેશ સિંહે આરોપ લગાવ્યો કે આગ એક આયોજિત ઘટના હતી. જોકે, તેમણે પોતાના દાવાને સમર્થન આપવા માટે જાહેરમાં કોઈ પુરાવા જાહેર કર્યા નથી.