UMEED Waqf Portal Deadline: દેશભરની વકફ સંપત્તિઓના ડિજિટલ રજિસ્ટ્રેશન માટે શરૂ કરવામાં આવેલા ‘ઉમ્મીદ’ (UMEED) પોર્ટલ માટેની અંતિમ સમયમર્યાદા હવે પૂર્ણ થવા જઈ રહી છે. કેન્દ્રીય અલ્પસંખ્યક કાર્ય મંત્રાલયે સ્પષ્ટ કર્યું છે કે વકફ સંપત્તિઓની નોંધણી અને રેકોર્ડમાં સુધારા માટે 30 જૂન અંતિમ દિવસ રહેશે. આ પછી નવા ડેટા અપલોડ કરવાની પ્રક્રિયા બંધ કરી દેવામાં આવશે.

મંત્રાલયના આંકડા મુજબ દેશભરમાં નોંધાયેલ લગભગ 7.95 લાખ વકફ સંપત્તિઓમાંથી 5.87 લાખથી વધુ સંપત્તિઓનો ડેટા ઉમ્મીદ પોર્ટલ પર અપલોડ કરવામાં આવ્યો છે. જોકે હજુ પણ આશરે 1.20 લાખ સંપત્તિઓ ચકાસણી પ્રક્રિયામાં છે. બીજી તરફ, ડુપ્લિકેટ રેકોર્ડ, અધૂરા દસ્તાવેજો, ડેટાની ભૂલો અથવા અન્ય ટેક્નિકલ કારણોસર 88 હજારથી વધુ એન્ટ્રીઓ નામંજૂર કરવામાં આવી છે.

કેન્દ્રીય અલ્પસંખ્યક કાર્ય મંત્રાલયે તમામ વકફ સંસ્થાઓ અને સંબંધિત બોર્ડોને 30 જૂન પહેલાં નોંધણી અને જરૂરી સુધારાઓ પૂર્ણ કરવા અપીલ કરી છે. વકફ ટ્રિબ્યુનલ દ્વારા આપવામાં આવેલી વધારાની છ મહિનાની મુદત પણ હવે પૂર્ણ થઈ રહી છે. ઉલ્લેખનીય છે કે 6 જૂન 2025ના રોજ કેન્દ્રીય અલ્પસંખ્યક કાર્ય મંત્રી દ્વારા ‘ઉમ્મીદ’ પોર્ટલ લોન્ચ કરવામાં આવ્યું હતું. Unified Waqf Management, Empowerment, Efficiency and Development (UMEED) અંતર્ગત દેશભરની વકફ સંપત્તિઓને એક જ ડિજિટલ પ્લેટફોર્મ પર લાવવાનો પ્રયાસ કરવામાં આવ્યો છે.

નવી જોગવાઈઓ અનુસાર દરેક વકફ સંપત્તિનું જિયો-ટેગિંગ ફરજિયાત બનાવવામાં આવ્યું છે અને તેની સંપૂર્ણ વિગતો ઓનલાઈન જાહેર કરવી પડશે. ઉપરાંત, મહિલાઓના નામે નોંધાયેલી અથવા જ્યાં મહિલાઓ કાનૂની વારસદાર હોય તેવી સંપત્તિઓને વકફ સંપત્તિ તરીકે જાહેર કરી શકાશે નહીં. સરકારે સ્પષ્ટ કર્યું છે કે સંપત્તિના રજિસ્ટ્રેશનની જવાબદારી મુતવલ્લી (મેનેજર)ની રહેશે, જ્યારે રાજ્ય વકફ બોર્ડો નોંધણી પ્રક્રિયામાં ટેક્નિકલ સહાય પૂરી પાડશે. હવે 30 જૂન બાદ પોર્ટલ પર નવા રજિસ્ટ્રેશન માટેની વિન્ડો બંધ થવાની હોવાથી બાકી રહેલા તમામ રેકોર્ડ તાત્કાલિક પૂર્ણ કરવા પર ભાર મૂકવામાં આવી રહ્યો છે.