Karnataka CM Change: ગુરુવાર કર્ણાટકના રાજકારણમાં મોટા રાજકીય ઉથલપાથલનો દિવસ બની શકે છે. મુખ્યમંત્રી સિદ્ધારમૈયા મુખ્યમંત્રી પદેથી રાજીનામું આપવાના છે. રાજધાની બેંગલુરુમાં મિશ્ર લાગણીઓ જોવા મળી રહી છે. એક તરફ મુખ્યમંત્રી સિદ્ધારમૈયાના સમર્થકો છે, તો બીજી તરફ ડીકે શિવકુમારના સમર્થકો તેમના સંભવિત રાજ્યાભિષેકની અપેક્ષામાં વ્યસ્ત છે.

સિદ્ધારમૈયાના નિવાસસ્થાને બ્રેકફાસ્ટ મીટિંગ
આ સમગ્ર રાજકીય ચર્ચાઓ વચ્ચે સિદ્ધારમૈયાએ પોતાના નિવાસસ્થાને કેબિનેટ મંત્રીઓ સાથે મહત્વપૂર્ણ બ્રેકફાસ્ટ મીટિંગ યોજી હતી. સૂત્રો અનુસાર, આ બેઠક દરમિયાન જ તેમણે પોતાના રાજીનામા અંગે સંકેત આપ્યા હોવાનું કહેવાઈ રહ્યું છે.

બપોરે 3 વાગ્યે રાજીનામું આપી શકે છે
સૂત્રોના જણાવ્યા અનુસાર, સિદ્ધારમૈયા બપોરે લગભગ 3 વાગ્યે મુખ્યમંત્રી પદ પરથી રાજીનામું આપી શકે છે. જોકે, સવારે એવી ચર્ચા હતી કે તેઓ સવારે 11 વાગ્યે રાજભવન પહોંચીને રાજીનામું આપશે, પરંતુ બાદમાં ખબર પડી કે રાજ્યપાલ બેંગલુરુમાં હાજર નથી. ત્યારબાદ રાજકીય ઘટનાઓએ એક નવો વળાંક લીધો. આ દરમિયાન, નાયબ મુખ્યમંત્રી ડીકે શિવકુમાર પણ બેંગલુરુ પહોંચ્યા.

બંને નેતાઓએ એકબીજાને ગળે લગાવ્યા
એરપોર્ટથી સીધા મુખ્યમંત્રીના નિવાસસ્થાને જવાની અટકળો વચ્ચે, ડીકે શિવકુમાર અને સિદ્ધારમૈયા વચ્ચેની મુલાકાતે ધ્યાન ખેંચ્યું. બંને નેતાઓએ એકબીજાને ભેટી પડ્યા, એકતાનો સંકેત આપ્યો. ભાવનાત્મક વાતાવરણ વચ્ચે, ડીકે શિવકુમારે સિદ્ધારમૈયાના ચરણ સ્પર્શ કર્યા અને તેમના આશીર્વાદ માંગ્યા.

ઇડલી-વડા સાથે રાજકીય સંદેશ 
બ્રેકફાસ્ટ મીટિંગમાં ઈડલી, વડા અને ચૌ-ચૌ બાથ પીરસવામાં આવ્યા હતા, પરંતુ રાજકીય સંદેશ વધુ મહત્વનો માનવામાં આવ્યો હતો. કહેવાઈ રહ્યું છે કે બેઠક દરમિયાન વાતાવરણ ભાવુક બની ગયું હતું અને DK શિવકુમારની આંખો પણ ભીની થઈ ગઈ હતી.

DK શિવકુમારના નિવાસસ્થાને વધારાઈ સુરક્ષા
બીજી તરફ DK શિવકુમારના નિવાસસ્થાને પણ ભારે હલચલ જોવા મળી રહી છે. ત્યાં બેરિકેડિંગ કરવામાં આવી રહી છે અને મીડિયા તેમજ સામાન્ય લોકો માટે અલગ વ્યવસ્થાઓ ગોઠવાઈ રહી છે. પોલીસ બંદોબસ્ત પણ વધારવામાં આવ્યો છે.

આગામી CM કોણ?
કર્ણાટક કોંગ્રેસમાં લાંબા સમયથી નેતૃત્વ પરિવર્તનની ચર્ચાઓ ચાલી રહી છે. માનવામાં આવે છે કે કોંગ્રેસ હાઈકમાન્ડે રાજકીય સંતુલન અને સંગઠનાત્મક સમીકરણોને ધ્યાનમાં રાખીને આ ફેરફારનો નિર્ણય લીધો છે. જોકે હજુ સુધી કોંગ્રેસ તરફથી કોઈ સત્તાવાર જાહેરાત કરવામાં આવી નથી.