Delhi Govt Bakrid Guidelines Qurbani Ban: દિલ્હી સરકારે બકરી ઇદ (ઈદ-ઉલ-અઝહા) અંગે નવી ગાઇડલાઇન જારી કરી છે. સરકારે સ્પષ્ટપણે કહ્યું છે કે રસ્તાઓ, શેરીઓ અને જાહેર સ્થળોએ બલિ ચઢાવવાની મંજૂરી આપવામાં આવશે નહીં અને નિયમો તોડનારાઓ સામે કાયદેસરની કાર્યવાહી કરવામાં આવશે. 
 
આ પ્રતિબંધિત પશુઓની કુરબાની પર સંપૂર્ણ રોક
દિલ્હી સરકારે પોતાની એડવાઇઝરીમાં સ્પષ્ટ કર્યું છે કે ગાય, વાછરડું, ઊંટ અને અન્ય કાયદાકીય રીતે પ્રતિબંધિત પશુઓની કુરબાની આપવી સંપૂર્ણપણે ગેરકાનૂની છે. જો કોઈ વ્યક્તિ આવા પ્રતિબંધિત પશુઓની કુરબાની આપતા પકડાશે, તો તેની સામે કડક કલમો હેઠળ ગુનાહિત કેસ દાખલ કરવામાં આવશે.

જાહેર સ્થળો પર કુરબાની નહીં, માત્ર નિયત જગ્યાએ જ મંજૂરી
નવી ગાઇડલાઇન અનુસાર, દિલ્હીના કોઈપણ સાર્વજનિક પાર્ક, મુખ્ય માર્ગો, ધાર્મિક સ્થળોની બહાર ખુલ્લી જગ્યાઓ કે રહેણાંક વિસ્તારોની શેરીઓમાં કુરબાની આપવાની મંજૂરી આપવામાં આવશે નહીં. કુરબાનીની આ પ્રક્રિયા માત્ર પ્રશાસન દ્વારા નક્કી કરાયેલી અધિકૃત અને બંધ જગ્યાઓ પર જ કરી શકાશે.

કચરો કે અવશેષો ફેલાવ્યા તો ખેર નથી
સ્વચ્છતાના મુદ્દે સરકારે કડક વલણ અપનાવ્યું છે. કુરબાની બાદ પશુઓના અવશેષો અને કચરાને ખુલ્લામાં, સીવર લાઇન કે જાહેર નાળાઓમાં ફેંકવા પર સંપૂર્ણ પ્રતિબંધ લગાવાયો છે. વહીવટીતંત્રે તમામ નાગરિકોને તહેવાર દરમિયાન સફાઈનું ખાસ ધ્યાન રાખવા અપીલ કરી છે.

પોલીસ અને તંત્રને એલર્ટ રહેવા આદેશ
દિલ્હી સરકારના મંત્રી કપિલ મિશ્રાએ ઉચ્ચ અધિકારીઓ સાથે બેઠક યોજીને ગેરકાયદે પશુ પરિવહન, નિયમ વિરુદ્ધ થતી કુરબાની અને પશુ ક્રૂરતાની ઘટનાઓ રોકવા માટે પોલીસ અને સ્થાનિક પ્રશાસનને સઘન ચેકિંગ અને કડક કાર્યવાહી કરવાના આદેશ આપ્યા છે. સરકારે અપીલ કરી છે કે તમામ લોકો શાંતિપૂર્ણ રીતે નિયમોનું પાલન કરીને તહેવારની ઉજવણી કરે. કાયદો હાથમાં લેનારા તત્વો સામે પોલીસ સહેજ પણ નરમાશ રાખશે નહીં.