પ્રખ્યાત ફિલ્મ નિર્દેશક ઇમ્તિયાઝ અલીનું એક નિવેદન હાલ સોશિયલ મીડિયા પર ભારે ચર્ચામાં છે. પોતાની નવી ફિલ્મ "મે વાપીસ આઉંગા" (Main Vaapas Aaunga)ને મળી રહેલા સકારાત્મક પ્રતિસાદ વચ્ચે તેમણે પોતાની કલ્ટ ક્લાસિક ફિલ્મ 'જબ વી મેટ' અંગે એવો ખુલાસો કર્યો છે, જેને લઈને ચાહકોમાં નવાઈ જોવા મળી રહી છે. ઇમ્તિયાઝ અલીના કહેવા મુજબ, 'જબ વી મેટ' તેમના માટે ક્યારેય પરંપરાગત લવ સ્ટોરી નહોતી.

તાજેતરમાં એક ઇન્ટરવ્યુ દરમિયાન ઇમ્તિયાઝ અલીએ જણાવ્યું કે તેઓ પોતાની ફિલ્મો પ્રેમને કેન્દ્રમાં રાખીને બનાવતા નથી. તેમના અનુસાર, દરેક ફિલ્મ તેમની અંદરની કોઈ લાગણી, મૂંઝવણ અથવા જીવનના અનુભવમાંથી જન્મે છે. તેમણે કહ્યું કે તેમની પહેલી ફિલ્મ 'સોચા ના થા' પણ તેમની પોતાની માનસિક મૂંઝવણનું પ્રતિબિંબ હતી.

'જબ વી મેટ' વિશે વાત કરતાં ઇમ્તિયાઝે કહ્યું કે આ ફિલ્મ બે એવા અજાણ્યા લોકોની કહાની છે, જે એકબીજાને મળ્યા પછી ધીમે ધીમે બદલાતા જાય છે અને એકબીજાને વધુ સારી રીતે સમજવા લાગે છે. તેમના મતે, ફિલ્મનો મૂળ ભાવ પ્રેમ નહીં પરંતુ આત્મ-શોધ અને વ્યક્તિગત વિકાસ હતો. બંને પાત્રો એકબીજાને પૂર્ણતા તરફ લઈ જાય છે અને જીવનને નવા દૃષ્ટિકોણથી જોવાનું શીખવે છે.

ઇમ્તિયાઝ અલીએ વધુમાં સ્વીકાર્યું કે તે સમય દરમિયાન તેઓ પોતે પણ પ્રેમને સંપૂર્ણ રીતે સમજવાની સ્થિતિમાં નહોતા. તેથી ફિલ્મ બનાવતી વખતે તેમનો મુખ્ય ઉદ્દેશ પ્રેમની વ્યાખ્યા આપવાનો નહોતો.

તેમની નવી ફિલ્મ "મે વાપીસ આઉંગા" વિશે વાત કરતાં તેમણે જણાવ્યું કે ભાગલાના સમયમાં જીવેલા લોકો સાથે થયેલી વાતચીતે તેમને ખૂબ પ્રેરિત કર્યા. એટલી પીડા અને સંઘર્ષ વચ્ચે પણ માનવતાની આશા અને જીવવાની ઇચ્છા કેવી રીતે ટકી રહે છે, તે વિચાર પરથી ફિલ્મનું નિર્માણ કરવામાં આવ્યું છે.

ઇમ્તિયાઝ અલીનું આ નિવેદન ફરી એકવાર દર્શાવે છે કે તેમની ફિલ્મો માત્ર પ્રેમકથાઓ નહીં, પરંતુ માનવીય લાગણીઓ અને જીવનના ઊંડા અનુભવોની અભિવ્યક્તિ છે.