Warship Series: દ્વિતીય વિશ્વયુદ્ધ દરમિયાન જર્મનીના સૌથી શક્તિશાળી યુદ્ધજહાજ બિસમાર્કે થોડા જ દિવસોમાં બ્રિટિશ નૌકાદળને ભારે પડકાર આપ્યો હતો. પરંતુ આખરે તેને ડૂબાડવા માટે બ્રિટને લગભગ 50 યુદ્ધજહાજો, અનેક વિમાનો અને ત્રણ દિવસ સુધી ચાલેલું વિશાળ અભિયાન ચલાવવું પડ્યું હતું.

ફેબ્રુઆરી 1939માં જર્મનીના હેમ્બર્ગમાં લોન્ચ કરાયેલું 823 ફૂટ લાંબું બિસ્માર્ક તે સમયના સૌથી આધુનિક અને શક્તિશાળી યુદ્ધજહાજોમાં ગણાતું હતું. એડોલ્ફ હિટલરની આશા હતી કે આ જહાજ જર્મન નૌકાદળની શક્તિનું પ્રતિક બનશે. મે 1941માં તેને એટલાન્ટિક મહાસાગરમાં મિત્ર દેશોના વેપારી જહાજો અને બ્રિટનની સપ્લાય લાઇનોને નિશાન બનાવવા મોકલવામાં આવ્યું.

24 મે, 1941ના રોજ ડેનમાર્ક સ્ટ્રેટ નજીક બિસ્માર્કનો સામનો બ્રિટિશ નૌકાદળના ગૌરવ ગણાતા યુદ્ધજહાજ HMS Hood અને Prince of Wales સાથે થયો. ભીષણ ગોળીબારમાં બિસ્માર્કનો એક ઘાતક ગોળો HMS Hoodના દારૂગોળા ભંડાર સુધી પહોંચ્યો, જેના કારણે જબરદસ્ત વિસ્ફોટ થયો. થોડા જ પળોમાં HMS Hood સમુદ્રમાં સમાઈ ગયું. જહાજમાં સવાર 1,418 લોકોમાંથી માત્ર ત્રણ જ બચી શક્યા.

આ ઘટનાએ સમગ્ર બ્રિટનને હચમચાવી દીધું. ત્યારબાદ બ્રિટિશ નૌકાદળને એક જ આદેશ મળ્યો – “બિસ્માર્કને કોઈપણ કિંમતે નષ્ટ કરો.” લગભગ 50 યુદ્ધજહાજો અને સહાયક વહાણોને તેના શિકાર માટે તૈનાત કરવામાં આવ્યા. ત્રણ દિવસ સુધી એટલાન્ટિકમાં બિસ્માર્કનો પીછો કરવામાં આવ્યો.

26 મેના રોજ HMS Ark Royal પરથી ઉડાન ભરેલા Swordfish વિમાનોના ટોર્પીડો હુમલાએ બિસ્માર્કના રડરને નુકસાન પહોંચાડ્યું. પરિણામે જહાજની દિશા નિયંત્રિત કરવાની ક્ષમતા લગભગ ખતમ થઈ ગઈ અને તે ખુલ્લા સમુદ્રમાં ફસાઈ ગયું.

27 મેની સવારે HMS King George V અને HMS Rodney સહિતના બ્રિટિશ યુદ્ધજહાજોએ અંતિમ હુમલો શરૂ કર્યો. આશરે 90 મિનિટ સુધી ચાલેલી ભીષણ લડાઈમાં બિસ્માર્ક પર 700થી વધુ ગોળા વરસાવવામાં આવ્યા. ભારે નુકસાન બાદ જર્મન ક્રૂએ જહાજને સ્વયં ડૂબાડવાનો નિર્ણય લીધો. સવારે 10:36 વાગ્યે બિસ્માર્ક ઉત્તર એટલાન્ટિકના ગહન પાણીમાં સમાઈ ગયું.

બિસ્માર્કના ડૂબવાથી માત્ર એક યુદ્ધજહાજનો અંત આવ્યો નહોતો, પરંતુ વિશ્વને એ પણ સમજાયું કે હવે સમુદ્રી યુદ્ધોમાં વિમાનવાહક જહાજો અને નૌકાદળના વિમાનોનું યુગ શરૂ થઈ ચૂક્યું હતું.