મુંબઈ: સપ્તાહના પ્રથમ ટ્રેડિંગ સેશનમાં ભારતીય શેરબજારમાં નબળાઈ જોવા મળી હતી. દિવસ દરમિયાન ભારે ઉતાર-ચઢાવ વચ્ચે અંતે બજાર લાલ નિશાનમાં બંધ થયું. ઓટો, બેન્કિંગ અને IT સેક્ટરમાં વેચવાલી વધતા રોકાણકારોનું સેન્ટિમેન્ટ નબળું પડ્યું અને મુખ્ય સૂચકાંકોમાં ઘટાડો નોંધાયો. કારોબાર પૂર્ણ થતાં BSE સેન્સેક્સ 372.10 પોઈન્ટ અથવા 0.48 ટકા ઘટીને 76,728.37 પર બંધ થયો, જ્યારે NSE નિફ્ટી 109.75 પોઈન્ટ અથવા 0.46 ટકા ઘટીને 23,946.25 પર બંધ રહ્યો. નિફ્ટી ફરી એકવાર 24,000ના મહત્વના સ્તરથી નીચે સરકી ગયો. બજારમાં વ્યાપક વેચવાલીનું ચિત્ર જોવા મળ્યું હતું. કુલ 2,472 શેરોમાં ઘટાડો નોંધાયો જ્યારે માત્ર 1,681 શેરો જ વધારા સાથે બંધ થયા હતા. જેના કારણે રોકાણકારોમાં સાવચેતીનું વાતાવરણ જોવા મળ્યું.

ઓટો અને બેન્કિંગ શેરોમાં ભારે દબાણ
સોમવારના સેશનમાં સૌથી વધુ અસર ઓટો સેક્ટર પર જોવા મળી હતી. માંગમાં ઘટાડાની ચિંતા અને નફાવસૂલીએ ઓટો શેરોને અસર કરી હતી. મહિન્દ્રા એન્ડ મહિન્દ્રા, ટાટા મોટર્સ, બજાજ ઓટો અને આયશર મોટર્સ જેવા શેરોમાં 1 થી 2 ટકા સુધીનો ઘટાડો નોંધાયો હતો. બેન્કિંગ સેક્ટરમાં પણ વેચવાલી જોવા મળી હતી. કોટક મહિન્દ્રા બેન્ક સહિત અનેક ખાનગી બેન્કોના શેરો દબાણમાં રહ્યા હતા. બીજી તરફ IT સેક્ટરમાં TCS અને Infosys જેવા દિગ્ગજ શેરોમાં પણ ઘટાડો નોંધાયો હતો. ખાસ કરીને Persistent Systems ના શેરોમાં લગભગ 10 ટકાનો મોટો ઘટાડો થતાં સમગ્ર IT સેક્ટર પર દબાણ વધ્યું હતું.

ફાર્મા અને હેલ્થકેર સેક્ટરે બચાવ્યો બજાર
એક તરફ ઓટો અને IT સેક્ટરમાં નબળાઈ જોવા મળી હતી ત્યારે બીજી તરફ ફાર્મા અને હેલ્થકેર શેરોએ બજારને થોડો ટેકો આપ્યો હતો. ડૉ. રેડ્ડીઝ લેબોરેટરીઝ ના શેરોમાં 4 ટકાથી વધુનો ઉછાળો નોંધાયો હતો. આ ઉપરાંત સિપ્લા, સન ફાર્મા, મેક્સ હેલ્થકેર, એપોલો હોસ્પિટલ્સ, ટોરેન્ટ ફાર્મા અને ગ્લેનમાર્ક ફાર્મા જેવા શેરોમાં પણ તેજી જોવા મળી હતી. જેના કારણે નિફ્ટી ફાર્મા અને હેલ્થકેર ઇન્ડેક્સ વધારા સાથે બંધ થયા હતા.

બજારમાં ઘટાડાનું કારણ શું?
બજાર નિષ્ણાતોના મતે છેલ્લા બે દિવસની તેજી બાદ રોકાણકારોએ નફાવસૂલી કરી હતી. ઉપરાંત ઓટો અને IT સેક્ટરમાં વેચવાલી વધતા મુખ્ય સૂચકાંકો પર દબાણ વધ્યું હતું. કેટલીક કંપનીઓના ઊંચા વેલ્યુએશન અને વૈશ્વિક સ્તરે રહેલી અનિશ્ચિતતાઓને કારણે પણ રોકાણકારો સાવચેત રહ્યા હતા.