બાંગ્લાદેશમાં હિંદુ ધાર્મિક અને સાંસ્કૃતિક વારસાને લઈને નવી ચિંતાઓ ઉભી થઈ છે. ગાઇબાંધા જિલ્લામાં નિર્માણાધીન વિશાળ હિંદુ ધાર્મિક પરિસરના કામને રોકવામાં આવ્યું હોવાની માહિતી સામે આવી છે, જ્યારે બોગરા જિલ્લાના શિબગંજ ઉપજિલાનું નામ બદલવાની પ્રક્રિયાને લઈને પણ વિવાદ સર્જાયો છે.

ગાઇબાંધાના રામચંદ્રપુર ગામમાં વિકસાવવામાં આવી રહેલું આ ધાર્મિક પરિસર દેશના મહત્વપૂર્ણ હિંદુ આસ્થા કેન્દ્રોમાંનું એક બનવાની દિશામાં આગળ વધી રહ્યું હતું. પરિસરની સૌથી મોટી ઓળખ 50 ફૂટ ઊંચી ભગવાન કૃષ્ણની પ્રતિમા છે, જેનું ઉદ્ઘાટન નવેમ્બર 2025માં કરવામાં આવ્યું હતું. આ સ્થળે દેશના વિવિધ વિસ્તારોમાંથી શ્રદ્ધાળુઓ અને પ્રવાસીઓ પહોંચતા હતા. લાંબા ગાળાની યોજનામાં ભગવાન રામ, ભગવાન શિવ સહિત કુલ 144 પ્રતિમાઓ અને અન્ય ધાર્મિક-સાંસ્કૃતિક માળખાં ઊભાં કરવાની યોજના હતી.

સ્થાનિક અહેવાલો અનુસાર, કેટલાક કટ્ટરપંથી જૂથોના વિરોધ અને વધતા દબાણને કારણે પરિસર સાથે જોડાયેલા નિર્માણ કાર્યો હાલ સ્થગિત કરવામાં આવ્યા છે. બીજી તરફ, શિબગંજ ઉપજિલાનું નામ બદલીને “મહાસ્થાન ઉપજિલા” કરવાની ચર્ચાએ પણ નવો વિવાદ ઉભો કર્યો છે. શિબગંજ નામ ભગવાન શિવ સાથે જોડાયેલું માનવામાં આવે છે, જેના કારણે નામ પરિવર્તનને હિંદુ ઓળખ સાથે સંકળાયેલા ઐતિહાસિક પ્રતીકોને દૂર કરવાનો પ્રયાસ ગણાવીને ટીકા થઈ રહી છે.

અલ્પસંખ્યક હિંદુ સમુદાય અને માનવ અધિકાર કાર્યકર્તાઓએ આ ઘટનાઓ અંગે ચિંતા વ્યક્ત કરી છે. તેમનું કહેવું છે કે દેશની બહુસાંસ્કૃતિક અને બહુધાર્મિક ઓળખ જાળવવા માટે તમામ સમુદાયોની ધાર્મિક અને સાંસ્કૃતિક વારસાને સમાન સુરક્ષા મળવી જોઈએ. સરકારને નફરતભર્યા પ્રચાર અને સાંપ્રદાયિક ઉશ્કેરણ સામે કડક પગલાં લેવા અપીલ કરવામાં આવી રહી છે.