અંબાજી: અંબાજીના 8 નંબર વિસ્તારમાં પોલીસની PCR વાન પર બે અસામાજિક તત્ત્વોએ હુમલો કરતાં ચકચાર મચી ગઈ હતી. આરોપીઓએ પોલીસ કર્મચારીઓ પર પથ્થરમારો અને લાકડીઓ વડે હુમલો કર્યો હતો. આ હુમલામાં PCR વાનને ભારે નુકસાન પહોંચ્યું હતું. સ્થાનિક લોકોના હસ્તક્ષેપથી પોલીસ કર્મચારીઓને બચાવી લેવામાં આવ્યા હતા. ઘટનાને પગલે વિસ્તારમાં ભય અને તણાવનો માહોલ સર્જાયો હતો.

મળતી માહિતી મુજબ, અંબાજીના 8 નંબર વિસ્તારમાં બે અસામાજિક તત્ત્વો દ્વારા લાંબા સમયથી આતંક મચાવવામાં આવી રહ્યો હોવાની પોલીસને બાતમી મળી હતી. આ બાતમીના આધારે પોલીસની ટીમ કાર્યવાહી માટે સ્થળ પર પહોંચી હતી.

પોલીસ સ્થળ પર પહોંચતા જ બંને શખ્સોએ ઉશ્કેરાઈ જઈ પોલીસ કર્મચારીઓ પર પથ્થરમારો શરૂ કરી દીધો હતો. એટલું જ નહીં, લાકડીઓ વડે હુમલો કરીને પોલીસની PCR વાનને પણ નુકસાન પહોંચાડ્યું હતું. અચાનક બનેલી ઘટનાથી થોડા સમય માટે અફરાતફરીનો માહોલ સર્જાયો હતો.

ઘટનાની જાણ થતાં આસપાસના સ્થાનિક લોકો સ્થળ પર દોડી આવ્યા હતા અને પોલીસની મદદ કરી હતી. સ્થાનિકોના હસ્તક્ષેપ બાદ સ્થિતિ કાબૂમાં આવી હતી. જોકે, બંને આરોપીઓ ઘટનાસ્થળેથી ફરાર થઈ ગયા હતા.

હાલ પોલીસે આરોપીઓ સામે ગુનો નોંધી તેમની શોધખોળ શરૂ કરી છે. આ ઘટનાને પગલે સ્થાનિકોમાં સુરક્ષાને લઈને ચિંતા જોવા મળી રહી છે.