અમદાવાદ અમદાવાદમાં વિશ્વની સર્વપ્રથમ વર્લ્ડ યોગાસન ચેમ્પિયનશિપ 2026નો ભવ્ય પ્રારંભ થયો હતો. આ ઐતિહાસિક સ્પર્ધાનો શુભારંભ દેશના વડાપ્રધાન Narendra Modiએ વર્ચ્યુઅલ માધ્યમથી ઉપસ્થિત રહીને કરાવ્યો હતો. કાર્યક્રમ દરમિયાન યોગગુરુ Swami Ramdevના સાનિધ્યનો લાભ પણ ઉપસ્થિતોને મળ્યો હતો.

વિશ્વસ્તરની આ પ્રથમ યોગાસન ચેમ્પિયનશિપમાં 77થી વધુ દેશોના ખેલાડીઓ અને સ્પર્ધકો ઉત્સાહભેર ભાગ લઈ રહ્યા છે. યોગાસનને વૈશ્વિક રમત તરીકે વધુ ઓળખ અપાવવાના ઉદ્દેશ સાથે આયોજિત આ ચેમ્પિયનશિપને લઈને ખેલાડીઓમાં વિશેષ ઉત્સાહ જોવા મળી રહ્યો છે.

આ પ્રસંગે વડાપ્રધાન નરેન્દ્ર મોદીએ પોતાના પ્રેરણાદાયી સંદેશમાં તમામ સ્પર્ધકોને શુભેચ્છાઓ પાઠવી હતી અને યોગને રોજિંદા જીવનનો અભિન્ન ભાગ બનાવવા માટે વિશ્વભરના લોકોને આહવાન કર્યું હતું. તેમણે યોગને શારીરિક, માનસિક અને આધ્યાત્મિક સ્વાસ્થ્ય માટે અત્યંત મહત્વપૂર્ણ ગણાવ્યું હતું.

અમદાવાદના આંગણે યોજાયેલી આ ઐતિહાસિક સ્પર્ધા ભારત માટે ગૌરવની ક્ષણ બની છે અને યોગને વૈશ્વિક મંચ પર નવી ઓળખ અપાવશે તેવી આશા વ્યક્ત કરવામાં આવી રહી છે.