જ્યાં વધુ વૃક્ષો હોય છે ત્યાં રહેતા વૃદ્ધોમાં ડિપ્રેશનનું જોખમ ઓછું, અભ્યાસમાં ખુલાસો

વધુ વૃક્ષો અને હરિયાળી ધરાવતા વિસ્તારોમાં રહેતા વૃદ્ધોમાં વધતી ઉંમર સાથે ડિપ્રેશનના લક્ષણોનું પ્રમાણ ઓછું રહેવાની શક્યતા હોય છે. ઓસ્ટ્રેલિયામાં લાંબા સમય સુધી હાથ ધરાયેલા એક અભ્યાસમાં આ મહત્વપૂર્ણ ખુલાસો થયો છે. અભ્યાસના તારણો દર્શાવે છે કે શહેરોના આયોજનમાં વૃક્ષો અને હરિયાળા વિસ્તારોને પ્રાધાન્ય આપવાથી વૃદ્ધોના માનસિક સ્વાસ્થ્યને સુધારવામાં મદદ મળી શકે છે.

ન્યૂ સાઉથ વેલ્સ યુનિવર્સિટીના સિડની સેન્ટર ફોર હેલ્ધી બ્રેઇન એજિંગ (CHEBA) અને ઓસ્ટ્રેલિયન કેથોલિક યુનિવર્સિટીના સહયોગથી આ અભ્યાસ હાથ ધરવામાં આવ્યો હતો. ‘જર્નલ ઓફ અફેક્ટિવ ડિસઓર્ડર્સ’માં પ્રકાશિત થયેલા આ સંશોધનમાં 70થી 90 વર્ષની ઉંમરના 1,000થી વધુ ઓસ્ટ્રેલિયન વૃદ્ધોને સામેલ કરવામાં આવ્યા હતા. સંશોધકોએ 12 વર્ષ સુધી તેમના સ્વાસ્થ્ય અને આસપાસના પર્યાવરણનો અભ્યાસ કર્યો હતો.

અભ્યાસમાં જાણવા મળ્યું કે જે લોકો વૃક્ષોની વધુ છાયા અને હરિયાળી ધરાવતા વિસ્તારોમાં રહેતા હતા, તેમનામાં સમય જતાં ડિપ્રેશનના લક્ષણો ઓછા જોવા મળ્યા હતા. સંશોધકોએ વૃક્ષોની છતરી, પાર્ક, સમુદ્ર, નદીઓ અને તળાવો સુધી પહોંચ, જરૂરી સેવાઓની ઉપલબ્ધતા તેમજ વાયુ પ્રદૂષણ જેવા પરિબળોનો પણ અભ્યાસ કર્યો હતો.

જોકે, પાર્ક, બ્લૂ સ્પેસ, સેવાઓની ઉપલબ્ધતા અથવા ઓછા વાયુ પ્રદૂષણની ડિપ્રેશન પર સતત અસર જોવા મળી નહોતી. સંશોધકોએ શહેરોમાં વધુ વૃક્ષો વાવવા અને હરિયાળા વિસ્તારો વિકસાવવાની જરૂરિયાત પર ભાર મૂક્યો છે.