સુરત: શહેરમાં દેશનું પ્રથમ બેરિયરલેસ ટોલનાકું તૈયાર થયું છે. કામરેજ-ચોર્યાસી ટોલનાકા પર આજ રાત્રે 12 વાગ્યાથી આ નવી સિસ્ટમ શરૂ થશે.

આ નવી વ્યવસ્થામાં વાહનચાલકોને ટોલ ચૂકવવા માટે ગાડી રોકવાની જરૂર રહેશે નહીં. હાઈટેક કેમેરા દ્વારા વાહનના નંબર પ્લેટ સ્કેન કરીને ટોલની રકમ સીધી ખાતામાંથી કપાઈ જશે.

તાઈવાનની લેટેસ્ટ ટેકનોલોજીથી તૈયાર કરાયેલા આ ટોલનાકાથી સમય અને ઈંધણ બંનેમાં બચત થશે. જો કોઈ વાહનમાં પૂરતી રકમ નહીં હોય તો વાહનમાલિકને ઈ-નોટિસ મોકલવામાં આવશે. સાથે જ 350 રૂપિયાનું માસિક પાસ પણ ઉપલબ્ધ કરાયું છે.

માહિતી મુજબ કામરેજ ટોલનાકા પરથી રોજના અંદાજે 40 હજારથી વધુ વાહનો પસાર થાય છે, જેના કારણે લાંબી લાઈનો લાગતી હતી. નવી સિસ્ટમથી ટ્રાફિક સમસ્યા ઘટશે અને મુસાફરી વધુ સરળ બનશે.