હ્રદય સંબંધિત બીમારીઓના કેસોમાં સતત વધારો થઈ રહ્યો છે અને હાર્ટ એટેક હવે માત્ર વૃદ્ધોમાં જ નહીં પરંતુ યુવાનોમાં પણ જોવા મળી રહ્યો છે. આરોગ્ય નિષ્ણાતોના અનુસાર હાર્ટ એટેક ઘણીવાર અચાનક આવે છે એવું લાગે છે, પરંતુ શરીર અગાઉથી કેટલાક મહત્વપૂર્ણ સંકેતો આપતું હોય છે. આ લક્ષણોને સમયસર ઓળખીને તાત્કાલિક સારવાર શરૂ કરવામાં આવે તો દર્દીનો જીવ બચાવી શકાય છે.

વિશ્વ આરોગ્ય સંસ્થા (WHO) અનુસાર છાતીમાં દુખાવો, દબાણ અથવા જકડાણ હાર્ટ એટેકનું સૌથી સામાન્ય લક્ષણ છે. કેટલીકવાર આ દુખાવો ડાબા હાથ, ખભા, ગરદન, જડબા, પીઠ અથવા કોણી સુધી પણ ફેલાઈ શકે છે. શ્વાસ લેવામાં તકલીફ, અચાનક શ્વાસ ફૂલવો, ઉબકા, ઉલ્ટી, પેટમાં અસ્વસ્થતા અને અસામાન્ય થાક જેવા લક્ષણો પણ હાર્ટ એટેકનો સંકેત હોઈ શકે છે.

નિષ્ણાતોના જણાવ્યા મુજબ ચક્કર આવવા, શરીરમાં નબળાઈ અનુભવવી, કોઈ ખાસ મહેનત વગર ઠંડો પરસેવો થવો અને ચહેરો ફિક્કો પડી જવો જેવા સંકેતોને પણ ગંભીરતાથી લેવા જોઈએ. ખાસ કરીને મહિલાઓ અને વૃદ્ધોમાં આ લક્ષણો સ્પષ્ટ ન હોવાથી જોખમ વધી શકે છે. જો આ પ્રકારની કોઈ પણ તકલીફ પાંચ મિનિટથી વધુ સમય સુધી રહે તો તરત જ તબીબી મદદ અને સારવાર લેવી જરૂરી છે.

હાર્ટ એટેકનું જોખમ ઘટાડવા માટે નિયમિત કસરત, સંતુલિત આહાર અને સ્વસ્થ જીવનશૈલી અપનાવવી ખૂબ જ જરૂરી છે. દરરોજ ઓછામાં ઓછા 30 મિનિટ શારીરિક પ્રવૃત્તિ, ફળ-શાકભાજી અને સંપૂર્ણ અનાજનું સેવન હૃદયને સ્વસ્થ રાખવામાં મદદ કરે છે. ધૂમ્રપાનથી દૂર રહેવું, આલ્કોહોલનું ખૂબ જ મર્યાદિત સેવન, તણાવ નિયંત્રણ અને નિયમિત હેલ્થ ચેકઅપ કરાવવું પણ હૃદયની સુરક્ષા માટે મહત્વપૂર્ણ માનવામાં આવે છે.