રાજકોટ: શહેરમાં ફરી એકવાર આવારા તત્વોનો આતંક સામે આવ્યો છે. નવા થોરાળા વિસ્તારમાં આવેલા ગોકુળ પરા વિસ્તારમાં રાત્રિના સમયે લુખ્ખાઓએ હાહાકાર મચાવ્યો હતો અને જાહેરમાં પોલીસને પડકાર ફેંકતા નજરે પડ્યા હતા.

મળતી માહિતી મુજબ, દીપક ચાવડા નામના શખસે દારૂ પીવાના પૈસા માગતા શૈલેષ સાગઠીયા નામના યુવક સાથે ઝઘડો કર્યો હતો. બાદમાં દીપક ચાવડાએ યુવક પર છરી વડે જીવલેણ હુમલો કર્યો હતો. હુમલા બાદ આરોપીએ શૈલેષ પાસેથી રૂ. 2000 લૂંટી લઈને ઘટનાસ્થળેથી ફરાર થઈ ગયો હતો.
આ સમગ્ર ઘટના CCTV કેમેરામાં કેદ થઈ ગઈ છે, જે પોલીસ માટે મહત્વપૂર્ણ પુરાવા બની શકે છે. હુમલામાં ઘાયલ થયેલા શૈલેષ સાગઠીયાને તાત્કાલિક સારવાર માટે સિવિલ હોસ્પિટલમાં ખસેડવામાં આવ્યો હતો.
ઘટનાની જાણ થતાં થોરાળા પોલીસ તાત્કાલિક હરકતમાં આવી છે અને આરોપી વિરુદ્ધ ગુનો નોંધી વધુ તપાસ શરૂ કરી છે.