લખનઉ: ઉત્તર પ્રદેશમાં ભારે આંધી-વરસાદ અને આકાશીય વીજળી પડવાથી થયેલા નુકસાનને લઈને Yogi Adityanathએ તાત્કાલિક સંજ્ઞાન લીધું છે. છેલ્લા લગભગ 24 કલાક દરમિયાન રાજ્યના અનેક જિલ્લાઓમાં જાનહાનિ, પશુહાનિ તેમજ મકાનો અને ખેતીને ભારે નુકસાન થયું હોવાનું સામે આવ્યું છે.

મુખ્યમંત્રી યોગી આદિત્યનાથે અધિકારીઓને તરત જ અસરગ્રસ્ત વિસ્તારોમાં પહોંચી રાહત અને બચાવ કામગીરી હાથ ધરવા તથા પીડિતોને વહેલી તકે વળતર ચૂકવવાના નિર્દેશ આપ્યા છે. સાથે જ તમામ જિલ્લાઓને દર ત્રણ કલાકે પરિસ્થિતિ અંગેનો અહેવાલ મોકલવા માટે પણ આદેશ આપવામાં આવ્યો છે.

બારાબંકી, બહેરાઈચ, કાનપુર દેહાત, બસ્તી, સંભલ, હરદોઈ અને ઉન્નાવ સહિત કુલ 19 જિલ્લાઓમાંથી જાનહાનિ, પશુહાનિ અને પાકને નુકસાન થયાની માહિતી મળી છે. ખરાબ હવામાનને કારણે અનેક કાચા મકાનો ધરાશાયી થઈ ગયા છે, જ્યારે ઘણા વિસ્તારોમાં દીવાલો ધરાશાયી થવાની ઘટનાઓ પણ સામે આવી છે.

મુખ્યમંત્રી યોગીએ મૃતકોના પરિવારજનો પ્રત્યે શોક વ્યક્ત કર્યો હતો અને જિલ્લા કલેક્ટરો સહિત સંબંધિત અધિકારીઓને સ્થળ પર જઈ તાત્કાલિક સર્વે પૂર્ણ કરવા જણાવ્યું છે, જેથી સંબંધિત વિભાગો સાથે સંકલન કરીને ઝડપથી વળતર ચૂકવી શકાય.

તેમણે તમામ જિલ્લા મેજિસ્ટ્રેટોને રાહત કામગીરીને સર્વોચ્ચ પ્રાથમિકતા આપવા સૂચના આપી છે. સાથે જ વળતર, બચાવ અભિયાન અને અન્ય કામગીરીની માહિતી સોશિયલ મીડિયા પર અપડેટ કરવાની પણ સૂચના આપવામાં આવી છે.

બુધવારે મોડી સાંજે ઉત્તર પ્રદેશમાં આવેલા તીવ્ર આંધી-તૂફાને ભારે તબાહી મચાવી હતી. અનેક જગ્યાએ મોટા વૃક્ષો મૂળ સહિત ધરાશાયી થઈ ગયા હતા, જ્યારે કાચા મકાનો જમીનદોસ્ત થઈ ગયા હતા. ઘણા જિલ્લાઓમાં આકાશીય વીજળી પડવાની ઘટનાઓ પણ નોંધાઈ હતી, જેના કારણે અનેક લોકોના મોત થયા હોવાનું જાણવા મળ્યું છે.