જમ્મુ કાશ્મીર  જમ્મુ-કાશ્મીરના લોકપ્રિય પ્રવાસન સ્થળ પહેલગામમાં પ્રવાસીઓની સુરક્ષા વધુ મજબૂત બનાવવા પ્રશાસને મહત્વપૂર્ણ નિર્ણય લીધો છે. હવે અહીં તમામ ટુરિઝમ સર્વિસ પ્રોવાઇડર્સ માટે QR કોડ આધારિત ઓળખ પ્રણાલી લાગુ કરવામાં આવી છે. આ નવી વ્યવસ્થા હેઠળ દરેક સર્વિસ પ્રોવાઇડરનું પોલીસ દ્વારા સંપૂર્ણ વેરિફિકેશન કરીને તેમને યુનિક QR કોડ આપવામાં આવ્યો છે, જેથી તેમની ઓળખ તાત્કાલિક ચકાસી શકાય.

આ પહેલ પાછળનું મુખ્ય કારણ ગયા વર્ષે થયેલો ભયાનક આતંકી હુમલો છે. લશ્કર-એ-તૈયબાના આતંકવાદીઓએ 22 એપ્રિલે બૈસરન મેદાનમાં હુમલો કર્યો હતો, જેમાં 25 પ્રવાસીઓ અને એક સ્થાનિક નાગરિકનું મોત થયું હતું. આ ઘટનાએ સમગ્ર વિસ્તારમાં ભયનો માહોલ સર્જ્યો હતો અને પ્રવાસીઓની સંખ્યા પણ નોંધપાત્ર રીતે ઘટી ગઈ હતી.

પ્રશાસનનું માનવું છે કે નવી QR કોડ સિસ્ટમથી પ્રવાસીઓમાં વિશ્વાસ ફરીથી સ્થાપિત થશે. પ્રવાસીઓ પોતાના મોબાઇલથી QR કોડ સ્કેન કરીને સંબંધિત સર્વિસ પ્રોવાઇડરની સંપૂર્ણ માહિતી મેળવી શકશે. આ માહિતીમાં નામ, સરનામું, મોબાઇલ નંબર, આધાર વિગત, રજિસ્ટ્રેશન નંબર તેમજ પોલીસ વેરિફિકેશનની માહિતી શામેલ હશે.

આ વ્યવસ્થાથી નકલી અથવા બિનઅધિકૃત લોકો પ્રવાસન વ્યવસાય સાથે જોડાયેલા હોવાનો દાવો કરી શકશે નહીં. ખાસ કરીને પોનીવાળા, ફેરિયાઓ, વેપારીઓ અને બહારથી આવતા વેચાણકારો માટે આ સિસ્ટમ ફરજિયાત બનાવવામાં આવી છે, જેથી માત્ર નોંધાયેલા અને ચકાસાયેલા લોકો જ સેવાઓ આપી શકે.

હુમલાની પ્રથમ વરસી નજીક આવતાં સુરક્ષા વ્યવસ્થામાં પણ વધારો કરવામાં આવ્યો છે. તમામ સુરક્ષા એજન્સીઓને પ્રવાસન સ્થળો આસપાસ ખાસ સતર્ક રહેવા સૂચના આપવામાં આવી છે. આ માટે વિવિધ સ્તરે બેઠક યોજાઈ છે અને સિનિયર અધિકારીઓ દ્વારા વ્યવસ્થાની સમીક્ષા કરવામાં આવી છે.

હુમલા બાદ લગભગ 50 જેટલા પ્રવાસન સ્થળો બંધ કરવાની ફરજ પડી હતી, પરંતુ સુરક્ષા ઓડિટ બાદ હવે તેમાંના કેટલાક સ્થળો તબક્કાવાર ફરી શરૂ કરવામાં આવ્યા છે. બૈસરન ઘાટી, જેને 'મિની સ્વિટ્ઝર્લેન્ડ' તરીકે ઓળખવામાં આવે છે, ત્યાં ફરી પ્રવાસીઓની અવરજવર વધવા લાગી છે.

આ સમગ્ર પગલું પ્રવાસીઓ માટે સુરક્ષિત વાતાવરણ ઉભું કરવા અને જમ્મુ-કાશ્મીરના પ્રવાસન ઉદ્યોગને ફરી જીવંત બનાવવા માટે મહત્વપૂર્ણ માનવામાં આવી રહ્યું છે.