અમદાવાદમાં આવેલો હાટકેશ્વર બ્રિજ તોડવાની કામગીરી હવે અંતિમ ચરણમાં પહોંચી ગઈ છે. તંત્ર દ્વારા બ્રિજના કુલ 8 સ્પાનમાંથી 6 સ્પાન પહેલેથી જ તોડી પાડવામાં આવ્યા છે, જ્યારે હવે બાકી રહેલા 2 સ્પાનને દૂર કરવાની પ્રક્રિયા શરૂ કરવામાં આવી છે. આ અંતિમ કામગીરી પૂર્ણ કરવા માટે અંદાજે 17 દિવસનો સમય લાગશે. આ દરમિયાન ટ્રાફિકને વિકલ્પ માર્ગો પર ડાયવર્ટ કરવામાં આવ્યો છે, જેના કારણે વાહનચાલકોને થોડો વળાંક લઈને મુસાફરી કરવી પડી રહી છે.

તંત્ર દ્વારા આ વખતે ખાસ તકેદારી રાખવામાં આવી રહી છે. બાકી રહેલા સ્પાનને તોડવા માટે નવી પદ્ધતિ અપનાવવામાં આવી છે, જેમાં સ્પાનની નીચે રેતીની થેલીઓ ગોઠવવામાં આવશે અને માટીનો ઢગલો તૈયાર કરવામાં આવશે, જેથી તોડકામ દરમિયાન પડતા કચરાથી આસપાસના દુકાનદારો અને સ્થાનિક લોકોને કોઈ નુકસાન ન થાય. અગાઉની કામગીરી દરમિયાન ઊડતા ધૂળકણ અને કચરાને કારણે લોકોમાં અસંતોષ જોવા મળ્યો હતો, જેને ધ્યાનમાં રાખીને આ સુધારેલી પદ્ધતિ અપનાવવામાં આવી છે.

હાટકેશ્વર બ્રિજ શરૂથી જ વિવાદોમાં રહ્યો છે. બ્રિજના નિર્માણ સમયે ગુણવત્તા અંગે પ્રશ્નો ઊભા થયા હતા અને ભ્રષ્ટાચારના આક્ષેપો પણ લાગ્યા હતા. બ્રિજ બનાવાયા પછી થોડા જ સમયમાં તેમાં ખામીઓ બહાર આવતાં તેને તોડી પાડવાનો નિર્ણય લેવાયો હતો. જેના કારણે સ્થાનિક દુકાનદારોને વેપારમાં નુકસાન સહન કરવું પડ્યું છે.