Crude Oil Price Down: વૈશ્વિક સ્તરે ક્રૂડ ઓઇલના ભાવમાં તીવ્ર ઘટાડો થયો છે. બુધવારે આંતરરાષ્ટ્રીય બેન્ચમાર્ક બ્રેન્ટ ક્રૂડ 15%થી વધુ ઘટીને $99.78 પ્રતિ બેરલ પર પહોંચી ગયું છે. ઉલ્લેખનીય છે કે, છેલ્લા એક અઠવાડિયામાં આ સૌથી ઓછો ભાવ છે.

મંગળવારે રાત્રે બ્રેન્ટ ક્રૂડ ઓઇલ $118.35 પ્રતિ બેરલ પર બંધ થયું હતું. બજારમાં આ ઘટાડો ત્યારે થયો, જ્યારે યુએસ રાષ્ટ્રપતિ ડોનાલ્ડ ટ્રમ્પના નિવેદનથી એવી આશા જાગી કે, હાલનો સંઘર્ષ બેથી ત્રણ અઠવાડિયામાં સમાપ્ત થઈ શકે છે. ટ્રમ્પના નિવેદનથી રોકાણકારોને સકારાત્મક સંકેત મળ્યા છે. જેના કારણે તેલ સહિત વૈશ્વિક બજારોમાં રાહત મળી છે અને ભાવમાં ઘટાડો થયો છે.

27 ફેબ્રુઆરીએ ક્રૂડ $72 હતું
પશ્ચિમ એશિયામાં લડાઈ શરૂ થાય તે પહેલાં ક્રૂડ ઓઈલના ભાવ પ્રતિ બેરલ $72ની આસપાસ હતા. ત્યારબાદ તેમાં વધારો થયો, એક સમયે તે $118 પ્રતિ બેરલથી વધુ પહોંચી ગયો હતો. અર્થશાસ્ત્રીઓ કહે છે કે, જો લાંબા સમય સુધી ક્રૂડ ઓઈલના ભાવ $100થી ઉપર રહેશે, તો તે વૈશ્વિક આર્થિક વિકાસને અસર કરશે, ખાસ કરીને ભારત જેવા દેશો માટે જે મોટા પ્રમાણમાં ક્રૂડ ઓઈલ આયાત કરે છે.

જો કે, પરિસ્થિતિ સંપૂર્ણપણે સ્થિર નથી. અહેવાલો સૂચવે છે કે, ઈરાને કુવૈત આંતરરાષ્ટ્રીય એરપોર્ટ પર ઇંધણ ટાંકીઓ પર ડ્રોન હુમલો કર્યો હતો, જેનાથી પુરવઠામાં વિક્ષેપ પડવાની આશંકા વધી ગઈ છે. આવી ઘટનાઓ દર્શાવે છે કે, આ ક્ષેત્રમાં ભૂ-રાજકીય જોખમો હજુ પણ યથાવત્ છે.

શેરમાર્કેટમાં જોખમ યથાવત્
માર્ચમાં ક્રૂડ ઓઇલના ભાવમાં તીવ્ર વધારો થયો હતો, પરંતુ હવે એપ્રિલની શરૂઆતમાં પરિસ્થિતિ બદલાતી દેખાય છે. રોકાણકારો થોડા સાવધ બન્યા છે. કારણ કે, તણાવ ઓછો થવાની અપેક્ષા છે, જ્યારે અણધારી ઘટનાઓ બજારને અસર કરી શકે છે.