મુંબઈ: વૈશ્વિક સ્તરેથી મળી રહેલા મજબૂત અને હકારાત્મક સંકેતોને કારણે ભારતીય શેરબજાર સોમવારે શાનદાર તેજી સાથે બંધ થયું છે. બજારમાં આજે ચોતરફ ખરીદીનો માહોલ જોવા મળ્યો હતો, જેને પગલે રોકાણકારોની સંપત્તિમાં મોટો વધારો થયો છે. દિવસના અંતે બોમ્બે સ્ટોક એક્સચેન્જનો સૂચકાંક સેન્સેક્સ (Sensex) 736.38 પોઇન્ટ એટલે કે 0.97% ના ઉછાળા સાથે 76,264.33 ના સ્તરે બંધ થયો હતો. જ્યારે નેશનલ સ્ટોક એક્સચેન્જનો સૂચકાંક નિફ્ટી (Nifty) 231 પોઇન્ટ એટલે કે 0.98% ની મજબૂતી સાથે 23,853.90 પર બંધ રહ્યો હતો.

મિડકેપ અને સ્મોલકેપમાં પણ બૂમ
માર્કેટમાં આજે માત્ર લાર્જકેપ જ નહીં, પરંતુ મિડકેપ અને સ્મોલકેપ શેરોમાં પણ ભારે લેવાલી જોવા મળી હતી. નિફ્ટી મિડકેપ 100 ઇન્ડેક્સ 781.55 પોઇન્ટ (1.29%) વધીને 61,549.65 પર અને નિફ્ટી સ્મોલકેપ 100 ઇન્ડેક્સ 202.55 પોઇન્ટ (1.11%) ની તેજી સાથે 18,400 ના સ્તરે બંધ આવ્યો હતો.

કયા સેક્ટરમાં તેજી, કયામાં મંદી?
આજના કારોબારમાં નિફ્ટી રિયલ્ટી અને નિફ્ટી કન્ઝ્યુમર ડ્યુરેબલ્સ ઇન્ડેક્સ ટોપ પર્ફોર્મર રહ્યા હતા. આ ઉપરાંત ઓટો, મેટલ, કન્ઝમ્પ્શન, મેન્યુફેક્ચરિંગ, ઓઇલ એન્ડ ગેસ, ડિફેન્સ અને ઇન્ફ્રાસ્ટ્રક્ચર સેક્ટરના શેર પણ લીલા નિશાનમાં (તેજી સાથે) બંધ થયા હતા. બીજી તરફ, માર્કેટની આ તેજી વચ્ચે પણ નિફ્ટી ફાર્મા, હેલ્થકેર અને મીડિયા સેક્ટરમાં પ્રોફિટ બુકિંગને કારણે ઘટાડો નોંધાયો હતો.

નફો અને નુકસાન કરનારા શેર્સ

• Top Gainers: ટ્રેન્ટ, ઈન્ડિગો, બજાજ ફિનસર્વ, અલ્ટ્રાટેક સિમેન્ટ, મારુતિ સુઝુકી, એમ એન્ડ એમ (M&M), એલ એન્ડ ટી (L&T), બજાજ ફાઇનાન્સ, ટાઇટન, ઇન્ફોસિસ, એચસીએલ ટેક, ભારતી એરટેલ, આઇટીસી (ITC) અને બીઇએલ (BEL).
• Top Losers: એનટીપીસી (NTPC), આઇસીઆઇસીઆઇ બેંક, એશિયન પેઇન્ટ્સ, એચયુએલ (HUL), સન ફાર્મા, ટેક મહિન્દ્રા અને ટાટા સ્ટીલ.

તેજી પાછળનું અસલી કારણ શું છે?
માર્કેટ એક્સપર્ટ સુનિલ શાહના જણાવ્યા અનુસાર, ભારતીય બજારમાં આજના ઉછાળાનું મુખ્ય કારણ ઈરાન અને અમેરિકા વચ્ચે શાંતિ સમજૂતી માટેની વાતચીત સફળ થવી તે છે. બંને દેશો વચ્ચે આગામી 19 જૂનના રોજ કરાર થવાની તારીખ નક્કી થઈ ગઈ છે, જેનાથી વૈશ્વિક રોકાણકારોમાં ભારે ઉત્સાહ છે. આ સકારાત્મક સમાચારને કારણે આંતરરાષ્ટ્રીય બજારમાં ક્રૂડ ઓઇલની કિંમતો ઘટીને 85 ડોલર પ્રતિ બેરલની નીચે આવી ગઈ છે. કાચા તેલના ભાવ ઘટવાથી ભારતીય અર્થતંત્ર અને ડોલર સામે રૂપિયાના મૂલ્ય પરનું દબાણ ઘટશે. આ ઉપરાંત હોર્મુઝ સ્ટ્રેટ (Hormuz Strait) ખુલવાને કારણે બજારમાં ક્રૂડ ઓઇલનો સપ્લાય વધુ સરળ બનશે, જે આગામી સમયમાં ભારતીય બજાર માટે ખૂબ જ ફાયદાકારક સાબિત થઈ શકે છે.