છત્તીસગઢ : છત્તીસગઢના શક્તિ જિલ્લામાં આવેલા વેદાંતા પાવર પ્લાન્ટમાં થયેલા ભયાનક બોઈલર વિસ્ફોટ કેસમાં પોલીસે કડક કાર્યવાહી શરૂ કરી છે. આ મામલે Anil Agarwal સહિત કંપની મેનેજમેન્ટ સામે ગુનો નોંધવામાં આવ્યો છે. પ્રાથમિક તપાસમાં બેદરકારી બહાર આવતા પોલીસે બીએનએસ એક્ટ હેઠળ કાર્યવાહી હાથ ધરી છે.

14 એપ્રિલે પ્લાન્ટમાં બોઈલર પાઇપ ફાટતા જોરદાર વિસ્ફોટ થયો હતો, જેમાં 20 લોકોના મોત થયા હતા અને 15 લોકો ગંભીર રીતે ઘાયલ થયા હતા. ઘટનાસ્થળે અનેક કામદારો ફસાઈ ગયા હતા, જેને બાદમાં બહાર કાઢવામાં આવ્યા હતા.

શક્તિ જિલ્લાના એસપી પ્રફુલ્લ ઠાકુરે જણાવ્યું હતું કે તપાસમાં પ્લાન્ટ મેનેજમેન્ટ તરફથી બેદરકારી સામે આવી છે, જેના આધારે ડાબરા પોલીસ સ્ટેશનમાં ફરિયાદ નોંધવામાં આવી છે. હાલમાં આ કેસમાં 8 થી 10 લોકોના નામ સામેલ છે અને આગળની તપાસ બાદ અન્ય સંડોવાયેલા લોકોના નામ પણ ઉમેરવામાં આવશે.

અધિકારીઓએ જણાવ્યું કે એફએસએલ રિપોર્ટ, ઔદ્યોગિક સલામતી તપાસ અને ટેકનિકલ અહેવાલ બાદ વધુ કલમો ઉમેરાશે. ઘટના બાદ ઉદ્યોગ મંત્રી લખનલાલ દેવાંગન સ્થળ પર પહોંચ્યા હતા અને બેદરકારી માટે જવાબદારો સામે કાર્યવાહી કરવાની ખાતરી આપી હતી. બીજી તરફ કોંગ્રેસે પણ આ ઘટનાની તપાસ માટે સમિતિ રચી છે.

મૃતકોના પરિવારને કંપની દ્વારા ₹35 લાખ અને નોકરી આપવાનો વચન આપવામાં આવ્યો છે, જ્યારે સરકાર અને રાહત ભંડોળ દ્વારા પણ સહાય જાહેર કરવામાં આવી છે.