આંધ્ર પ્રદેશના અનકાપલ્લી જિલ્લાના પારાવાડા વિસ્તારમાં આવેલી ફાર્મા સિટીમાં સ્થિત સાઉથ એનર્જી ઇન્ડસ્ટ્રીઝમાં મંગળવારે ભીષણ આગ લાગતાં ભારે અફરાતફરીનો માહોલ સર્જાયો હતો. આ દુર્ઘટનામાં અત્યાર સુધી બે મજૂરોના મોત થયાની પુષ્ટિ થઈ છે, જ્યારે અનેક કર્મચારીઓ ઘાયલ થયા હોવાનું જાણવા મળ્યું છે. અધિકારીઓએ મૃતકોની સંખ્યામાં વધારો થવાની આશંકા પણ વ્યક્ત કરી છે.

આગ લાગતાની સાથે જ ફેક્ટરીના પરિસરમાં ધુમાડાના ગોટેગોટા જોવા મળ્યા હતા અને કર્મચારીઓમાં ગભરાટ ફેલાયો હતો. ઘટનાની જાણ થતાં જ પોલીસ, અગ્નિશામક વિભાગ અને બચાવ ટીમો તાત્કાલિક સ્થળ પર પહોંચી ગઈ હતી. આગ પર કાબૂ મેળવવા માટે અગ્નિશામક દળ દ્વારા સતત કામગીરી હાથ ધરવામાં આવી રહી છે.

સાથે સાથે ફેક્ટરીની અંદર ફસાયેલા કર્મચારીઓને સુરક્ષિત બહાર કાઢવા માટે રેસ્ક્યુ ઓપરેશન પણ શરૂ કરવામાં આવ્યું છે. ઘાયલ થયેલા કર્મચારીઓને નજીકની હોસ્પિટલોમાં સારવાર માટે ખસેડવામાં આવ્યા છે. કેટલાક ઘાયલોની સ્થિતિ ગંભીર હોવાનું પણ સૂત્રોએ જણાવ્યું છે.

પોલીસ અને અગ્નિશામક વિભાગના વરિષ્ઠ અધિકારીઓ ઘટનાસ્થળે હાજર રહી સમગ્ર પરિસ્થિતિ પર નજર રાખી રહ્યા છે. પ્રાથમિક માહિતી મુજબ, ફેક્ટરીમાં સામાન્ય રીતે દરેક શિફ્ટ દરમિયાન 30થી 50 કર્મચારીઓ કાર્યરત હોય છે. જોકે આગ લાગી ત્યારે અંદર કેટલા લોકો હાજર હતા અને કેટલા સુરક્ષિત રીતે બહાર નીકળી શક્યા હતા તે અંગે હજુ સુધી સ્પષ્ટ માહિતી મળી નથી.

આગ લાગવાનું ચોક્કસ કારણ હાલ અજ્ઞાત છે. અધિકારીઓનું કહેવું છે કે આગ સંપૂર્ણપણે કાબૂમાં આવ્યા બાદ અને સ્થળની વિગતવાર તપાસ પૂર્ણ થયા પછી જ ઘટનાનું સાચું કારણ સામે આવી શકશે. વહીવટી તંત્રને આશંકા છે કે ફેક્ટરીની અંદર હજુ પણ કેટલાક કર્મચારીઓ ફસાયેલા હોઈ શકે છે. તેથી મૃત્યુઆંક અને ઘાયલોની સંખ્યામાં વધારો થવાની શક્યતાને નકારી શકાય નહીં.

હાલ બચાવ અને રાહત કામગીરી યુદ્ધના ધોરણે ચાલુ છે અને સમગ્ર વિસ્તારને સુરક્ષાના કારણોસર ઘેરી લેવામાં આવ્યો છે.