Viral Video: અમેરિકામાં ભારતીય મૂળના લોકો સાથે વંશીય ભેદભાવનો વધુ એક કિસ્સો સામે આવ્યો છે. સોશિયલ મીડિયા પર વાયરલ થઈ રહેલા એક વીડિયોમાં એક અમેરિકન વ્યક્તિ એક ભારતીય દંપતી સાથે ગેરવર્તન કરતો અને તેમને ‘તેમના દેશમાં પાછા જવા’ કહેતો જોવા મળે છે. 

આ ઘટના બાદ ઇન્ટરનેટ પર લોકોમાં ભારે ગુસ્સો છે. સૌથી મોટો વિવાદ એ હકીકતને કારણે થયો હતો કે, આ વીડિયો તે જ વ્યક્તિ દ્વારા શેર કરવામાં આવ્યો હતો, જેણે ભારતીય દંપતી સાથે ગેરવર્તન કર્યું હતું. વીડિયો પોસ્ટ કરતી વખતે તેણે ભારતીય ધ્વજ સાથે વાંધાજનક ઇમોજીનો પણ ઉપયોગ કર્યો હતો, જેને લોકો ખુલ્લી વંશીય દ્વેષ માનતા હતા.

આશરે ૩૦ સેકન્ડના આ વીડિયોમાં ભારતીય દંપતી રાબેતા મુજબ પોતાના કામકાજમાં વ્યસ્ત દેખાય છે. પછી કારમાં એક માણસ તેમને પ્રશ્નો પૂછવાનું શરૂ કરે છે. પહેલા તે પૂછે છે કે શું તેઓ ભારતના છે અને શું ભારત યુનાઇટેડ સ્ટેટ્સ કરતાં સારું છે. ભારતીય દંપતી શાંતિથી અને નમ્રતાથી જવાબ આપે છે કે, બંને દેશોની પોતાની શક્તિઓ છે. પછી તે માણસ આક્રમક બને છે અને કહે છે, ‘જો ભારત આટલું સારું છે, તો તમે અહીં કેમ આવ્યા?’ ભારતીય માણસ જવાબ આપે છે કે, તેઓ દુનિયા ફરવા અને નવા અનુભવો મેળવવા આવ્યા હતા. અમેરિકન માણસ ગુસ્સે થઈ જાય છે અને તેમને યુનાઇટેડ સ્ટેટ્સ છોડી દેવાનું કહે છે.

વીડિયોમાં તે અપશબ્દોનો ઉપયોગ કરે છે અને કહે છે, ‘અમે તમને અહીં જોવા નથી માંગતા, તમારા દેશમાં પાછા જાઓ.’ વીડિયો વાયરલ થયા પછી મોટી સંખ્યામાં લોકોએ ભારતીય દંપતીના ધીરજ અને શાંત વર્તનની પ્રશંસા કરી હતી. ઘણા લોકોએ કહ્યું કે, આવી ગેરવર્તણૂક છતાં દંપતીએ સંયમ ગુમાવ્યો નહીં. ત્યારે કેટલાક લોકો માનતા હતા કે, આવા કિસ્સાઓમાં કાનૂની ફરિયાદ અને કડક કાર્યવાહી જરૂરી છે, જેથી જાતિવાદી વર્તન કરનારાઓને પ્રોત્સાહન ન મળે. સોશિયલ મીડિયા પર ઘણા યુઝર્સે યુએસ સેક્રેટરી ઓફ સ્ટેટ માર્કો રુબિયોને ટેગ કર્યા અને પ્રશ્નો ઉઠાવ્યા હતા. તેમની તાજેતરની ભારત મુલાકાત દરમિયાન, તેમને અમેરિકામાં ભારતીયો સામે વધતી જતી વંશીય ઘટનાઓ વિશે પૂછવામાં આવ્યું હતું. ત્યારે તેમણે કહ્યું હતું કે તેઓ આવા કેસોથી વાકેફ નથી અને દરેક દેશમાં કેટલાક "મૂર્ખ લોકો" છે.

લોકો હવે આ વાયરલ વીડિયો શેર કરી રહ્યા છે અને જવાબો માગી રહ્યા છે. ઘણા લોકોએ ટિપ્પણી કરી છે કે, અમેરિકા ઇમિગ્રન્ટ્સનો દેશ છે અને કોઈપણ સમુદાય સાથે આ પ્રકારનો વ્યવહાર અસ્વીકાર્ય છે. કેટલાક યુઝર્સે એમ પણ લખ્યું છે કે, જાતિવાદ ફક્ત ભારતીયો સામે જ નહીં પરંતુ એશિયન અને અન્ય ઇમિગ્રન્ટ સમુદાયો સામે પણ ચિંતાનો વિષય બની રહ્યો છે. નિષ્ણાતો માને છે કે, સોશિયલ મીડિયા પર આવા વીડિયો ઝડપથી વાયરલ થવાથી વંશીય ઘટનાઓ વિશે આંતરરાષ્ટ્રીય ચર્ચા વધી રહી છે. તેનાથી સરકારો અને વહીવટીતંત્ર પર પગલાં લેવાનું દબાણ પણ વધે છે.