1st May Changes: નાણાકીય રીતે સામાન્ય માણસ માટે આજથી પાંચ મોટા ફેરફારો અમલમાં આવી રહ્યા છે. આ ફેરફારો તેમના રોજિંદા જીવન પર સીધી અસર કરશે. આ જ કારણ છે કે, મે મહિનાની શરૂઆતમાં અમલમાં આવનારા નવા નિયમોને સારી રીતે સમજવું ખૂબ જ મહત્વપૂર્ણ છે. કારણ કે, તે તમારા બજેટને અસર કરી શકે છે. ક્રેડિટ કાર્ડ ધારકોથી લઈને ATM ઉપાડ સુધીના દરેકને આ નવા નિયમથી અસર થશે. ઓનલાઈન ગેમર્સ પણ નોંધપાત્ર રીતે પ્રભાવિત થશે.

UPI Transactions: દેશમાં ડિજિટલ વ્યવહારો વધુને વધુ સામાન્ય બન્યા છે અને સાયબર છેતરપિંડી પણ વધી રહી છે. તેને ધ્યાનમાં રાખીને મોટા UPI વ્યવહારો અંગે કેટલાક ફેરફારો કરવામાં આવ્યા છે. 1 મેથી મોટા UPI વ્યવહારો માટે વધારાની સુવિધાઓની જરૂર પડશે. આમાં પ્રમાણીકરણ પ્રક્રિયાનો સમાવેશ થાય છે, જેમાં ચુકવણી કરતી વખતે વધારાના પગલાંની જરૂર પડશે. આનો અર્થ એ છે કે UPI દ્વારા મોટી રકમ ટ્રાન્સફર કરવા માટે વધુ મુશ્કેલીનો સામનો કરવો પડી શકે છે.

SBI Credit Card: દેશની સૌથી મોટી સરકારી બેન્ક એસબીઆઈએ ક્રેડિટ કાર્ડના લેટ પેમેન્ટ ચાર્જમાં બદલાવ કર્યો છે. બેન્કનું કહેવું છે કે, 1મેથી 100થી લઈને 500 રૂપિયા સુધી લેટ પેમેન્ટ ચાર્જ 100 રૂપિયા લગાવવામાં આવશે. જ્યારે 500થી 1000 રૂપિયા સુધી ચાર્જ વધીને 500 રૂપિયા થઈ જશે. જો કે, બાકીના તમામ ચાર્જ પહેલાની જેમ લાગુ રહેશે. બેન્કે જણાવ્યુ છે  કે, BPCL SBI ક્રેડિટ કાર્ડ પર વાર્ષિક ફીમાંથી છૂટકારો મેળવવા 1 લાખ સુધી ખર્ચ કરવા પડશે, જે અત્યાર સુધીમાં 50 હજાર રૂપિયા હતા.

Online Gaming: ઓનલાઈન ગેમિંગ સંબંધિત નવા નિયમો પણ 1 મેથી અમલમાં આવી રહ્યા છે. સરકારે આ ક્ષેત્રનું નિયમન અને દેખરેખ રાખવા માટે ઓનલાઈન ગેમિંગ ઓથોરિટી ઓફ ઈન્ડિયાની રચનાની જાહેરાત કરી છે. વધુમાં આ ક્ષેત્રને ત્રણ શ્રેણીઓમાં વિભાજિત કરવામાં આવશે: ઓનલાઈન મની ગેમ્સ, ઓનલાઈન સોશિયલ ગેમ્સ અને ઈ-સ્પોર્ટ્સ. નાણાકીય વ્યવહારો ધરાવતી રમતોમાં નોંધણી કરાવવી જરૂરી રહેશે. આ વ્યવહારો પર સરકારી એજન્સીઓ પણ નજર રાખશે.

ATM Transactions: રિઝર્વ બેંકની મંજૂરી બાદ બેંકોએ પણ તેમના ATM ચાર્જમાં વધારો કર્યો છે. 1 મેથી મોટાભાગની બેંકોમાં ATM ઉપાડ માટે વધુ ફી લાગુ થશે. શહેરી અને ગ્રામીણ વિસ્તારોમાં માસિક મફત ઉપાડ મર્યાદા સમાપ્ત થયા પછી પ્રતિ ટ્રાન્ઝેક્શન ₹21ને બદલે ₹23 રૂપિયા ફી વસૂલવામાં આવશે. બેંકિંગ નિયમો હેઠળ, તમારા ATMમાંથી મહિનામાં પાંચ વખત અને બીજી બેંકના ATMમાંથી ત્રણ વખત પૈસા ઉપાડવા પર કોઈ ફી નથી.

LPG Delivery: 1 મેથી LPGના બુકિંગ અને ડિલિવરીમાં ફેરફાર કરવામાં આવી રહ્યા છે. સરકારે સિલિન્ડરોના દુરુપયોગ અને સંગ્રહખોરીને રોકવા માટે OTP-આધારિત ડિલિવરી સિસ્ટમ રજૂ કરી છે. હવે OTP વિના સિલિન્ડર ડિલિવરી કરવામાં આવશે નહીં. દરેક સિલિન્ડર પર નજર રાખવા માટે એક ટ્રેકિંગ સિસ્ટમ પણ વિકસાવવામાં આવી રહી છે. ગ્રાહકોએ અગાઉથી આધાર દ્વારા તેમનું e-KYC પૂર્ણ કરવું પણ જરૂરી રહેશે.

ATF Price: જ્યારે એવિએશન ટર્બાઇન ફ્યુઅલની (ATF) કિંમત દર મહિને બદલાય છે, એપ્રિલમાં તેમાં 8.5 ટકાનો વધારો થયો હતો, પરંતુ એરલાઇન્સની વિનંતીઓને પગલે સરકારે આ વખતે કોઈ ફેરફાર કર્યો નથી. ભાવ વધારાનો અભાવ મુસાફરોને પણ રાહત આપશે. કારણ કે, ATF એરલાઇન્સના કુલ ખર્ચમાં આશરે 60 ટકા હિસ્સો ધરાવે છે.