વોશિંગ્ટન/નવી દિલ્હી અમેરિકી રાષ્ટ્રપતિ ડોનાલ્ડ ટ્રમ્પ વર્ષ 2027ની શરૂઆતમાં ભારતની મુલાકાતે આવી શકે છે. ન્યૂઝ એજન્સી IANS અનુસાર, હૈદરાબાદમાં મીડિયા સાથેની વાતચીત દરમિયાન અમેરિકી વિદેશ મંત્રી માર્કો રુબિયોએ આ અંગે સંકેત આપ્યા છે. વૈશ્વિક સ્તરે વડાપ્રધાન નરેન્દ્ર મોદીની ભૂમિકા અને ભારતની પ્રગતિ વિશે પૂછવામાં આવતા રુબિયોએ જણાવ્યું હતું કે, "અમે વડાપ્રધાન મોદી અને તેમના દ્વારા કરવામાં આવેલા કાર્યોના ખૂબ મોટા પ્રશંસક છીએ."

રાષ્ટ્રપતિ તરીકે ટ્રમ્પની આ બીજી ભારત યાત્રા હશે. આ પહેલાં તેઓ વર્ષ 2020માં અમદાવાદ આવ્યા હતા.
હૈદરાબાદમાં ટ્રમ્પના નામે રોડનું નામાભિધાન
અમેરિકાની આઝાદીની 250મી વર્ષગાંઠ નિમિત્તે હૈદરાબાદમાં આયોજિત 'ફ્રીડમ 250' કાર્યક્રમ દરમિયાન યુએસ કોન્સ્યુલેટ નજીકના એક રસ્તાને 'ડોનાલ્ડ ટ્રમ્પ એવન્યુ' નામ આપવાની જાહેરાત કરવામાં આવી છે. આ કાર્યક્રમમાં ભારતમાં અમેરિકાના રાજદૂત સર્જિયો ગોર અને તેલંગાણાના નાયબ મુખ્યમંત્રી મલ્લુ ભટ્ટી વિક્રમાર્કા હાજર રહ્યા હતા.

ટ્રમ્પે સોશિયલ મીડિયા પર આભાર માન્યો:
આ સન્માન બદલ અમેરિકી રાષ્ટ્રપતિ ડોનાલ્ડ ટ્રમ્પે ભારતનો આભાર માનતા પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર લખ્યું: "ભારતના હૈદરાબાદમાં નવું ડોનાલ્ડ ટ્રમ્પ એવન્યુ. હું આ રીતે સન્માનિત થનાર પ્રથમ યુએસ રાષ્ટ્રપતિ છું. આભાર!"

ટ્રમ્પની ભારત મુલાકાત દરમિયાન આ 4 મુદ્દા પર રહેશે નજર
ટ્રમ્પની આગામી ભારત મુલાકાત દરમિયાન બંને દેશો વચ્ચે સંરક્ષણથી લઈને આર્ટિફિશિયલ ઇન્ટેલિજન્સ (AI) સુધીના મહત્વના મુદ્દાઓ પર ચર્ચા થઈ શકે છે:

ટ્રેડ ડીલ અને ટેરિફ: બંને દેશો મુખ્ય દ્વિપક્ષીય વેપાર કરાર (BTA)ની ખૂબ નજીક છે. ટ્રમ્પની નવી ટેરિફ નીતિઓ અને ભારતીય સામાન પરના ટેક્સ ઘટાડવા અંગે સીધી વાતચીત થશે.
ડિફેન્સ અને મિલિટરી ડીલ: 'ભારત-યુએસ કોમ્પેક્ટ' હેઠળ અત્યાધુનિક શસ્ત્રોના ઉત્પાદન માટે લશ્કરી ક્ષમતાઓ વધારવા અને ટેકનોલોજી શેરિંગ પર નિર્ણયો લેવાશે.
ભવિષ્યની ટેકનોલોજી (AI): આર્ટિફિશિયલ ઇન્ટેલિજન્સ, સેમિકન્ડક્ટર્સ અને સુરક્ષિત વૈશ્વિક સપ્લાય ચેઇનના નિર્માણ પર બંને દેશો વ્યુહરચના ઘડશે.
વૈશ્વિક સુરક્ષા: મિડલ ઈસ્ટમાં શાંતિ સ્થાપિત કરવા અને બંને દેશોના સુરક્ષા હિતોનું રક્ષણ કરવા માટે ચર્ચા યોજાશે.

G7 સમિટમાં ટ્રમ્પે કહ્યું- 'વ્હાઇટ હાઉસમાં હંમેશા મોદીના સારા મિત્ર રહેશે'
તાજેતરમાં ફ્રાન્સના એવિયનમાં યોજાયેલી 52મી G7 સમિટ દરમિયાન પીએમ મોદી અને ડોનાલ્ડ ટ્રમ્પ વચ્ચે મુલાકાત થઈ હતી. આ દરમિયાન ટ્રમ્પે પીએમ મોદીના જોરદાર વખાણ કરતા કહ્યું હતું કે, "જ્યાં સુધી હું રાષ્ટ્રપતિ છું, વ્હાઇટ હાઉસમાં મોદીના હંમેશા એક સારા મિત્ર હાજર રહેશે. જો ભારત કે મોદી પર કોઈ આફત આવશે, તો અમે તેમની મદદ કરીશું." તેમણે મોદીને એક 'શાંત છતાં પ્રબળ નેતા' ગણાવ્યા હતા.

પીએમ મોદીએ ભારતીય નાવિકોની સુરક્ષાનો મુદ્દો ઉઠાવ્યો:
દ્વિપક્ષીય બેઠક દરમિયાન પીએમ મોદીએ સમુદ્રમાં ભારતીયોની સલામતીનો મુદ્દો ઉઠાવ્યો હતો અને આશા વ્યક્ત કરી હતી કે ઈરાન સાથેના કરાર હેઠળ ભારતીયોની સુરક્ષા સુનિશ્ચિત કરાશે. તેમણે હોર્મુઝ સ્ટ્રેટ ખુલ્લું રાખવા પર ભાર મૂક્યો હતો અને પશ્ચિમ એશિયામાં શાંતિ સ્થાપવાના ટ્રમ્પના પ્રયાસોની પ્રશંસા કરી હતી.

છેલ્લા 10 વર્ષમાં મોદી-ટ્રમ્પની 9 ઐતિહાસિક મુલાકાતો
પીએમ મોદી અને ડોનાલ્ડ ટ્રમ્પ છેલ્લા એક દાયકામાં 9 વખત મળી ચૂક્યા છે:
જૂન 2017: વ્હાઇટ હાઉસ, વોશિંગ્ટનમાં પ્રથમ મુલાકાત.
જુલાઈ 2017: જર્મનીમાં G20 સમિટ દરમિયાન.
નવેમ્બર 2017: ફિલિપાઇન્સમાં ASEAN સમિટ દરમિયાન.
જૂન 2019: જાપાનમાં G20 સમિટ દરમિયાન.
સપ્ટેમ્બર 2019: અમેરિકાના હ્યુસ્ટનમાં ઐતિહાસિક 'હાઉડી મોદી' કાર્યક્રમ.
ડિસેમ્બર 2019: લંડનમાં નાટો સમિટ દરમિયાન.
ફેબ્રુઆરી 2020: ટ્રમ્પની ભારત મુલાકાત, અમદાવાદમાં ઐતિહાસિક 'નમસ્તે ટ્રમ્પ' કાર્યક્રમ.
ફેબ્રુઆરી 2025: ટ્રમ્પના બીજા કાર્યકાળની શરૂઆત પછી વ્હાઇટ હાઉસમાં પ્રથમ દ્વિપક્ષીય બેઠક.
જૂન 2026: ફ્રાન્સના એવિયનમાં G7 સમિટ દરમિયાન મુલાકાત.