Lucknow Super Giants:  IPL 2026ની સિઝન પૂરી થતાં જ ક્રિકેટ કોરિડોરમાંથી સૌથી મોટા સમાચાર સામે આવી રહ્યા છે. લખનઉ સુપર જાયન્ટ્સ (LSG) ના કેપ્ટન ઋષભ પંતે પોતાના પદ પરથી રાજીનામું આપી દીધું છે. શુક્રવારે (૨૯ મે) ફ્રેન્ચાઈઝીએ સોશિયલ મીડિયા પર એક સત્તાવાર પોસ્ટ શેર કરીને પંતને કપ્તાનીમાંથી મુક્ત કરવામાં આવ્યા હોવાની માહિતી આપી હતી. ઓફિશિયલ રિલીઝમાં જણાવવામાં આવ્યું છે કે પંતે પોતે જ કેપ્ટનશીપ છોડવાનો નિર્ણય લીધો છે. લખનઉ દ્વારા જારી કરાયેલી રિલીઝમાં લખ્યું છે કે, "લખનઉ સુપર જાયન્ટ્સ ઔપચારિક રીતે જાહેરાત કરવા માંગે છે કે ઋષભ પંતે ફ્રેન્ચાઇઝીને કેપ્ટનશીપની ફરજોમાંથી મુક્ત કરવા વિનંતી કરી છે અને ફ્રેન્ચાઇઝીએ તાત્કાલિક અસરથી તેમની વિનંતી સ્વીકારી લીધી છે."

ટીમ ડિરેક્ટરે શું કહ્યું?
પંતના કેપ્ટનશીપ છોડવા અંગે લખનૌના ટીમ ડિરેક્ટર ટોમ મૂડીએ કહ્યું, "ઋષભ પોતાની વિનંતી લઈને ફ્રેન્ચાઇઝમાં આવ્યો હતો અને અમે તેને આદરપૂર્વક સ્વીકારી લીધી. આ નિર્ણયો ક્યારેય સરળ નથી હોતા. કેપ્ટન તરીકે પંત અમારા ડ્રેસિંગ રૂમમાં જે કંઈ લાવે છે તેના માટે અમે આભારી છીએ.

પંત લખનઉ સાથે જોડાયેલા રહેશે
હાલમાં, રિલીઝમાં જણાવાયું છે કે પંતે ફક્ત કેપ્ટનશીપ છોડી દીધી છે, તે એક ખેલાડી તરીકે લખનૌ સાથે સંકળાયેલા રહેશે. જોકે, પંતના ટીમમાં રહેવા અંગેનો અંતિમ નિર્ણય આગામી સિઝન માટે રિટેન કરાયેલા અને રિલીઝ કરાયેલા ખેલાડીઓની યાદી જાહેર થયા પછી લેવામાં આવશે.

પંતની કેપ્ટનશીપ હેઠળ લખનઉનું નબળું પ્રદર્શન
2026ની સીઝનમાં, પંતની આગેવાની હેઠળ લખનૌએ ખૂબ જ ખરાબ પ્રદર્શન કર્યું. લખનઉ બહાર થનારી પહેલી ટીમોમાંની એક હતી, જેણે ૧૪ લીગ મેચમાંથી ફક્ત ચાર જ જીતી હતી. લખનઉ બાકીની 10 મેચ હારી ગયું, અને પોઈન્ટ ટેબલમાં 10મા સ્થાને રહ્યું, જે સિઝનનું તેમનું સૌથી ખરાબ પ્રદર્શન હતું.