અયોધ્યાના રામ મંદિરના દાન અને ચઢાવાના નાણાંના સંચાલનમાં કથિત ગેરરીતિના આરોપોને લઈને શિવસેના (યુબીટી) આજે મુંબઈમાં 'રામ રક્ષા' નામે વિરોધ પ્રદર્શન યોજશે. આ પ્રદર્શનનું નેતૃત્વ પક્ષ પ્રમુખ ઉદ્ધવ ઠાકરે કરશે. શિવસેના (યુબીટી)ના નેતાઓના જણાવ્યા અનુસાર આ કાર્યક્રમ આજે સાંજે 4 વાગ્યે મુંબઈના દાદર વિસ્તારમાં કબૂતરખાના નજીક આવેલા હનુમાન મંદિરથી શરૂ થશે.

પાર્ટીના સાંસદ સંજય રાઉતે જણાવ્યું કે અયોધ્યાના રામ મંદિરમાં ભક્તો દ્વારા આપવામાં આવેલા દાનના સંચાલનમાં થયેલી કથિત ગેરરીતિ અને ભ્રષ્ટાચાર સામે અવાજ ઉઠાવવા માટે આ વિરોધ પ્રદર્શનનું આયોજન કરવામાં આવ્યું છે. કાર્યક્રમ દરમિયાન ઉદ્ધવ ઠાકરે, પક્ષના નેતાઓ અને મોટી સંખ્યામાં કાર્યકરો સાથે મળીને 'રામ રક્ષા સ્તોત્ર', 'હનુમાન સ્તોત્ર' અને 'હનુમાન ચાલીસા'નું પાઠ કરશે. પક્ષનો દાવો છે કે આ કાર્યક્રમમાં હજારો રામભક્તો જોડાશે.

ઉદ્ધવ ઠાકરેએ ભાજપ પર આરોપ લગાવ્યો છે કે રામ મંદિરના દાન અંગે પારદર્શિતા જાળવવામાં સરકાર નિષ્ફળ રહી છે. તેમણે દાવો કર્યો કે ભક્તોના દાનના નાણાંના ઉપયોગ અંગે જવાબદારી નક્કી થવી જોઈએ અને સમગ્ર મામલે પારદર્શક તપાસ થવી જરૂરી છે.

ઠાકરેએ સામાન્ય જનતાને પણ આ વિરોધ પ્રદર્શનમાં જોડાવા માટે ખુલ્લું આમંત્રણ આપ્યું છે. તેમણે જણાવ્યું કે ભગવાન શ્રીરામના નામે ભક્તોએ આપેલા દાનમાં જો કોઈ ગેરરીતિ થઈ હોય તો તેના સામે દરેક હિંદૂએ અવાજ ઉઠાવવો જોઈએ.

બીજી તરફ સંજય રાઉતે ભાજપ અને આરએસએસ પર પણ નિશાન સાધતાં કહ્યું કે રામ મંદિર આંદોલન દરમિયાન શિવસેના સક્રિય રીતે રસ્તા પર હતી, જ્યારે ભાજપ અને આરએસએસના નેતાઓ ઘરે બેઠા હતા. તેમણે સવાલ ઉઠાવ્યો કે મંદિરના દાનમાં કથિત ગેરરીતિ માટે જવાબદાર કોણ છે અને સમગ્ર મામલે સત્ય દેશ સામે આવવું જોઈએ.

નોંધનીય છે કે રામ મંદિરના દાનમાં ગેરરીતિના આક્ષેપો અંગે સંબંધિત પક્ષો તરફથી અલગ-અલગ દાવા કરવામાં આવી રહ્યા છે અને મામલે સત્તાવાર તપાસ અથવા અંતિમ નિષ્કર્ષની રાહ જોવામાં આવી રહી છે.